Փաստ ինֆո

Սա սովորական հանրահավաք չէ․ սա ինչ-որ մեկի դեմ, կամ ինչ-որ մեկի օգտին հանրահավաք չէ, այլ համահայկական միասնականությունը վերականգնելու հանրահավաք է։ Այդ մասին ի աջակցություն Արցախին հրավիրված հանրահավաքին հայտարարեց ՀՅԴ Հայաստանի ԳՄ ներկայացուցիչ Իշխան Սաղաթելյանը։

«Նախորդ կիրակի լսեցինք Արցախի հստակ ձայնը, որ Արցախը երբեք չի եղել ու չի լինելու Ադրբեջանի կազմում։ Արցխահայությունը, պետական կառավարման համակարգը հստակ, աներկբա հայտարարեցին, որ որևէ իշխանուոյւն իրավունք չունի ստորագրելու որևէ փաստաթուղթ, որը կսահամափակի Արցախի ինքնորոշման իրավունքը։ Այսօր Երևանում վերահաստատում ենք այդ պարզ ճշմարտությունը․ մայր Հայաստանը պատրաստ է պայքարել հանուն ինքն իրեն ու իր զավակի»,-ասաց Սաղաթելյանը և շեշտեց, որ պետք է վերականգնենք մեր միասնականությունն Արցախի ինքնիշխանության, ՀՀ տարածքային ամբողջականության և հայ ժողովրդի զարգանալու գաղափարի շուրջ։

Սաղաթելյանը հնչեցրեց այն հիմնական ուղերձները, որոնց վրա շեշտադրում է արվելու այսուհետ․ առաջինը կողմնորոշվելն է՝ Նիկոլի հետ, թե հայրենիքի։ Շեշտեց, որ յուրաքանչյուրն ու, առաջին հերթին, քաղաքական հայեցողական պաշտոններ զբաղեցնողները պետք է վերջապես որոշեն, թե ում հետ են։

Մյուս կարևոր ուղերձը, ըստ Սաղաթելյանի, ուղղված արտաքին աշխարհին․

«Հստակ ուղերձ ենք հղում արտաքին աշխարհին․ այս հանրահավաքով ասում ենք՝ Հայաստանը ողջունում է միջնորդների ջանքերը տարածաշրջանում կայուն խաղաղություն հաստատելու ուղղությամբ, Հայաստանը պատրաստ է քննարկելու բոլոր բարդ հարցերը, պատրաստ է բարդ ու բովանդակային բանակցությունների և լուծումների, բայց դա չի կարող լինել ազգային նվաստացման և հայրենազրկման գնով։ Չի կարող ստորագրվել և վավերացվել որևէ փաստաթուղթ, որը կսահմանափակի Արցախի ինքնորոշման իրավունքը։ Նման փաստաթուղթը պատռվելու է իշխանափոխությունից անմիջապես հետո և հայտարաարվի առոչինչ։ Միջազգային հանրությունը պետք է լավ հասկանա, որ

Նիկոլը Հայաստան չէ, որ Նիկոլը հայ ժողովրդի հավաքական կամքն արտահայտողը չէ»։

Անդրադառնալով իշխանության կողմից տարվող քարոզչությանը, որով փորձում են հասարակությանը համոզել, որ հայրենիքի մի մասը պետք է զիջել մնացած մասը պահելու համար՝ Սաղաթելյանը շեշտեց, որ աշխարհում չկա մի ժողովուրդ, որ այդ սկզբունքով լինի առաջնորդված ու այսօր պետականություն ունենա։

«Եթե այսօր մենք կանք, հայրենիք, պետություն ուենք, դա մեր հերոսական ժողովրդի զավակների կյանքերի գնով է», -եզրափակեց Սաղաթելյանը։

Աղբյուր` Փաստինֆո