Փաստ ինֆո

«Ռուս խաղաղապահները մնացել են Ալիեւի կոկորդին։ Նրանք Արցախում ապահովում են մեր հայրենակիցների անվտանգությունը եւ քանի Արցախում ապրում են մեր հայրենակիցները, Արցախի հարցը լուծված չէ եւ Ադրբեջանի ռազմաքաղաքական ղեկավարությունը դա հրաշալի գիտի»,- «Փաստինֆո»-ի հետ զրույցում նման կարծիք հայտնեց ռազմական փորձագետ Հայկ Նահապետյանը՝ անդրադառնալով խաղապահների դեմ ուղղված Ադրբեջանի մեդիաարշավին։
Պահեստազորի գնդապետը վստահ է, որ Արցախի խնդրի ադրբեջանական լուծման ճանապարհը խաղաղապահներրի հեռացումն է, իսկ դրա համար Ադրբեջանը պետք է նախադրյալներ ստեղծի, իբրեւ թե նրանք անում են գործողություններ՝ իրենց գործառույթներից դուրս։ Նահապետյանի խոսքով, հենց սրանով է պայմանավորված, որ վերջին օրերին ադրբեջանական ԶԼՄ-ներով տեղեկություն տարածվեց, թե ՌԴ-ից դեպի Հայաստան՝ 102-րդ ռազմաբազա տեղափոխվում է զենք-զինամթերք, որը հետո Լաչինի մարդասիրական միջանցքով փոխանցվում է Արցախ։

Հիշեցնենք, որ Ստեփանակերտն այս լուրերը տեղեկատվական ահաբեկչություն էր որակել։ Իսկ այօր Ադրբեջանի նախագահ Իլհամ Ալիևը Շուշիում զինվորականների առջեւ հայտարարել է, որ ռուս խաղաղապահ առաքելությունը Ղարաբաղում գտնվում է ժամանակավոր, և այդ առաքելության ժամկետները սահմանված են 2020թ. նոյեմբերի 10-ի հայտարարությամբ:

«Մարդասիրական միջանցքով զինտեխնիկա փոխադրելու մասին լուրերով, ըստ Նահապետյանի, Ադրբեջանը 2 բան է անում․ «Նախ, նա ՌԴ ղեկավարությանը մեղադրում է եռակողմ հայտարարության պայմանները խախտելու մեջ, որովհետեւ եռակողմ 3 հայտարարություններում նման բան չկա, որ ՌԴ-ն պարտավոր է զենք -զինամթերքով ապահովել մեր հայրենակիցների անվտանգությունն Արցախում , եթե նման բան լիներ, ապա այդ զենք -զինամթերքը կարող էին ստանալ Արցախում տեղակայված ռուս խաղաղապահները, ապա փոխանցեին սահմանը պահող մեր հայրենակիցներին։ Ադրբեջանը ՌԴ ռազմաքաղաքական ղեկավարությանն անուղղակի մեղադրում է, որ նա չի կատարում իր վրա դրված պարտավորությունը, հետեւաբար, եթե ՌԴ-ն չի կատարում, ապա Ադրբեջանը եւս իրեն կարող է իրավունք վերապահել չկատարել։ Երկրորդ նպատակն Արցախում տեղակայված խաղաղապահներին վարկաբեկելն է»,-ասաց Նահապետյանը։
Ըստ բանախոսի, առայժմ այս դեմարշն իրականացվում է քարոզչական ճանապարհով եւ պաշտոնական, պետական մակարդակով նման բան չի հայտարարվում ։ «Բայց, եթե այդ ուղղությամբ Ադրբեջանի ղեկավարությունը փորձի ավելի առարկայական քայլեր անել, կարծում եմ, որ Ալիեւը կրակի հետ կխաղա, որովհետեւ չունենալով որեւէ փաստական հիմք եւ նման բաներ հայտարարելը նշանակում է մեղադրանք ուղղակիորեն ՌԴ քաղաքական ղեկավարությանը»։

Նահապետյանի խոսքով, Ադրբեջանը, իհարկե, կցանկանա Լաչինի միջանցքում անցակետ տեղադրել, ինչի մասին ակնարկներ եղել են եւ Ադրբեջանը հայտարարել է այսպես կոչված Զանգեզուրի միջանցքի շուրջ խոսակցությունների համատեքստում, բայց, Նահապետյանի խոսքով, նման սցենար չի կարող լինել։ Նահապետյանը հիշեց Օվերչուկի հայտարարությունը, որ ՀՀ տարածքում արտատարածքային միջանցք լինել չի կարող։ Խոսք կարող է լինել միայն կոմունիկացիաների անվտանգ օգտագործման համար ՌԴ-ի կողմից լրացուցիչ ռեսուրսների տրամադրման մասին։

«Որքան էլ Ալիեւը տարբեր հարթակներում փորձի այդ մասին բարձրաձայնել, նման բան չի կարող լինել, որովհետեւ այդ հարաբերությունները կարգավորվում են եռակողմ երեք հայտարարություններով։ Այո, Ադրբեջանը շատ կուզենար անցակետ ունենալ , բայց դա կնշանակի խախտել նոյեմբերի 9-ի հայտարարության կետերը»,-ընդգծել է Նահապետյանը՝ հավելելով, որ Ադրբեջանը վերը նշված քարոզչությամբ՝ ընդդեմ ռուս խաղաղապահների, Բերձորում անցակետ տեղադրելու հիմնավորումներ է փորձում ստեղծել։

Աղբյուր` Փաստինֆո