Փաստ ինֆո

ՀԱՊԿ-ը բաց տեքստով նշեց՝ Ադրբեջանի հետ հնարավոր պատերազմի դեպքում չի աջակցի: «Փաստինֆո»-ի տաղավարում նման գնահատականով հանդես եկավ միջազգայնագետ Գրիգոր Բալասանյանը:

Միջազգայնագետի դիտարկմամբ՝ խաղաղության պայմանագրի Վաշինգտոնյան տարբերակում Արցախն ընդունվում է Ադրբեջանի տարածքային ամբողջականության մաս և Արցախը պետք է նշանակի ներկայացուցիչ՝ արդեն Ադրբեջանի հետ ներքին բանակցություններ վարելու և կարգավիճակի հարցը որոշելու համար, չնայած Ադրբեջանը բազմիցս հայտարարել է, որ Արցախի բնակչությունն իրենց քաղաքացիներն են և իրենք են որոշելու, նշվում է, որ Արցախը զրո կարգավիճակ է ունենալու Ադրբեջանի կազմում, ինչը նշանակում է, որ արցախահայությանը սպասվում է նույն ճակատագիրը, ինչ թաթարներին, լեզգհիններին, թալիշներչին, այսինքն՝ ոչ մի լավ ապագա: Բալասանյանի խոսքով՝ բնական է, որ Անդրկովկասի համար մեծ պայքար է սկսել, գերտերությունները պայքարում են՝ տարածաշրջանում հաստատվելու համար և, Մոսկվան շատ լավ հասկանում է, որ Վաշինգտոնյան տարբերակն ընդունելու դեպքում կարճ ժամանակ անց ռուս խաղաղապահները ստիպված կլինեն դուրս բերվել, ինչից հետո արցախահայությունը կարտագաղթի, Արցախին կսպառնա այն ճակատագիրը, ինչ՝ Նախիջևանին:

Բալասանյանը ուշադրություն հրավիրեց ՀԱՊԿ խորհրդի արտահերթ նիստում արված Լուկաշենկոյի հայտարարության վրա՝ նշելով, որ Լուկաշենկոն բաց տեքստով ՀՀ ղեկավարին ասաց, որ հայ-ադրբեջանական հակամարտությունն իրենց պետք չէ, և՛ Հայաստանը, և՛ Ադրբեջանն իրենց համար համարվում են բարեկամ երկրներ, պետք է նստել բանակցությունների սեղանի շուրջ, կարճ ժամանակում գտնել խաղաղության պայմանագիր ստորագրելու բանալին, եթե անհրաժեշտ է, դիմել ՌԴ ղեկավարին՝ միջնորդության համար: Բալասանյանի գնահատմամբ՝ տպավորություն է, որ քաղաքական որոշում է կայացվել՝ ԱՊՀ տարածքում չօգտագործելու ՀԱՊԿ-ը՝ ներքին խնդիրների և երկու երկրների միջև առկա խնդիրների կարգավորման համար, եթե անգամ պատերազմական գործողությունների ժամանակ այդ երկրներից մեկը քո դաշնակիցն է: Նրա խոսքով՝ պատերազմի պահից տարածաշրջանը չի սահմանափակվելու միայն հայ-ադրբեջանական բախումներով, ակնհայտ է, որ Իրանը վճռական տրամադրված լինելով մտնելու է այդ պայքարի մեջ: Բալասանյանի խոսքով՝ պետք է հույսը դնել առաջին հերթին մեր ԶՈՒ-երի վրա, նոր սպառազինություն ձեռք բերել, առավելագույնը հույսը դնել հայ-ռուսական պայմանագրերի վրա, պետք է աշխատել մոսկվայի հետ՝ այդ պայմանագրերը վերականգնելու, գործիքակազմը վերջնականապես հասկանալու համար:

«ՀԱՊԿ-ը բաց տեքստով նշեց, որ տարածաշրջանային կոնֆլիկտներում, Ադրբեջանի հետ հնարավոր պատերազմի դեպքում ՀԱՊԿ-ը աջակցություն չի ցուցաբերի Հայաստանին »,- նշեց Բալասանյանը:

Աղբյուր` Փաստինֆո