Փաստ ինֆո

ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանը հունից դուրս եկավ լրագրողի՝ ապօրինի գույքի մասին հարցից և սկսեց բղավել լրագրողի վրա։

Հիշեցնենք, որ դատախազությունը դատական կարգով պահանջում է Սուքիասյաններին «Սիլ պլազայի» սեփականության իրավունքից զրկել, կա նաև հարուցված քրեական գործ։ Սակայն երբ լրագրողը փորձեց իշխանական պատգամավորի դիրքորոշումը ճշտել՝ դատախազության ներկայացրած հայցադիմումի մասին՝ Սուքիասյանը թույլ չտվեց անգամ հարցն ավարտել, ճշտեց, թե որ լրատգամիջոցն է ներկայացնում ու գորգոռաց լրագրողի վրա

«Դուք անհարմար չե՞ք զգում, ապօրինի գույքը Ռոբերտ Քոչարյանինն է։ Ձեր սեփականատերը՝ գող, ավազակ, կյանքում ոչ մի բան չի արել էս երկրի համար, ոչ մի բիզնես չի ունեցել, միլիարդավոր դոլարներ ունի։ Դուք իրավունք չունեք լրատվություն կոչվելու։ Գնացեք միլիարդները բերեք։ 400 -500 մարդ մնացել է առանց բնակարանի, Հյուսիսային պողոտան կառուցվել է։ Ինձ մյուս նախագահն է ասել»։

Ճշգրտող հարցին՝ արդյո՞ք Սերժ Սարգսյանի մասին է խոսքը, Սուքիասյանը պատասխանեց. «Այո, նա է ինձ ասել։ Ասել է՝ 320 բնակարան Ռոբերտ Քոչարյանից հետո մնացել է մեզ։ Մարդիկ մնացել են առանց բնակարան, ասում է՝ մենք ենք առել տվել»։

Ի դեպ, Խաչատուր Սուքիասյանը պնդում է, որ ժամանակին իրեն խնդրել են, որ ինքը ձեռք բերի «Սիլ պլազա»-ի շենքը։ Դիտարկմանը, որ կիսակառույցը իրեն է տրվել՝ վերանորոգելու և պատկերասրահ դարձնելու համար, սակայն նպատակին չի ծառայել, Սուքիասյանը հայտարարեց, որ նպատակին չի ծառայել, որովհետև շուկայական հարաբերություններ են եղել։

«Շուկայականով անհնար է։ Որտեղից այդքան գումար։ Ընդհանրապես եկամուտ չէր լինի։ Նման շենքերն ընդհանրապես կառուցում են որպես կապիտալի, որովհետև ծախսը շատ մեծ է։ Երբ երկու-երեք հարկ է՝ ծախսը անգամներ ավել է, 15 հարկը՝ նույն փոսն ես փորում, նույն աշխատանքը կատարում ես, բայց ավելի մեծ քառակուսի մետր ես ունենում։ Երկու հարկանին, այն էլ՝ մի մասը բաց է, նշանակում է, որ այդ շենքը դեռ 30 տարի չի կարող գումարը հետ բերել»,- ասաց Սուքիասյանը։

Աղբյուր` Փաստինֆո