Փաստ ինֆո

«Այս մարդիկ մի քանի տարի է՝ խաղում են դեմոկրատիա, դրա իմիտացիան են անում։ Այն, ինչ տեղի է ունեցել, դրա վկայությունն է, մարդիկ զարմացել են, որ ՔՊ-ում ընտրություններ են կեղծվել, բայց դա ՔՊ-ում մշտապես է տեղի ունեցել։ Ես ամենայն պատասխանատվությամբ ասում եմ, որ Փաշինյան Նիկոլը 2017 թվականի փրայմերիզի արդյունքներ է կեղծել, որից դժգոհ Արարատ Միրզոյանը եւ Ռուբեն Ռուբինյանը շտապեցին ՔՊ Գյումրու տարածքային կազմակերպություն, որ ինձ պատմեն, թե ինչ լկտիություն, այլանդակություն է տեղի ունեցել»- «Փաստինֆո»-ի հետ զրույցում ասել է ՔՊ համահիմնադիր եւ նախկին անդամ Արթուր Համբարձումյանը՝ անդրադառնալով վերջին երկու օրերի խայտառակությանը։

Արդեն հայտնի է, որ ՔՊ վարչության ընտրությունները կեղծվել են, ինչը հասատվել է վերահաշվարկի փաստով։ Կեղծիքն իրականացվել է Սուրեն Պապիկյանի ու Արփի Դավոյանի ձեռամբ։ Ընտրությունների արդյունքներին կասկածանքով է վերաբերվել Արսեն Թորոսյանը ու վերահաշվարկ նախաձեռնել, որի արդյունքում փոխվել է ՔՊ վարչության կազմը:

Արթուր Համբարձումյանը պատմեց՝ 2017-ին կեղծիքից տուժել էին Արարատ Միրզոյանը եւ Ռուբեն Ռուբինյանը, որոնք այն ժամանակ բարձրաձայնել էին խնդրի մասին։ Միրզոյանը նույնիսկ ինքնաբացարկի դիմում էր ներկայացրել, որը Փաշինյանի հորդորով հետ վերցրեց։ Հիմա նույն խնդրից այլ ՔՊ-ականներ են տուժել ու իրենք են բարձրաձայնում։ «Փաշինյան Նիկոլը փորձում է երեւալ ժողովրդավար, բազմակարծությունը հարգող, բայց պարզվում է, որ նա ավտորիտար հակումներով ամենավերջին խենթն է եւ մշտապես կեղծում է ընտրությունները, իհարկե, ուրիշի ձեռքով։ Մի քիչ ուղեղ ունեցողը հասկանում է, չէ՞, որ Արփի Դավոյանը չէր կարող ինքնուրույն գործել, 2017-ին էլ մեղադրում էին Ալեն Սիմոնյանին։ Փաշինյանի անբարոյականությունը նրանում է, որ այդ այլանդակություններն անում է ուրիշի ձեռքով, իսկ վաղը, հնարավոր է, խայտառակ կերպով կուսակցությունից հեռացնեն Արփի Դավոյանին ու Պապիկյան Սուրիկին՝ ցույց տալու համար, թե որքան ժողովրդավար են։ Բացի այդ, սա խոսում է նաեւ տուժող կողմի անբարոյականության մասին՝իրենք բողոքում են, որովհետեւ անարդարությունն իրենց է հասել ։ Այդ անձնավորությունը արդեն 4 տարի շարունակ պղծում է մի ողջ երկիր, չի հրապարակում զոհված տղաների ամբողջական ցուցակը, ուղնուծուծով մտել է կոռուպցիայի մեջ՝ իրենց ասած նախկիններից փողեր են պահանջում եւ մտցնում Աննա Հակոբյանի ֆոնդերը։ Էս մարդու կառավարման տարիներին մի այնպիսի քաղաքական կոռուպցիա է ձեւավորվել, որ Հայաստանում երբեք չի եղել »-ասում է Փաշինյանի նախկին կուսակիցը՝ հիշելով, որ 4 տարվա ընթացքում ընդամենը 1 ՔՊ-ական է ձերբակալվել կաշառակերության մեղադրանքով։

Համբարձումյանի խոսքով, միայն այս փաստը խոսում է այն մասին, որ ՔՊ-ականները կամ իդեալական են, ինչը այդպես չէ կամ Փաշինյանը կոծկում է հանցագործությունը։

Արթուր Համբարձումյանն արձանագրում է՝ ներքին կեղծիքները խոսում են մեկ բանի մասին՝ Նիկոլ Փաշինյանը չի կարող համապետական մաքուր ընտրություններ անցկացնել, ինչի մասին մեր զրուցակիցն ահազանգել է դեռ 2012 թվականին։

«Երբ մարդը պղծում է իր միկրոմիջավայրը, բնականաբար, նա մակրոմիջավայրում եւս նույն կերպ է վարվում։ Սեփական շահը պետական շահից ստորադասելու խնդիր կա, այդ մարդը դա չի կարող անել։ Նա ինչ անում է՝ անում է իբրեւ թե ժողովրդի անունից, Փաշինյանը ժողովրդի անունից շտկել է կուսակիցների սխալ ընտրությունը։ Մինչեւ 2017 թվականի վերջը Փաշինյան Նիկոլը ՔՊ-ում սովորական վարչության անդամ է եղել, բայց վարչապետի պաշտոնը զբաղեցնելուց հետո ես արդեն կողքից տեսնում էի, որ նա բոլորի կուռքն է։ Նա փորձում էր իր կամքը պարտադրել բոլորին, բռնապետություն կառուցել, բայց նա վաղուց խեղկատակության առարկա է դարձել»։

Անդրադառնալով Վահագն Հովակիմյանին՝ ԿԸՀ նախագահ նշանակելու որոշմանը, նախկին ՔՊ-ականն ասաց․ «Վահագն Հովակիմյանը Փաշինյան Նիկոլի վեցնոցն էր, նա այն անձնավորությունն էր, որը քվեարկեց նրա օգտին, որ ինձ կուսակցությունից հեռացնեն, դա չարեցին նույնիսկ Տիգրան Ավինյանը, Արարատ Միրզոյանը, Ալեն Սիմոնյանը։ Վահագն Հովակիմյանը Նիկոլ Փաշինյանի օգտագործման ենթակա անձնավորությունն է՝ ինքնասիրություն չունեցող եւ այնպես չէ, որ Տիգրան Մուկուչյանը ապօրինի հրամանին կընդդիմանար, բայց նրան չի կարելի համեմատել Վահագն Հովակիմյանի հետ, որին Փաշինյանը ԿԸՀ է տարել, որպեսզի որ համայնքում որ թեկնածուի օգտին ինչ թիվ ուզենա, գրի»։

Արթուր Համբարձումյանը շեշտեց՝ սա առաջին դեպքը չէ, երբ Փաշինյանն անկախ մարմին է տանում իրեն հլու-հնազանդ անձի։ Նա հիշեց Աննա Վարդապետյանի նշանակումը, ԿԲ նախագահի նշանակումը։

«Սահմանադրորեն անկախ ինստիտուտների ղեկավար է նշանակում մարդկանց, որոնք մանկլավիկներ են, բայց նա չի հասկանում, որ իր գերեզմանափորը հենց մարտինգալստյանները, աննավարդապետյաններն ու վահագնհովհակիմյաններն են, որոնք կատարում են նրա ապօրինի հրամանները»-եզրափակեց Փաշինյանի նախկին կուսակիցը։

Աղբյուր` Փաստինֆո