Փաստ ինֆո

Սահմանամերձ Խոզնավարում մարդիկ մտահոգ են. Հայաստանի ինքնիշխան տարածք բերթափանցելով՝ թշնամին ոչ միայն տասնյակ գյուղերի հազարավոր բնակիչների համար լուրջ անվտանգային սպառնալիք է ստեղծել, այլև՝ կենսական կարևորություն ունեցող պայմաններից է զրկել։ Սյունիքի մարզի Խոզնավար գյուղում, օրինակ, մարդկանց ապրուստի միջոցը՝ անասնապահությունը կաթվածահար վիճակում է։ «Փաստինֆո»-ի հետ զրույցում նախկին գյուղապետ Վարո Գրիգորյանը ցավով է նշում, որ երբեմնի անասնապահական հարուստ գյուղից բան չի մնացել։

«Եթե անգամ սրանից հետո առաջ չգա էլ թշնամին, մեր անասնապահությունը ջարդված է արդեն։ Մինչև 44-օրյան ավելի քան 1000 գլուխ խոշոր եղջերավոր անասուն ունեինք։ Ազատագրված Քաշաթաղում անասնապահության համար նպաստավոր շատ տարածքներ կային։ Պատերազմից հետո քիչ-քիչ նվազեց անասունների թիվը, իսկ 2021թ. մայիսից հետո՝ կտրուկ կրճատվեց։ Հիմա հազիվ 300 անասուն կլինի, էն էլ մի կերպ են պահում։ Անասունն արոտից որ գալիս է, կեր են տալիս, որ գոյությունը պահի մի կերպ։ Մի քիչ հետո՝ հենց ձյունը դրեց, լրիվ կփակեն գոմում»,-ասում է Գրիգորյանը։

Գյուղացիներն առանձնապես հույսեր չեն կապում նաև օտարերկրյա դիտորդական առաքելությունների հետ։

«Ում խոսեցնում ես, ասում է՝ սա կյանք չի, ի՞նչ անեմ հիմա, ինչո՞վ զբաղվեմ էստեղ։ Անասնապահությունն էր պահում մարդկանց գյուղում, հիմա մի քիչ կարտոֆիլ ու լոբի են ցանում, ուրիշ ոչ մի բան։ Ես ոչ մի լավ բան չեմ տեսնում»,-ասում է Խոզնավարի նախկին գյուղապետը։

ԵՄ դիտորդական առաքելությունը Խոզնավարի հատվածում դեռ այսօր է եղել՝ այն էլ, ինչպես հասկացվեց գյուղի վարչական ղեկավար Վահան Զաքյանի խոսքերից, կարճ ժամանակով.

«Գյուղացիներից ասացին, որ դիտորդները մի քանի մեքենայով եկել են, բարձրացել վերև։ Դրանից հետո ես բարձրացա դեպի դիրքեր, բայց արդեն էնտեղ չէին։ Երևի եկել են, որտեղ իրենց պետք է նայել ու գնացել։ Համենայնդեպս, մի երկու դիրքից էլ ճշտեցի, ասացին՝ մեզ մոտ չեն եկել»։

Աղբյուր` Փաստինֆո