Փաստ ինֆո

Մեզ համար ընդունելի են ՌԴ առաջարկները, իսկ Վաշինգտոնինը՝ ոչ: Լրագրողների հետ զրույցում հայտարարել է «Հայաստան» խմբակցության ղեկավար Սեյրան Օհանյանը.

«Մեզ համար ընդունելի է Ռուսաստանի հայտարարությունները, որոնք ասում են՝ պետք է երկխոսություն սկսել Ադրբեջանի հետ, Ռուսաստան-Հայաստան-Ադրբեջան ֆորմատը ամենանորմալ ֆորմատն է այսօր, որպեսզի բանակցային գործընթացը շարունակվի։ Անընդունելի է Վաշինգտոնյան փաստաթուղթը, որի մեջ, Ադրբեջանի տարածքային ամբողջականությունը ճանաչելով, միանգամից մեծ քար է նետվում Արցախի ճակատագրի վրա, և Արցախը մնում է Ադրբեջանի կազմում։ Այստեղից էլ վտանգ կա, որ Արցախը կարող է հայաթափվել և զրկվել հազարամյակների իրավունքից, որ ինքն ունեցել է իր պատմական տարածաշրջանում»,-մեկնաբանեց Օհանյանը:

Նրա տպավորությամբ՝ Ռուսաստանի տեսակետը հույսեր է արթնացնում, որ Արցախի խնդրի լուծմանը կարող ենք անդրադառնալ հետագայում.

«Արևմտյան ոչ մի երկիր, բացի դիտորդական առաքելությունից, անվտանգային ոչ մի խնդիր չի լուծելու։ Այսօր մենք ՌԴ-ի հետ գտնվում ենք Եվրասիայի կենտրոնում և անվտանգային ու մյուս խնդիրները պետք է միասին լուծենք։ Տարածաշրջանում Արևմուտքը ունի իր ներկայացուցիչը՝ Թուրքիան, մենք պետք է ընտրենք, թե ո՞ր երկրի հետ համագործակցենք և որտեղ գտնվենք»,- ասաց Սեյրան Օհանյանը։

Աղբյուր` Փաստինֆո