Փաստ ինֆո

Հայաստանից ԵԱՏՄ երկրներ արտահանման ծավալն այս տարվա առաջին 8 ամսում կազմել է 1.1 մլրդ դոլար, ինչը նախորդ տարվա նույն ժամանակի համեմատ աճել է 2 անգամ: «Փաստինֆո»-ի հաղորդմամբ՝ այս մասին 2023 թ պետբյուջեի նախագծի քննարկման ժամանակ ասել է ՀՀ էկոնոմիկայի նախարար Վահան Քերոբյանը:

Ըստ Նախարարի՝ 2022 թ առաջին 8 ամիսներին Հայաստանի առևտրաշրջանառությունը ԵԱՏՄ երկրների հետ կազմել է 2.778 մլրդ դոլար, ինչը նախորդ տարվա նույն ժամանակի համեմատ աճել է 74.1 տոկոսով.

«Այն 2021 թ հունվար-օգոստոսին կազմել է մոտ 1.6 մլրդ դոլար: 2022 թ հունվար-օգոստոսին ՀՀ-ից ԵԱՏՄ երկրներ արտահանումը կազմել է 1.1 մլրդ դոլար, ինչը նախորդ տարվա նույն ժամանակահատվածի համեմատ աճել է 2 անգամ: Իսկ ԵԱՏՄ երկրներից ներմուծումը կազմել է 1.67 մլրդ դոլար, ինչը նախորդ տարվա նույն ժամանակահատվածի համեմատ աճել է 58.7 տոկոսով»,-հավելեց Քերոբյանը:

ՌԴ-ի հետ Հայաստանի առևտրաշրջանառությունը կազմել է 2.642 մլրդ դոլար, ինչը նախորդ տարվա նույն ժամանակահատվածի համեմատ աճել է 71.7 տոկոսով: Ընդ որում` արտահանումն աճել է 2 անգամ, իսկ ներմուծումը՝ 55.3 տոկոսով:

Վահան Քերոբյանը նշեց նաև, որ առևտրաշրջանառությունն աճել է ԵԱՏՄ մյուս երկրների հետ նույնպես: Նախարարը հայտնեց, որ կառավարությունը աշխատանք է կատարել, որ Հայաստանի և Ռուսաստանից բացի ԵԱՏՄ մյուս երկրների հետ առևտրաշրջանառությունը ևս խթանեն:

«ԵԱՏՄ-ում բոլոր երկրների հարաբերությունների մեծ մասը կառուցված է եղել ՌԴ-ի հետ, և այն կարծես վերածվել է միայն ՌԴ ու այլ երկիր հարաբերությունների: Մենք մեր առջև խնդիր ենք դրել ակտիվացնել հարաբերությունները ԵԱՏՄ անդամ մյուս երկրների հետ նույնպես, և ԵԱՏՄ-ն իր կառուցվածքով և առևտրաշրջառանությամբ դարձնել ավելի համաչափ»,-ասաց Քերոբյանը։

Աղբյուր` Փաստինֆո