Փաստ ինֆո

ՀՀԿ փոխնախագահ Արմեն Աշոտյանը ֆեյսբուքի ուղիղ եթերում հայտարարել է, որ մոտ ժամանակահատվածում իշխանությունները «շատ զավեշտալի պատրվակով» պատրաստվում են իրեն ձերբակալել:

Արմեն Աշոտյանը մանրամասնեց, որ իշխանությունները որոշել են անդրադառնալ չորս տարվա վաղեմության մի գործի, որի շրջանակներում տարբեր մարդկանց են հարցաքննել, սակայն՝ ապարդյուն.

«2018 թ․-ից Բժշկական համալսարանում, որտեղ ես եղել եմ Հոգաբարձուների խորհդի նախագահ, Պետական վերահսկողական ծառայություն կոչված Նիկոլական հերթական «կույրաղիքը» ստուգումներ է իրականացրել։ Այդ ժամանակ Դավիթ Սանասարյանն է ՊՎԾ պետ լինում, Բժշկական համալսարան են մտնում նպատակային ստուգումներով, որ ինձ վրա ինչ-որ կեղտ բռնեն: Մի դրվագով փորձում են «բոչկա գլորել» ինձ վրա, որովհետև Բժշկական համալսարանն այդ ժամանակահատվածում ինչ-որ բիզնես հարաբերություններ է ունեցել այսօրվա «Դիմադրության» շարժման ներկայացուցիչ Իշխան Սաղաթելյանի ընկերություններից մեկի հետ։ Այնքան հիմարություն է գրած լինում Դավիթ Սանասարյանի ղեկավարած կառույցը, ու ես գիտեմ՝ ինչու է նա դա գրում, և ում ուղղորդմամբ։ Ըստ օդում կախված լուրերի՝ նա որոշակի բան է ստանում իմ դեմ գրելու համար։ Մի խոսքով, նման թուղթ են գրում․ չորս տարի այդ փաթեթը տարբեր իրավապահ մարմիններով շրջանառվում է։ Դավիթ Սանասարյանին հանում են, գալիս է Արգիշտի Քյարամյանը , որն իր հոր անունն անգամ չգիտի, բայց ուզում է ճշմարտություններ գտնել ուրիշների մասին։ Այդ գործը փորձում են փքել, սարքել ինչ-որ թեմա, գործն ուղարկում են ԱԱԾ, այնտեղ քննում են տեսնում են՝ ոչ մի «զացեպկա» չունեն ինձ կամ Իշխանին բռնելու համար, Հակակոռուպցիոն կոմիտեում էլ են տեսնում, որ իրավական առումով կպնելու որևէ տեղ չկա մեր հանդեպ։ Այս չորս տարվա ընթացքում այս ոդիսականը, այս Քյարամյան կոչվածը գալիս դառնոմ է, ու այն գործը որի տակ ոչ մի բան չկա, նորից վերահասցեագրվում է այս օբյեկտին»,- պատմեց Աշոտյանը:

Նա նշեց, որ գործի մանրամասների մասին առավել մանրամասն կներկայացնի իր շահերը ներկայացնող փաստաբանը՝ Տիգրան Աթանեսյանը, երբ դրա անհրաժեշտությունը լինի։

Աղբյուր` Փաստինֆո