Փաստ ինֆո

Թուրքիան մեծացնում է իր աշխարհաքաղաքական ախորժակը և հայտ է ներկայացնում՝ համաշխարհային գերտերություն դառնալու համար: Այս մասին «Փաստինֆո»-ի հետ զրույցում հայտարարել է միջազգայնագետ Գրիգոր Բալասանյանը:

Փորձագետի արձանագրմամբ՝ Թուրքիան այլևս չի թաքցնում իր նկրտումները և քարտեզով հստակ նշում է, թե որ պետություններն են լինելու իր աշխարհաքաղաքական շահերի կենտրոնում:

«Պարզ է, որ Էրդողանը քայլեր է ձեռնարկում թյուրքական մեծ պետության ստեղծման համար: Նա նույնիսկ Թյուրքական խորհուրդը անվանափոխեց Թյուրքական պետությունների կազմակերպության: Էրդողանը հայտ է ներկայացնում՝ դառնալու թյուրքական պետության հիմնադիր և իր տիրապետության տակ վերցնելու բոլոր թուրքալեզու ժողովուրդներին և թուրքական պետությունները»,-հավելեց Բալասանյանը՝ շեշտելով, որ այս ամենը անհանգստացնում է հատկապես Ռուսաստանին և Չինաստանին.

«Մտնելով Կենտրոնական Ասիա, Ռուսաստանի և Չինաստանի տարածքների նկատմամբ հավակնություններ ներկայացնելով՝ Էրդողանը պատճառ է դառնալու այս պետությունների կողմից ուժեղ հակազդեցության: Թուրքիայի այս հավակնություններւ լուրջ հակահարվածի են արժանանալու Ռուսաստանի և Չինաստանի կողմից»,-ասաց բանախոսը:

Ընդ որում, փորձագետն ընդգծում է, որ Թուրքիան այլ պետությունների վրա իր ազդեցությունը տարածում է փափուկ ուժի միջոցով՝ տարբեր կրոնական դպրոցներ բացելով, ինչպես նաև Կենտրոնական Ասիայի երկրների հետ ռազմատեխնիկական համագործակցությամբ

«Այս առումով ակտիվ է հատկապես Թուրքիայի՝ Ղազախստանի և Ուզբեկստանի հետ նրա ունեցած հարաբերությունները, լուրջ ներկայացվածություն ունի նաև Ղրղզստանում: Միակ երկիրը, որտեղ Թուրքիան չի թափանցել, դա Տաջիկստանն է, սա այն պատճառով, որ տաջիկները էթնիկ առումով թյուրքական աշխարհի հետ որևէ կապ չունեն»,-ասաց նա:

Գրիգոր Բալասանյանը հիշեցնում է, որ Թուրքիան ազդարարել է նաև թյուրքական բանակ ստեղծելու մասին, ինչը նշանակում է, որ թյուրքական աշխարհի պետությունները գործելու են մեկ դրոշի տակ և մեկ ռազմավարական պլանավորման շրջանակներում

Բանախոսի արձանագրմամբ՝ Թուրքիայի այս քաղաքականությունը Կենտրոնական Ասիասյում ուղղված է Ռուսաստանին և Չինաստանին տարածաշրջանից դուրս մղելուն.
« Ռուսաստանը և Չինաստանը մտահոգվելու տեղ ունեն, քանի որ Թուրքիայի ազդեցությունը մեծանալու է ի հաշիվ իրենց»,-ասաց Գրիգոր Բալասանյանը:

Աղբյուր` Փաստինֆո