Փաստ ինֆո

Ընդդիմադիր «Պատիվ ունեմ» և «Հայաստան» խմբակցությունները սկզբունքային հարցում որևէ տարաձայնություն չունեն: Մենք միասին ճանապարհ ենք անցել, հասկանում ենք, որ այս իրավիճակում համախմբված աշխատանքը շատ կարևոր է: Գուցե տակտիկական հարցերում լինեն այլ մոտեցումներ, բայց վստահ եղեք, որ խորքային տարաձայնություններ չկան: Այս մասին այսօր լրագրողների հետ հանդիպման ժամանակ հայտարարել է «Հայաստան» խմբակցության պատգամավոր Իշխան Սաղաթելյանը:

Ինչ վերաբերում է խորհրդարան չգնալուն՝ Սաղաթելյանն ասաց, որ ընդդիմության որոշումների մեջ ոչինչ չի փոխվել.
«Խորհրդարան գնալու ենք մեր օրակարգով՝ Հայաստանի և Արցախի անվտանգության օրակարգով»,-հավելեց նա:

Իշխան Սաղաթելյանը հայտարարեց, որ ամեն ինչ անելու են, որ այսպես կոչված «խաղաղության պայմանագիրը» չստորագրվի, իսկ եթե հանկարծ ստորագրվի, դրանից հետո կա վավերացման գործընթաց՝ խորհրդարանում, ՍԴ-ում։

«Ես հստակ ասում եմ, որ Արցախի հարցով որևէ փաստաթուղթ, որը կսահմանափակի Արցախի ինքնորոշման իրավունքը, հակասահմանադրական է: Ոտնատակ անել Անկախության հռչակագիրը, դա թշնամու կողքն անցնել է: Եթե անհրաժեշտ լինի, երկրի սահմանադրական կարգը վերականգնելու խնդիր կա դրված: Այսինքն, եթե անհրաժեշտ լինի այդ օրակարգով գնալ խորհրդարան, մենք այդտեղ խնդիր չունենք, կարևորը նպատակն է, արդյունավետությունն է»,-հավելեց նա:

Աղբյուր` Փաստինֆո