Փաստ ինֆո

Այսօր՝ հոկտեմբերի 29-ին, Արցախի Հանրապետության Ազգային ժողովի նիստերի դահլիճում տեղի է ունեցել Ստեփանակերտի Մեսրոպ Մաշտոց համալսարանի հիմնադրման 25-ամյակին նվիրված «Գիտության և կրթության դերը պետության զարգացման գործում» թեմայով միջազգային գիտաժողովը:

«Արցախպրես»-ի թղթակցի հաղորդմամբ՝ միջազգային գիտաժողովի մասնակիցները նախ հարգանքի տուրք են մատուցել Արցախյան պատերազմներում նահատակված հայորդիների հիշատակին:

Գիտաժողովի բացմանը՝ Արցախի Հանրապետության Ազգային ժողովի նախագահ Արթուր Թովմասյանը, կարևորելով գիտակրթական ներուժի վերհանումն ու զարգացումը, ինչպես նաև միջազգային գիտական, վերլուծական, կրթական հաստատությունների հետ կապերի ամրապնդումը, փորձի փոխանակումը, խորհրդարանի ղեկավարը նաև շնորհավորել է Մեսրոպ Մաշտոց համալսարանի 25–ամյակը, որի գործունեության հիմքում այդ առաջնահերթություններն են:

«Իր քառորդդարյա գործունեության ընթացքում բուհին հաջողվել է դառնալ Արցախի առաջատար գիտակրթական օջախներից մեկը: Ստեղծման օրից անցնելով մասնագիտական ոլորտների ընդլայնման ու կատարելագործման բարդ ու պատասխանատու ճանապարհ՝ Մեսրոպ Մաշտոց համալսարանը շարունակում է գալիք մարտահրավերներին պատրաստ ու հիմնավոր գիտելիքներով զինված սերունդների կրթադաստիարակչական գործունեությունը»,-ասել է Ա. Թովմասյանը՝ ողջունելով Արցախում միջազգային գիտաժողով կազմակերպելու նախաձեռնությունը:

Մեսրոպ Մաշտոց համալսարանի ռեկտոր, մանկավարժական գիտությունների թեկնածու, պրոֆեսոր Դոնարա Գաբրիելյանը ողջունելով ներկաներին, կարևորել է կրթության դերը ստեղծված իրավիճակում՝ ընդգծելով, որ կրթությունն ու գիտությունը պետության ու տնտեսության զարգացման գրավականն են: Ռեկտորի խոսքով՝ 25-ամյա գործունեության ընթացքում ՄՄՀ-ն թողարկել է այնպիսի մասնագետներ, ովքեր մեծ ներդրում ունեն պետության զարգացման ու կայացման գործում:

ՄՄՀ պրոռեկտոր Ալիսա Բաղդասարյանը մեզ հետ զրույցում նշել է, որ «Անել այն ամենը,ինչը կարող է օգուտ բերել երկրին» կարգախոսով առաջնորդվելով, բուհում շարունակական անց են կացվում գիտաժողովներ, կլոր սեղաններ՝ երկրի առջև ծառացած հիմնախնդիրների շուրջ: Բացի այդ, պարբերաբար կազմակերպվում են միջազգային գիտաժողովներ, որոնց հրավիրվում են նաև գիտնականներ արտերկրից:

«Գիտության և կրթության դերը պետության զարգացման գործում» թեմայով միջազգային գիտաժողովին մասնակցել և զեկուցումներով են հանդես եկել Հայաստանի և Արցախի տարբեր բուհերի դասախոսներ, պրոֆեսորներ, ինչպես նաև գիտնականներ Ռուսաստանի Դաշնությունից, Հարավային Օսեթիայից՝ առցանց ձևաչափով:

Ներկա էին Արցախի Հանրապետության պետական նախարար Արտակ Բեգլարյանը, Մարդու իրավունքների պաշտպան Գեղամ Ստեփանյանը, Կրթության, գիտության, մշակույթի և սպորտի նախարար Անահիտ Հակոբյանը, Արցախի տարբեր բուհերի դասախոսներ:

Գիտաժողովից անմիջապես հետո Մեսրոպ Մաշտոց համալսարանի գրադարանում կազմակերպվել է ցուցահանդես, որտեղ ցուցադրվել են 25 տարիների ընթացքում բուհի հրատարակած աշխատությունները, դասախոսների գիտական աշխատանքները, մենագրություններ, հոդվածների ժողովածուներ:

Աղբյուր` Փաստինֆո