Փաստ ինֆո

Պետք է տարբերակենք ՀՀ իշխանությունը ՀՀ ժողովրդից։ ՌԴ նախագահը հստակ տարբերակում է դրանց միջև՝ նշելով, որ գնդակը հայ ժողովրդի դաշտում է, և այո, գնդակն արցախահայության դաշտում է։ Արցախահայությունը պետք է համախմբվի և իր դիրքորոշումը հստակ ասի։ Պետք է բոլորս հստակ ասենք՝ Արցախի ժողովրդի ինքնորոշման իրավունքին տեր ենք, թե չէ։ Այդ մասին հայ-ռուսական միջազգային «Լազարևյան ակումբ»-ի 5-րդ նիստից հետո լրագրողների հետ ճեպազրույցում ասել է ՀՀԿ խոսնակ Էդուարդ Շարմազանովը։

Անդրադառնալով ստեղծված իրավիճակը նախկինների վրա բարդելու ներկա իշխանության կողմից հնչող մեղադրանքներին՝ Շարմազանովը շեշտեց.

«Ապրիլյան պատերազմի արդյունքը Սանկտ Պետերբուրգն ու Վիեննան են, որոնք հայկական դիվանագիտության հաղթանակն են։ Նիկոլ Փաշինյանն իր ամբողջ քաղաքական տոհմով, իր կապիտուլայնտերով դրա 1 տոկոսը չի կարող բերել։ Թե տղա է, թող բերի։

Հիշեցնեմ 2016 թ. հոկտեմբերի 7-ին Իլհամ Ալիևի արած ընդամենը երկու հայտարարություն. «Առաջին. փակ դռների հետևում Ադրբեջանից պահանջում են ճանաչել ԼՂ անկախությունը, 2-րդ՝ ՀՀ-ն ունի միջազգային հզոր հովանավորներ (նկատի ուներ Ռուսաստանը) և անսահմանափակ քանակությամբ զենք-զինամթերք։ Փաշինյանի օրոք չկա ոչ հովանավոր, ոչ իշխանություն։ Նա դարձել է ֆուտբոլի ծակ գնդակ Ալիևի և Էրդողանի ձեռքում»։

Շարմազանովը նաև շեշտեց, որ Փաշինյանի քաղաքականությունը՝ բոլորին խոստումների տալու գիծը, ծանր հետևանքներ է ունենալու մեր ժողովրդի ու երկրի համար.

«Մեր անվտանգության, մեր երեխեքի, Արցախի հաշվին էդ մարդը բազար է անում։ Սա «շպագատ» է նստելու, բոլորին խոստումներ է տվել։ Ամենավտանգավորը գիտե՞ք որն է. իր խոստումները չիրականացնելու մեկ տարբերակ ունի՝ Ադրբեջանի հետ պայմանավորված պատերազմ»։

Աղբյուր` Փաստինֆո