Փաստ ինֆո

Պուտին- Փաշինյան-Ալիև՝ երեկվա եռակողմ հանդիպումը տեսախցիկի արձանագրումներով, մասնակից պետությունների ղեկավարների ժեստիկուլյացիայով՝ արդեն իսկ խոսուն էր։

Փաշինյան-Պուտին հանդիպման ընթացքում իրեն դարձի եկածի պես էր պահում Փաշինյանը՝ իր արևմտյան գծին դեմ՝ գրավոր տեքստ ընթերցելով, ընդ որում, մի տեսակ՝ առանց մտածելու։ Ակնհայտ էր, որ անկեղծ չէ, ուղղակի ընթերցում է՝ հետևանքների մասին մտածելը թողնելով դեպի Իրան՝ ինքնաթիռի մեջ։

Ինչ վերաբերվում է ալիևին, ապա վերջինիս խաղացկուն հայացքներն ու կիսաժպիտները մի կողմից վկայում էին, որ ընդունված հայտարարության որոշ տողերում իր խոսքն, այնուամենայնիվ կարողացել է առաջ տանել, բայց նաև՝ աչքերը փախցնելով և դեպի առաստաղը ձգումներով ակնհայտ անհանգստություն էր ցուցաբերում։

Իրականում, պրոտոկոլային այս հանդիպման ընթացքում կոնկրետ ձեռքբերում մեզ համար չկար, բացի այն, որ արտառոց կտրուկ բացասական մոտիվ էլ չեղավ։ Ինչ խոսք, տողատակերն էլ քիչ չէին, բայց այն, որ ՌԴ նախագահը Լեռնային Ղարաբաղ անունը եռակողմի ժամանակ իր խոսքում չհնչեցրեց, մի տեսակ «գենոցիդ» բառ-տերմինը ԱՄՆ նախագահների կողմից չարտասանելու զուգորդում թողեց։

Բայց այս զուգորդումը երբ բախվում է այն տրամաբանությանը, որ քո պետության դե յուրե ղեկավարը պատկերացնում է Լեռնային Ղարաբաղը՝ Ադրբեջանի կազմում՝ ողջ պաշտոնավարման ընթացքում նախապատրաստելով իր այդ պատկերացման իրականացումը․․․

Այսինքն, ՀՀ-ն ղեկավարում է մեկը, ով մեր Հայրենիքն իր բնիկ ազգաբնակչությամբ, թշնամուն նվիրաբերելու հարց է քննարկում եվրոպաներում և չի խորշում․․․ և պատրաստ է դրան՝ հանուն իր աթոռի, իր իշխանության, հասկանում ես, որ կարևորն ու առաջնահերթը Հայաստանի անունից հանդես եկողն է։

Իրականում, այն, ինչ տեղի է ունենում փաշինյանական տարիների Հայաստանում՝ մեր պետության ներքին և արտաքին հարաբերություններում, մեր կյանքում՝ ուղղակի անպատկերացնելի է։

Անպատկերացնելի է, որ անձնական վրեժի թույնով լցված մեկը կարող էր գալ, զանգվածների ուղեղները լվանալ, իր զրո կետից զրոյացնել պետության և ազգի տասնամյակների կառուցածը, ստեղծածը և դեռ՝ հոխորտալ ու շարունակել։ Իսկ ավելի անպատկերացնելին այն է, որ այդքանից հետո սույնը դեռ հանդուրժվում է, դեռ ազգովի դուրս չենք գալիս, որ մաքրենք-սրբենք մեր ճակատի խարանը։

Հեղինակ՝ Ա․Ե․

Աղբյուր` Փաստինֆո