Փաստ ինֆո

Աշխատատեղերի թիվը Հայաստանում ավելացել է, մենք տեսնում ենք աճ համարյա բոլոր ոլորտներում։ Այս մասին լրագրողների հետ զրույցում ասաց Էկոնոմիկայի նախարար Վահան Քերոբյանը։

Նրա խոսքով՝ նոր ընկերություններ են հիմնվել, հաստիքներ են ավելացել:

«Մենք տեսնում ենք աճ համարյա բոլոր ոլորտներում: 1-2 ոլորտ կա, որտեղ անկում կա, բայց դա այդքան էլ կարևոր չէ: 642 հազար աշխատատեղ եղել է նախորդ տարվա սեպտեմբեր ամսին, այս տարի 691 հազար է: Այսինքն 49 հազարի կարգի աճ ունենք: Այսպիսի բարձր ցուցանիշ երբևէ չի եղել։ Ամենախոշոր աճը բարձր տեխնոլոգիաների ոլորտում է. որտեղ տարվա սկզբի 16 հազար աշխատողի փոխարեն հիմա այդ ոլորտում կա 24.5 հազար աշխատող »,- ասաց Քերոբյանը՝ հավելելով, որ այս ոլորտում աշխատողների 50 տոկոսից ավելի աճ ունենք, որը շատ լավ է. «Այս ոլորտում բարձր աշխատավարձեր են, միջին աշխատավարձը 1 մլն 150 հազար դրամ է: Ո՞նց կարող է մարդիկ դա չզգան: 50 հազար մարդ, որ մեկ տարի առաջ աշխատանք չուներ, հիմա ունի:

Անդրադառնալով խաղողի մթերման հարցին և գյուղացիների դժգոհություններին՝ Քերոբյանը նշեց, որ խաղողի մթերումների հարցը լուծված է, ամբողջ խաղողը մթերված է, ոչ մի խնդիր չկա:

«Ես գնացել եմ մի քանի անգամ մարզ, իրենք են եկել, բոլոր խպնդիրները լուծված են»,-ասաց նա:

Իսկ թե արդյոք գյուղացիներից այլևս դժգոհություններ չկան, նախարարը նշեց. «Դե հիմա կարող է մարդիկ դժգոհում են, որովհետեւ ցածր գնով է խաղողը մթերվել, բայց այս պահի դրությամբ ամբողջ խաղողը մթերված է»։

Աղբյուր` Փաստինֆո