Փաստ ինֆո

Վերահաշվարկ է տեղի ունեցել, այդքան ձայների մեջ նորմալ է, որ մեկի ձայնը երկուսով ավելանա, կամ երեքով պակասի, որոշ դեպքերում ընդհանրապես փոփոխություն տեղի չի ունեցել: Այս մասին լրագրողների հետ զրույցում ասել է «Քաղաքացիական պայմանագիր» խմբակցության պատգամավոր Գևորգ Պապոյանը՝ անդրադառնալով ՔՊ վարչության կազմի ընտրության վերահաշվարկին:

«Տեխնիկական դետալների մեջ չմտնեմ, բայց երբ վերահաշվարկի պրոցեսը եղել է, մարդ ես՝ մի հատ վերև կամ ներքև է կարդացել, կամ մուտքագրողը հոգնած է եղել՝ մկնիկը-վերև ներքև է արել: Կարծում եմ, այսպիսի սխալներ են եղել, իսկ վերահաշվարկը շատ ավելի ուշադիր և դանդաղ է արվել: Ես ինքս ներկա եմ եղել վերահաշվարկին՝ որպես դիտորդ, բացառել ենք կեղծման տարբերակը: Չեմ կարծում, որ այստեղ լուրջ բան կա»,-ասաց Պապոյանը։

Դիտարկմանը, որ իրենց մեղադրում են ընտրության արդյունքները կեղծելու մեջ, Պապոյանը վստահություն հայտնեց, թե այդպիսի բան չի կարող տեղի ունենալ.

«Սա արձանագրվել է նաև վերահաշվարկի արդյունքում, նման գնահատական ես չէի հնչեցնի»,-ասաց նա:

Արձագանքելով մամուլում հրապարակված տեղեկություններին, որ Արսեն Թորոսյանն է վերահաշվարկ պահանջել, քանի որ ինքը չի ընդգրկվել վարչության կազմում, Պապոյանն ասաց.

«Վստահ չեմ, միգուցե»:

Ինչ վերավբերում է խոսակցություններին, որ Սուրեն Պապիկյանն ու Արփի Դավոյանն են համակարգել այսպես կոչված «ընտրությունների կեղծման» գործընթացը՝ պատգամավորն արձագանքեց.

«Լավ էլի, դրանք ուղղորդված հրապարակումներ են, բացառում եմ նման բան, չեմ հավատում դրան: Կարծում եմ, վարչության ներսում էլ են բացառում, ես այլ կարծիք չեմ լսել»:

Ինչպես ավելի վաղ հայտնել էինք, անցած կիրակի տեղի է ունեցել կուսակցության համագումարը, որտեղ ընտրվել է վարչության նոր կազմը:

Հետո պարզվեց, որ թյուրիմացություն է տեղի ունեցել, ձայների վերահաշվարկ է կատարվել, որի արդյունքում վարչության կազմից դուրս են եկել փոխվարչապետ Համբարձում Մաթևոսյանը, ՔՊ խմբակցության ղեկավար Հայկ Կոնջորյանը, սակայն նրանց փոխարեն վարչության կազմում են Թորոսյանն ու Փամբուխչյանը:

Աղբյուր` Փաստինֆո