Փաստ ինֆո

Հայաստանը և Արցախն այսօր գտնվում են ճակատագրական փուլում, մեր հայկական պետությունները դիմագրավում են շատ ծանր մարտահրավերների։ Հրավիրված ասուլիսի ժամանակ հայտարարել է ՀՅԴ ԳՄ ներկայացուցիչ, ԱԺ պատգամավոր Իշխան Սաղաթելյանը:

Նրա դիտարկմամբ՝ այս պայմաններում իրավիճակից դուրս գալու առումով երկու տեսակետ կա հայ հանրության շրջանում:
Ըստ Սաղաթելյանի, մի տեսակետի հեղինակը օրվա իշխանություններն են, որոնք ասում են, թե նոյեմբերի 9-ի կապիտուլիացիայով ավարտված պատերազմն այլևս դատավճիռ է և չկա որևէ ռեսուրս՝ ստեղծված իրավիճակից դուրս գալու համար, և հասարակությանն առաջարկում են նոր կորուստների գնով գնալ ինչ-որ երևակայական խաղաղության հետևից: Երկրորդ տեսակետն էլ պայքարի օրակարգն է, որն առաջարկում են ազգային ուժերը և ժողովուրդը.

«Դա այն է, որ նոյեմբերի 9-ը դատավճիռ չէ, չպետք է հարմարվել ստեղծված իրավիճակին: Մենք առաջարկում ենք համախմբել ողջ ժողովրդի ներուժը, վերականգնել Հայաստան-Արցախ-Սփյուռք եռամիասնությունը, մոբիլիզացնել բոլոր հնարավոր ռեսուրսները և լծվել հայրենիքի անվտանգության պաշտպանությանը»,-ասաց Իշխան Սաղաթելյանը:

Այս առումով նա կարևորեց նաև երեկ Արցախում տեղի ունեցած բազմահազարանոց հանրահավաքը:

Իշխան Սաղաթելյանի խոսքով՝ այն, ինչ երեկ տեղի ունեցավ Արցախում, պատմական իրադարձություն էր, որի ընթացքում Արցախի ժողովուրդը մի քանի կարևոր արձանագրում արեց:

Առաջին՝ Արցախի ժողովուրդը, պետական մարմինները և խորհրդարանական ուժերը մեկ միասնական ճակատով հայտարարեցին, որ Արցախը երբեք չի եղել Ադրբեջանի կազմում և չի լինելու: Արցախցիները շատ հստակ ասացին, որ Արցախն Ադրբեջանին բռնակցելու ցանկացած փորձ անընդունելի է Արցախի ժողովրդի համար և արժանանալու է դիմադրության: Երրորդ կարևոր արձանագրումը, որ երեկ հնչեց Արցախից, դա հետևյալն է, որ Հայաստանի որևէ իշխանություն չունի իրավունք՝ ստորագրել որևէ փաստաթուղթ, որը կսահմանափակի Արցախի ինքնորոշման իրավունքը.

«Արցախից երեկ ուղերձ հղեցին համայն հայությանը՝ շարունակեք սատար կանգել Արցախին և կանգնեք Արցախի կողքին»,-ասաց Սաղաթելյանը:

Աղբյուր` Փաստինֆո