Փաստ ինֆո

Առաջարկների երկու տարբերակներն էլ՝ վաշինգտոնյան և ռուսական, հայանպաստ լուծումներ չեն ենթադրում։ Դրա համար այս պայմաններում՝ ուժի, պատերազմի սպառնալիքի ճնշման տակ որևէ համաձայնագիր չի կարելի ստորագրել, որևէ զիջում՝ հիմնական մեր նպատակների համար անթույլատրելի է։ «Փաստինֆո»-ի հաղորդմամբ՝ այս մասին լրագրողների հետ զրույցում այսօր ասել է ՀՀ արտաքին գործերի նախկին նախարար Արա Այվազյանը։

Այվազյանն արձանագրեց, որ դրանց բնօրինակներին ծանոթ չէ ու դատողություններ կարող է անել հանրային տիրույթում առկա տեղեկատվության հիման վրա, որոնց համաձայն երկու առաջարկների միջեւ տարբերությունը չնչին է, ըստ լուրերի՝ մեկով հարցն ամբողջությամբ փակվում է, մյուսով՝ մնում առկախված։ Նրա խոսքով՝ մեզ ժամանակ է պետք, որ հասկանանք՝ աշխարհաքաղաքական զարգացումներն ինչպես է զարգանում, ինչպես նաև, որ կարողանանք ոտքի կանգնելու և մեր հարցը լուծելու համար։

ԱԳ նախկին նախարարն ուշադրություն հրավիրեց այն հանգամանքին, որ իր հրաժարականից մեկ ամիս առաջ համանախագահ երկրների ղեկավարները հայտարարել են, որ հարցը լուծված չէ և հարցի կարգավորումը պետք է հիմնված լինի հայտնի սկզբունքների հիման վրա, որը հասցեագրում էր այն մտահոգությունները, որ մենք հայտարել ենք պատերազմից հետո.«Այդ ժամանակ դեռևս որևէ փաստաթուղթ չկար սեղանի վրա, բայց այդ հայտարարությունից մեկ ամիս անց Ադրբեջանի ԶՈՒ-երը ներխուժեցին ՀՀ տարածք և ինձ համար անհասկանալի պատճառներով Արցախի վերաբերյալ մեր դիրքորոշումում փոփոխություններ տեղի ունեցան՝ ճնշման հետևանքով և ամբողջ ուշադրությունը սևեռվեց Հայաստանի տարածքային ամբողջականության վրա։ Այսինքն՝ Արցախի հարցի լուծումը մնաց ստվերում և հետագայում տեղի ունեցան գործընթացներ, ի հայտ եկան իրավունքի և անվտանգության պաշտպանության սկզբունքները»։
Դիտարկմանը, որ վերջին եռակողմ հայտարարությունում որևէ խոսք չկա Արցախի մասին, նույնիսկ ռուս խաղաղապահների տեղակայման վայրը չի նշվում, արդյո՞ք սա դիվանագիտական հերթական ձախողումն էր, թե այդպես էլ պետք է լիներ, Այվազյանն արձագանքեց՝ այդպես չպետք է լիներ։

«Ես հասկանում եմ՝ շատ բարդ է աշխարհաքաղաքական իրավիճակը, բայց պետք է ունենալ կարմիր գծեր։ 1994թ Ադրբեջանը շատ ծանր վիճակում էր, բայց նա իր կարմիր գծերից հետ չկանգնեց։ Մենք պետք է ունենանք մեր կարմիր գծերը և ոչինչ չզոհաբերենք՝ այդ կարմիր գծերի մասին։ Խոսում են խաղաղության մասին, բայց խաղաղությունն օդից չի լինում։ Խաղաղությունը հաստատվում է, երբ երկրների միջև կան բարենպաստ պայմաններ»,- նշեց Այվազյանը։
Դիտարկմանը՝ Սոչիում հայտարարությունում ԼՂ-ի մասին հիշատակում չկար, խաղաղության պայմանագրում՝ նույնպես չի լինի, մյուս կողմից, նշվում է, որ համաձայնել ենք ռուսական առաջարկին՝ Արցախի հարցն առկախելու հետ կապված, արդյո՞ք այս դեպքում հարցն առկախվում է, թե լուծվում՝ հօգուտ Ադրբեջանի, քանի որ տարածքային ամբողջականության ճանաչումը Ադրբեջանը պատկերացնում է՝ Արցախին իր կազմում, Արա Այվազյանը արձագանքեց՝ արձանագրելով, որ ցավոք ոչ միայն Ադրբեջանն է այդպես կարծում, այլև՝ միջազգային գործընկերները, հետևաբար, որքան էլ դժվար պայմաններ լինեն, պետք է հստակ ասենք, որ հատկապես պատերազմից հետո, եթե Արցախը կարգավիճակ չունենա, որը հիմնված կլինի Արցախի ժողովրդի ինքնորոշման իրավունքի վրա, ապա արցախահայության որևէ անվտանգության կամ իրավունքների երաշխիքները երբեք կյանքի չեն կոչվի, որովհետև տեսնում ենք Ադրբեջանի ղեկավարության և հասարակության վերաբերմունքը՝ հայերի նկատմամբ։

Մանրամասները՝ տեսանյութում։

Աղբյուր` Փաստինֆո