Փաստ ինֆո

Մեծ Բրիտանիայի Առողջապահության ազգային ծառայության (NHS) պատմության մեջ խոշորագույն գործադուլը՝ բուժքույրերի եւ բուժանձնակազմի աշխատավարձերի բարձրացման պահանջով, կարող է տեղի ունենալ Թագավորությունում Սուրբ Ծննդի նախաշեմին, հաղորդում է Guardian թերթը՝ վկայակոչելով բուժքույրական գործի Թագավորական քոլեջի (RCN) արհմիության աղբյուրները:

Բացի այդ, պարբերականի տվյալներով՝ դա կլինի առաջին ազգային գործադուլը։ Guardian-ը գրում է, որ ավելի քան 300 հազար բուժաշխատողներ Անգլիայից, Շոտլանդիայից, Ուելսից եւ Հյուսիսային Իռլանդիայից մասնակցել են գործադուլի վերաբերյալ քվեարկությանը:

Արհմիության կայքում տեղադրված հաղորդագրության համաձայն՝ գործադուլի անցկացման հարցով քվեարկությունն արդեն ավարտվել է, եւ այժմ ձայների հաշվարկ է կատարվում, իսկ քվեարկության արդյունքները բոլոր մասնակիցներին էլեկտրոնային փոստով կուղարկվեն մոտ ժամանակներս: Սակայն, արհմիության ներկայացուցիչների խոսքով, գրում է Guardian-ը, «երկրի զգալի մասը» պաշտպանել է գործադուլի անցկացման առաջարկը։

Ինչպես հայտնում է Guardian-ը, գործադուլի արդյունքում շատ հիվանդներ կարող են բախվել վիրահատությունների և ընդունելությունների հետաձգմանը կամ չեղարկմանը:

Սակայն, ինչպես գրում է պարբերականը, վկայակոչելով գործադուլների մասին RCN արձանագրությունները, վերակենդանացման եւ ինտենսիվ թերապիայի բաժանմունքներում բուժքույրերն ու բուժաշխատողները կազատվեն գործադուլներին մասնակցելուց, որպեսզի շարունակեն կյանքի համար կարեւոր բժշկական ծառայություններ մատուցել Մեծ Բրիտանիայի բնակչությանը:

Մեծ Բրիտանիայում գործադուլների ալիք է նկատվում երկրում ռեկորդային գնաճի ֆոնին։ Բողոքի ցույցերի են դուրս գալիս երկաթուղային ընկերությունների աշխատակիցները, փաստաբանները, օդանավակայանների աշխատակիցները, փոստատարները և այլ ոլորտների աշխատակիցներ։

Աղբյուր` Փաստինֆո