Փաստ ինֆո

Եկած օրվանից Փաշինյանի իշխանությունը ապաշնորհ ձեւով փորձում է կատարել իրենց կողմից նախկինում այդքան փնովված նախկինների բոլոր ծրագրեը ՝ վերագրելով իրեն իբրեւ նոր ծրագիր ստեղծողի»,-«Փաստինֆո»-ի հետ զրույցում այս մասին ասաց Սփյուռքի նախկին փոխնախարար, բանասեր Սերժ Սրապիոնյանը՝ անդրադառնալով հոկտեմբերի 28-31-ը Երեւանում անցկացվող Համաշխարհային հայկական գագաթնաժողովին, որին ի դեպ, մասնակցելուց հրաժարվել են Ամենայն Հայոց կաթողիկոս Ն.Ս.Օ.Տ.Տ.

Գարեգին Բ-ն եւ Մեծի Տանն Կիլիկիո կաթողիկոս Արամ Ա-ն, ինչպես նաեւ Դաշնակցության կառույցները։
«Մինչեւ իրենց չարաբաստիկ իշխանության գալու օրը Հայաստան-Սփյուռք վեց համաժողով էր գումարվել, որոնցից երկուսի կազմակերպմանը, գոնե, ես եղել եմ եւ տեսել եմ, թե ինչպես էր կազմակերպվում՝ մի ամբողջ տարի, ամբողջ նախարարությունը՝ իր 80-82, երբեմն՝ 75 աշխատակիցներով, զբաղված էր համայն աշխարհով սփռված Սփյուռքն ի մի բերելով, ու այդ փորձը գալիս էր դեռ խորհրդային տարիներից, երբ աշխարհաքաղաքական իրադրությունն անհամեմատ ավելի բարդ էր, երբ սառը պատերազմ կար ու ԽՄ-ն դրսի ցանկացած անձի մեջ լրտես ու գործակալ էր տեսնում, բայց խորհրդային հետախուզությունը հասկանում էր, թե ինչ կարող է լինել Սփյուռքի ներուժի համախմբման արդյունքում ու Սփյուռքի մշակութային կապերի կոմիտեն ստեղծվեց, որրի նպատակն էր Սփյուռքի ներուժն օգտագործել, որը շատ երկար ժամանակ իր դրական ու անուրանալի դերակատարությունն ունեցավ ԽՄ-Արեւմուտք հարաբերություններում։ Սրանք տասը տարի դեղին մամուլով ներարկեցին այս ժողովրդի մեջ մի անհեթեթ միտք, թե Սփյուռքի նախարարությունը ստեղծվել է ընդամենը մեկ հոգու համար պաշտոն ապահովելու նպատակով, բայց իրենք, հիմա հենց դա են անում ՝պաշտոններ են մոգոնել իրենց կիսագրագետ մանկլավիկների համար»,-ասաց Սրապիոնյանը՝ շեշտելով, որ դեռ մինչեւ իշխանության գալը ընդդիմության կարգավիճակում նեկայիս իշխանությունը ինչ գործունեությամբ էր զբաղված։

Սփյուռքի նախկին փոխնախարարի համոզմամբ, իշխանության գալով, Նիկոլ Փաշինյանը գտավ ամենակարող քայքայիչին՝ Զարեհ Սինանյանին։

«Գլենդել քաղաքի մեծագույն ողբերգություններից մեկն այն է եղել, որ Սինանյան ազգանունով ինչ-որ մեկը ինչ-որ 6 ամիս զբաղեցրել է քաղաքապետի պաշտոնը, թող գնան ու հարցնեն թե հայերին, թե օտարներին, նրանք կասեն, թե ինչպես է այդ ապաշնորհը պաշտոնավարել։ Նա լավագույն դեպքում կարողանում է փոշիացնել, տարրալուծել բոլոր արժեքները։ Փաշինյանը գտավ ամենակարող քայքայիչի՝ զարեհ Սինանյանին։Նրան բերեց այստեղ, չար լեզուներն աում էին, որ նա ամսական 20-25 հազար դոլար է ստանում պարգեւավճարի եւ աշխատավարձի տեսքով։ Ես 4,5 տարիների ընթացքում հնարավորություն եմ ունեցել կապեր ունենալ Սփյուռքի մեր նշանավոր անձանց, հայկական կառույցների հետ՝ Հայ մարմնամարզական ընդհանուր միության, ՀՕՄ-ի, ՀԲԸՄ-ի լիդերների հետ, նրանց միջեւ հաստատվել էին այնպիսի հարաբերություններ, որոնք փոխկապակցված էին, մարդիկ միմյանց հետ ծրագրեր էին համաձայնեցնում ՝ հանուն հայրենիքի։ Հնարավոր ամեն ինչ արեցին՝ պառակտելու համար, սորոսի մանկլավիկներն առաջին անգամ կիրառեցին մի արտահայտություն, որը վիրավորում էր մեր հայրենակիցներին, ասում էին ՝ Սփյուռքը կթու կով է Հայաստանի համար»,-հիշեց Սրապիոնյանը։

Անդրադառնալով փաստին, որ զույգ կաթողիկոսները չեն մասնակցում այդ գագաթնաժողովին, Սփյուռքի նախկին փոխնախարարն ասաց՝ դա ոչ թե ապտակ, այլ սիլա է կազմակերպիչների համար։ Նրա փոխանցմամբ՝ նախկինում Սփյուռքի համաժողովը նախապատրաստելու համար հատուկ պաշտոնական գրությամբ դիմում էին երկու վեհափառներին՝ Էջմիածին եւ Անթիլիաս, դիմում էին 7-8 ամիս առաջ, նրանց հավանությանն էին ներկայացնում օրակարգը, քննարկում էին առարկությունները։ «Հայկական եկեղեցու եւ հայոց պետականության միջեւ կապ կար։ Այսօր երկու վեհափառները հրաժարվել են մասնակցել այդ համաժողովին, սա ես չէի ասի, թե ապտակ է այն կազմակերպողներին, սա սիլա է, որովհետեւ այն վերաբերմունքը, որ սրանք ունեն հայ եկեղեցու նկատմամբ թուրքից թուրք վերաբերմունք է։ Ես չեմ հիշում, որ թուրքերը երբեւէ հանդուրժող լինեին հայ եկեղեցու եւ հոգեւորականի հանդեպ, սրանք այդ նույն անհանդուրժողականությունն ունեն։ Այդ համաժողովը ինչ-որ ճամարտակություններ է անում, մեղադրում կաթողիկոսներին, որ եւ՛ Գարեգին Բ-ն ՛եւ Արամ Ա-ն հրաժարվել են մասնակցել, բայց նրանք միմոսությունների սովոր մարդիկ չեն, նրանք իրենց առաքելությունը տեսնում են հոտ հովվելու մեջ, որը սրանք քայքայում են»,-ասում է Սրապիոնյանը։

Ինչ վերաբերում է Փաշինյանի հայտարարությանը, թե Հայաստան-Սփյուռք հարաբերությունները բովանդակային, սոցիալ-հոգեբանական փոփոխությունների են ենթարկվում գեոպոլիտիկ իրավիճակի պարտադրանքով, եւ որ այդ փոփոխությունները կապ չունեն ոչ 2018 թվականին Հայաստանում տեղի ունեցած հեղափոխության, ոչ էլ 2020 թվականի 44-օրյա պատերազմի ողբերգության հետ, Սերժ Սրապիոնյանն ասաց․

«Ի՞նչ աշխարհաքաղաքական խնդիր կարող է լինել, երբ դու ավերակում ես քո ամենամեծ հենասյուներից մեկը՝ բանակը։ Ես հիշեցնեմ մի բան, պաշտոնապես չհերքվեց Մովսես Հակոբյանի հայտարարությունը, որ 5 մարտական կորպուս Փաշինյանը վերածեց թղթաբանություն անողների՝ շտաբային կորպուսների եւ կոտրեց բանակի ողնաշարը»։

Նախկին փոխնախարարն անդրադարձավ նաեւ ֆինանսական ու կոռուպցիոն ռիսկերի խնդրին՝ հիշեցնելով, նախկինում գործընթացն իրականացվում էր տենդերով, մինչդեռ հիմա իշխանությունը դոլարային միլիոնների գնումներ է անում մեկ անձից, ընդ որում ՝ նրանից, ով իրենց հարմար է։ Ավելի վաղ մամուլը գրել էր, որ գագաթնաժողովի կազմակերպման եւ անցկացման նպատակով կառավարությունը հատկացրել է 308.9 միլիոն ՀՀ դրամ , գնման գործընթացն իրականացվել է «Հրատապ մեկ անձից» ընթացակարգով։ Ընդ որում, Փաշինյանի իշխանությունը 3,5 անգամ ավելի միջոցներ է ծախսել միջոցառման համար, քան ծախսվել էր Հայաստան-Սփյուռք վերջին համաժողովին՝ 2017 թվականին, եւ ուշագրավ է, որ այն ժամանակ մասնակից երկրների ու հրավիրվածների թիվն ավելին էր, քան հիմա։ 2017-ին Հայաստան էր ժամանել մոտ 1500 սփյուռքահայ՝ աշխարհի 70 երկրից, ու ծախսվել էր էր 85 միլիոն դրամ, մինչդեռ այս տարի հրավիրված է 600 անձ՝ 40 տարբեր երկրներից եւ ծածսվել է 308.9 միլիոն ՀՀ դրամ։

Սերժ Սրապիոնյանը եւս մեկ փաստ ընդգծեց՝ բոլորին կոռուպցիայի մեջ մեղադրող իշխանությունը բառի ուղիղ իմաստով գրպանեց «Հայաստան» համահայկական հիմանդրամի փողերն ու հաշվետվություն չներկայացրեց։

Աղբյուր` Փաստինֆո