Փաստ ինֆո

Գլենդելի ամենաբանուկ ու ամենաթանկ «Ամերիկանա» կոչվող կենտրոնում մի շարք նախկին պաշտոնյաների, այդ թվում՝ ՀՀ երկրորդ նախագահ Ռոբերտ Քոչարյանի ընտանիքի կողմից բնակարաններ ունենալու վերաբերյալ Արման Բաբաջանյանի հայտնած տեղեկությունները ՀՀ իրավապահների կողմից չեն ստուգվի. Դատախազությունը դրանք անտեսել է

Ինչպես արդեն տեղեկացրել ենք՝ Արման Բաբաջանյանը հայտարարել է, թե «ԱՄՆ պատկան մարմինների խնդրանքով հանդիպման ժամանակ պարզ դարձավ, օրինակ, որ Գլենդելի ամենաբանուկ և ամենաթանկ «Ամերիկանա» կոչվող կենտրոնում հայաստանցի նախկին պաշտոնյաները՝ այդ թվում Ռոբերտ Քոչարյանի ընտանիքը, մի քանի միլիոն դոլարի հասնող բնակարանների սեփականատերեր են, որոնց մեծ մասը տրված է վարձակալությամբ»։

ՀՀ երկրորդ նախագահի կրտսեր որդին՝ Լևոն Քոչարյանը ֆեյսբուքյան գրառմամբ հերքել էր Բաբաջանյանին՝ հրավիրելով նաև իրավպահների ուշադրությունը։

«Մի քանի անգամ սա հերքել ենք, հիմա էլ հատուկ դասալիքի համար եմ կրկնում, ԱՄՆ-ում որևէ տուն, բնակարան, անշարժ գույք չունենք և երբեք էլ չենք ունեցել, ոչ ես, ոչ կինս, ոչ որևէ ուրիշ մեկը մեր ընտանիքից կամ թեկուզ միջնորդավորված ինչ-որ մեկը:

ԱՄն դեսպանատունը, կարծում եմ, պետք է պարզաբանում պահանջի սույն անձից, քանի որ իր կեղծիքին արժանահավատություն տալու համար, նա հղում է անում ԱՄՆ ինչ-որ պատկան մարմիններին, ովքեր, իբր, խնդրել են հանդիպել իրեն ու մի բան էլ սուտ բան ասել:

ՀՀ Ազգային անվտանգության ծառայությանը, ՀՀ Գլխավոր դատախազությանը առաջարկում եմ զբաղվել այս ստախոսով, հարցումներ անել ԱՄՆ և տեղեկացնել հանրությանը», - հայտարարել է Լեւոն Քոչարյանը։

Նկատի ունենալով նաև, որ տվյալ պարագայում խոսք կարող է գնալ նաեւ ապօրինի գույքի ձեռք բերման մասին՝ «Փաստինֆո»-ն փորձեց ՀՀ գլխավոր դատախազությունից ճշտել, թե արդյո՞ք հայտարարությունների վերաբերյալ ուսումնասիրություններ արվում են, թե ոչ, պարզվեց՝ ոչ։ Այս պահին ընթացք տրված չէ։

Այլ խոսքով՝ այս պահին հայտարարությունները չեն ուսումնասիրվում, ինչը հիմք է տալիս ենթադրելու, որ իրավապահները եւս կասկածներ ունեն ինֆորացիայի հավաստիության վերաբերյալ, գուցե նաեւ համոզված են, որ Քոչարյանները գույք ձեռք չեն բերել, հետեւապես ընթացք չեն տալիս, որպեսզի չհերքեն Բաբաջանյանին։ Այսինքն՝ ցանկանում են, որ կեղծ լուրերը շրջանառվեն հասարակության մեջ՝ ծառայեցնելով իրենց սեւ գործին։

Աղբյուր` Փաստինֆո