Փաստ ինֆո

Փաշինյանի հայտարարած թեզն ուղղակի ինքնախաբեություն է եւ հենված չէ օբյեկտիվ իրողությունների վրա եւ դրա մեջ կարեւոր դեր ունի հասարակությանը մոլորեցնելու ակնհայտ ձգտումը։ «Փաստինֆո»-ի հետ զրույցում այս մասին ասաց թուրքագետ, ԵՊՀ արեւելագիտության ֆակուլտետի դեկան, դոկտոր- պրոֆեսոր Ռուբեն Մելքոնյանը։

ԱԺ-ում ՀՀ վարչապետն այսօր ասել է, թե իր կարծիքով օգոստոս-հոկտեմբերին Թուրքիայի հետ հարաբերություններում ունեցած կոմունիկացիոն բարդույթներն ու բարդությունները հաղթահարվել են։ Ըստ Փաշինյանի, այսօր այդ բարդությունը վերացված է ոչ միայն կառավարության մակարդակով, այլև հանրության։

«Հարցը միանշանակ չէ, առաջինը, որ ուզում եմ ֆիքսել, այն է, որ իշխանության տարբեր ներկայացուցիչներ, առնվազն, անկեղծ չեն իրենց գնահատականներում, որովհետեւ հասարակության մի հատված՝ իրենց սատարող հատված, գտնվում է խորը մոլորության մեջ եւ, խորամուխ չլինելով տարբեր հարցերում, սատարում է այն ամենը, ինչ ասում է այս իշխանությունը։ Այդ հատվածի հայտարարությունները, խոսքերը դուրս են տրամաբանության սահմաններից, եկեք չմոռանանք, որ այդ նույն հասարակական շերտերի որոշ ներկայացուցիչներ ասում էին, որ թո՛ղ թուրքը գա, թո՛ղ Իլհամ Ալիեւը գա՝ մեր ու մանուկ կոտորի եւ այլն, եւ այլն»,-ասաց մասնագետը՝ ընդգծելով, որ Փաշինյանի հայտարարությունը որեւէ ռացիոնալ վերլուծության վրա հիմնված չէ ու, եթե իշխանությունն այդ շերտին ասի, որ մածունը սեւ է, նա պաշտպանելու է այդ տեսակետը։

Մելքոնյանի խոսքով, հենվել այդ շերտի վրա եւ ասել, որ հասարակության մեջ կա փոփոխություն՝ Թուրքիայի եւ Թուրքիայից բխող ընկալումների հետ կապված, առնվազն, անկեղծ չէ։ Երկրորդ, դա ուղիղ վտանգ է Հայաստան պետության ու մեր հասարակության անվտանգության համար։ «Դա սպառնալիք է, որովհետեւ թուլացնել հասարակության զգոնությունը այն պետությունների՝ Թուրքիայի եւ Ադրբեջանի նկատմամբ, որոնց պետական համակարգը, գաղափարախոսությունը, հասարակության գերակշիռ մեծամասնությունը ուղղակի հակահայկական ատելությամբ են տոգորված, չունի որեւէ բացատրություն եւ չի կարող որեւէ կերպ բխել Հայաստանի շահերից։ Այդ գաղափարախոսոության ամրապնդմանն են միտված տարբեր մերձիշխանական քարոզիչներ, որոնց թվում հատկապես կառանձնացնեմ Ժիրայր Լիպարիտյանին, որի ամբողջ տեսությունը հենց այն գաղափարի վրա է հիմնված, որ Թուրքիայից սպառնալիք չկա, նրա նկատմամբ թշնամանքը պետք է դադարեցնել։ Սա կարծես թե ամբողջացնում է այն ընդհանուր պատկերը, թե ուր է տանում այս խաղը եւ ովքեր են ընդգրկված դրա մեջ։ Սա մի մեծ խաղ է, մի մեծ պրոյեկտ է, եւ ցավոք, այս պահին ՀՀ իշխանությունը ներկայացնող անձինք ընդգրկված են դրա մեջ»,-ասաց Ռուբեն Մելքոնյանը։

Նրա արձանագրմամբ՝ սա ասում է ոչ թե որպես այս իշխանությանը չընդունող մարդ եւ քաղաքացի, այլ որպես թուրքագետ, որպես գիտությունների դոկտոր, պրոֆեսոր, որպես մասնագետ։ «Իրենք գտնվում են խորը մոլորության մեջ եւ այն քայլերը, որոնք իրականացնում են ուղնուծուծով սխալ քայլեր են, եւ իրենց կողքին կանգնած այդ քարոզիչները եւ տարատեսակ այլ գործիչներ, որոնց մեջ, օրինակ, նաեւ Կարո Փայլանը , սպասարկում են լիովին այլ շահեր ու այլ խաղ, որը Հայաստան պետության հետ ընդհանուր շահ ու առնչություն չունի»,-եզրափակեց մեր զրուցակիցը։

Աղբյուր` Փաստինֆո