Փաստ ինֆո

Ընդդիմության նոյեմբերի 5-ի հանրահավաքը կարելի է համարել ձախողված: Եթե դրա նպատակը ամբողջ հայության միասնականությունը ցույց տալն էր, Արցախին սատար կանգնելն ու զորակցելը, ապա ոչինչ չստացվեց, քանի որ Հայաստանում միայն 5-6 հազար մարդ չէ, որ պատրաստ է աջակցել Արցախին: «Փաստինֆո»-ի հետ զրույցում ասել է քաղաքական վերլուծաբան Արմեն Բաղդասարյանը՝ ընդգծելով, որ ընդդիմությանը չէր հաջողվել հասարակությանը համոզել, որ հանրահավաքը ոչ թե ներքաղաքական օրակարգով էր, ոչ թե հանուն իշխանության էր, այլ՝ հանուն միասնական ջանքերի մեկտեղման էր, հանուն Արցախի էր և նոր կապիտուլացիայի ստորագրումից խուսափելու համար էր.

«Եթե ընդդիմությանը հաջողվեր սա անել, ապա հզոր հանրահավաք կլիներ»,-հավելեց փորձագետը:

Արմեն Բաղդասարյանը ընդգծում է՝ մեր քաղաքական դաշտում համակարգային լուրջ փոփոխություններ են պետք, նոր դեմքեր են անհրաժեշտ, իսկ ընդդիմությունը պետք է հրաժարվի իր լոզունգային կարգախոսներից և իրատեսական ծրագրեր ներկայացնի հանրությանը.

«Նրանք, ովքեր ելույթ են ունենում հարթակից, հասարակությանը նրանց շատ լավ հիշում է: Մարդկանց մոտ հարց է առաջանում՝ այն ժամանակ դուք էիք իշխանության, ինչո՞ւ չէիք դուք հարցը լուծում: Սա մեծապես խանգարում է, որպեսզի մենք կարողանանք համազգային խնդիրներ լուծել և միասնական տեսակետը ներկայացնել»,-ասաց զրուցակիցը:

Փորձագետը հիշեցնում է, հանրահավաքի նպատակն էր ցույց տալ աշխարհին, որ հայ ժողովուրդը միասնական է, ունի դիրքորոշում և պայքարելու է, որպեսզի նոր կապիտուլացիա տեղի չունենա, սակայն չհաջողվեց, իսկ հանրահավաքի արդյունքը եղավ այն, որ իշխանությունները վաղը կարող են հանգիստ ասել՝ հանուն Արցախի հանրահավաք էիք անում, ընդամենը 5-6 հազար մարդ դուրս եկավ փողոց.

«Մինչդեռ իրականում այդպես չի, իրականում ՀՀ 3 մլն քաղաքացիները, չնչին բացառություններով, պատրաստ են թիկունք կանգնել և սատարել Արցախին հնարավոր բոլոր ձևերով»,-ասաց Բաղդասարյանը:

Նրա խոսքով՝ եթե Ստեփանակերտում հանրահավաք է կազմակերպվում և դրան Արցախի չափահաս բնակչության 80%-ը մասնակցում է, իսկ Երևանում հանրահավաքին մասնակցում է 1%-ից էլ քիչ մարդ, նշանակում է, որ խնդիրը կազմակերպիչների և ուղերձների մեջ է:

Արմեն Բաղդասարյանի դիտարկմամբ՝ ընդդիմությունը դասեր չի քաղել իր նախորդ ձախողումներից և շարունակում է նույն սխալները թույլ տալ՝ կրկին ձախողելով քաղաքական գործընթացները.

«Ընդդիմության խնդիրներն այլ են: Ընդդիմությունը ցանկանում է, որպեսզի Նիկոլ Փաշինյանը օր առաջ գնա ու շատ ծանր փաստաթուղթ ստորագրի, որպեսզի իրենք հերթական անգամ իշխանության գալու նոր հնարավորություն ստանան, այլ բան ինձ չի մնում ենթադրելու: Չէ՞ որ ի սկզբանե ակնհայտ էր, որ նույն կարգախոսներով հնարավոր չի լինելու հզոր հանրահավաք կազմակերպել:Ես կարծում եմ, գիտակցաբար են սա արել, քանի որ, եթե իսկապես խնդիրը լիներ ամբողջ աշխարհին մեր միասնական կամքը ցույց տալը, այդ դեպքում կգնային համագործակցության բոլոր քաղաքական ուժերի հետ, այդ թվում՝ իշխանությունների, կասեին՝ գիտեք, խնդիր կա աշխարհին ցույց տալու մեր միասնականությունը, իշխանություններն էլ գաղտնի մեխանիզմներով կարող էին աջակցել, որ իսկապես այդպես լիներ, բայց մենք տեսնում ենք հակառակը՝ ընդդիմությունը և իշխանությունը ոչ միայն համատեղ ծրագիր չեն կարողանում իրականացնել, այլ անգամ ինչ-որ բան քննարկելու ցանկություն չունեն: Երկուսն էլ առաջնորդվում են ոչ թե պետական, այլ քաղաքական շահով»,-եզրափակեց Արմեն Բաղդասարյանը:

Աղբյուր` Փաստինֆո