Փաստ ինֆո

Այսօրվա դրությամբ «Ամերիաբանկի» մանրածախ հաճախորդների բազան գերազանցում է 370 հազարը։  Այս մասին այսօր Ամերիա բիզնես թվային հարթակի հնարավորություններին ու հեռանկարներին նվիրված ասուլիսում հայտնեց Ամերիաբանկի մանրածախ բանկինգի տնօրեն Արման Բարսեղյանը։

Ներկայացվեց Ամերիա Բիզնես թվային հարթակը, որը համալրվել է ԱՁ-ն օնլայն գրանցելու նոր ծառայությամբ: Բանկի մասնագետներն անդրադարձան նաև թվային տրանսֆորմացիայի շրջանակում իրականացված մի շարք քայլերի, հաճախորդների համար ստեղծված հնարավորություններին ու առաջիկա զարգացումներին:

«Շատ կարևոր է, որ քարտային գործարքներով խթանվել են անկանխիկ գործարքները: Շարունակվել է պորտֆելի որակի բարելավումը, այսինքն` ժամկետանց, խնդրահարույց վարկերի տեսակարար կշիռը բավականին նվազել է:  2019թ. մենք մոտավորապես 1,2 մլն գործարք ենք իրականացրել ինտերնետ-բանկ համակարգով, այս տարի կանխատեսվող թիվը մոտ 10 միլիոն  է», – նշեց Արման Բարսեղյանը:

Ամերիաբանկի Բիզնես բանկինգի վարչության ղեկավար Կարեն Քարամյանը նշեց, որ գնահատելով հաճախորդների կարիքները, ինչպես նաև ժամանակակից բիզնեսի պահանջները, դեռևս 2018 թվականին որոշում կայացվեց ստեղծել ընդհանրական հարթակ, որտեղ գործարարը կարող է գտնել իրեն հետաքրքրող ծառայությունները։

«Առաջին ծառայությունը, որը գործարկվեց 2018 թվականին, ավտոմատ հաստատվող օնլայն վարկերն են։ Ծառայությունը աննախադեպ էր 2018-ին, մինչև օրս էլ շարունակում է աննախադեպ մնալ»,- ասաց նա։

Համակարգ մուտք գործելու համար պետք է ստեղծել անձնական էջ: Ընդամենը պետք է լրացնել անուն-ազգանուն, էլ. փոստի հասցե դաշտերն ու սահմանել գաղտնաբառ: Այնուհետև էլեկտրոնային փոստին ուղարկված հղումով հաճախորդն անցնում է ու ակտիվացնում գրանցումը:

Ամերիաբանկի Նախագծերի մենեջեր Արփինե Հարությունյանն ասաց, որ  Ամերիա Բիզնես հարթակում որևէ ծառայության համար դիմելիս պետք է ունենալ անձնական էջ։ նա ներկայացրեց հարթակում բիզնեսի գրանցման կարգը, որը տևում է ընդամենը 20 րոպե:

«Բիզնեսի գրանցման համար անհրաժեշտ է անձնագիր կամ նույնականացման քարտ, սոցքարտ կամ սոցքարտ չունենալու մասին տեղեկանք և տպիչ սարքի հասանեիություն՝ տեսախցիկով հեռախոս կամ համակարգիչ: Հաճախորդը լրացնում է հեռախոսահամարի դաշտը, ապա ստանում ծածկագիր, որը մուտքագրում է համակարգ, լրացնում է պահանջվող անձնական տվյալները և տալիս համաձայնություն՝ հարցումներ կատարելու: Այնուհետև հաճախորդը լրացնում է բիզնեսի գործունեության ոլորտը: Այնուհետև պետք է ներբեռնել գրանցման դիմումը, ստորագրել, սկանավորել և կցել համակարգին»:

Ի դեպ, Ամերիա Բիզնես հարթակը շուտով համալրվելու է նաև ՍՊԸ գրանցելու հնարավորությամբ:

Մանրամաները՝ տեսանյութում։

Աղբյուր` Փաստինֆո