Փաստ ինֆո

Հիմարություն է կարծել, թե երկու ամսվա մեջ սահմանների դելիմիտացիա կարելի է անել, սա հերթական սուտն է: «Փաստինֆո»-ի հետ զրույցում հայտարարել է Դեմոկրատական կուսակցության նախագահ Արամ Սարգսյանը:

Հիշեցնենք, որ երեկ խորհրդարանում Նիկոլ Փաշինյանը հայտարարել էր, թե ցանկանում է, որ խաղաղության պայմանագիրը կնքվի մինչև տարեվերջ, նաև հույս էր հայտնել, որ մինչև խաղաղության պայմանագրի ստորագրումը ավարտված կլինեն նաև դելիմիտացիայի աշխատանքները: Փաշինյանի խոսքով՝ գործընթացը տեղի է ունենալու 1991թ սահմանների հիման վրա։

Մեզ հետ զրույցում Արամ Սարգսյանը նախ շեշտում է, որ Հայաստանն ու Ադրբեջանը չեն կարող խաղաղության պայմանագիր կնքել, քանի որ Հայաստանը երբևէ Ադրբեջանին պատերազմ չի հայտարարել,այլ կարող են ընդամենը փոխադարձ հարաբերությունների մասին փաստաթուղթ ստորագրել:

Քաղաքական գործիչը նաև անիրատեսական է համարում, որ մինչև տարեվերջ երկրներն ավարտեն սահմանագծման և սահմանազատման գործընթացը:

Արամ Սարգսյանը հիշեցնում է, որ Հայաստանը մինչ օրս դեմարկացիան չի ավարտել Վրաստանի հետ, որը բարեկամ երկիր է, ուստի առավել ևս թշնամի երկիր Ադրբեջանի հետ չի կարող այդքան կարճ ժամանակում սահմանագծում անել.

«Սա կա՛մ խուճապի արդյունք է՝ իրենց սեփական կաշին փրկելու համար, որովհետև խոստումներ են տվել Ադրբեջանին և Թուրքիային, կա՛մ էլ դիլետանտության և անգրագիտության արտահայտություն է: Բոլորը հասկանում են, որ դեմարկացիայի և դելիմիտացիայի գործընթացը հնարավոր չէ երկու ամսվա ընթացաքում իրականացնել: Բացի սա, երբ պարոնը (Նիկոլ Փաշինյանը.- խմբ) հայտարարում է, որ սահմանազատման գործընթացը պետք է արվի 1991թ-ի սահմանների համապատասխան, որով, իբր, երկրները ճանաչել են իրար տարածքային ամբողջականությունը, սա էլ է սուտ: Նախ, 1991թ-ին ԱՊՀ երկրների գագաթնաժողովում փաստաթղթի ստորագրման պահին Արցախն արդեն իսկ օրինական ճանապարհով դուրս էր եկել Սդրբեջանի կազմից և նրա սահմանների մեջ չէր, ուստի սուտը ստի հետևից է ասում պարոնը: Այսինքն, այս ամենն ուղղված է իր այն կողմնակիցներին, որոնք գրագիտություն չունեն, չեն տրապետում իրողությանը»,-ասաց Արամ Սարգսյանը:

Ընդ որում, զրուցակիցը փաստում է, որ Ադրբեջանը սկզբում ընդհանրապես չի էլ ստորագրել ԱՊՀ փաստաթուղթը, ընդամենը համաձայնվել է դրա ինստրուկցիայի հետ, իսկ պայմանագիրը ստորագրել է մի քանի տարի անց՝ սրանով ցույց տալով, որ Արցախի հարցը լուծված չէ իր համար:

Արամ Սարգսյանը նաև հիշեցնում է՝ հայկական կողմը վերապահում է արել այդ պայմանագիրը ստորագրելիս, որ ԱՊՀ երկրների միության մեջ կարող են ընդգրկվել նաև ինքնավար մարզերը, հանրապետությունները, որոնք ուզում են դուրս գալ ԽՍՀՄ-ից և ցանկանում են պահել իավունք իրենց կարգավիճակը, ինչպես արեց Արցախը.

«Այնպես որ, այդ ժամանակ Արցախն արդեն սուբյեկտ էր՝ չճանաչված, բայց սուբյեկտ էր, ինչն էլ բերեց նրան, որ Ադրբեջանն այդ պահին հրաժարվեց ստորագրել փաստաթութը: Արցախն Ադրբեջանից անկախացել է իր տարածքով, իր բնակչությամբ, իր սեփական իշխանությամբ, սրանք բոլորը պետական էլեմենտներ են, որոնք նրան տրվել են՝ ԽՍՀՄ օրենսդրությամբ: Արցախն անկախանալով չի խախտել Ադրբեջանի տարածքային ամբողջականությունը, չի եղել անկախ Ադրբեջանի կազմում, Արցախը միջազգային նորմերի համապատասխան է անկախացել Ադրբեջանից, ուստի դելիմիտացիայի և դեմարկացիայի հարցը պետք է լինի Արցախից զատ»,-ասաց ԱրամՍարգսյանը:

Քաղաքական գործիչը նաև անընդունելի է համարում դելիմիտացիայի իրականացումը այն պայմաններում, երբ թշնամին ներխուժել է մեր սուվերեն տարածք.

«Ադրբեջանցիները մեր տարածքում, իրենց ասելով, արդեն 170 ք/կմ գրավել են և այս պայմաններում իրենք պատրաստվում են շարունակել բանակցությունները, չգիտեմ՝ իրենք ընդհանրապես արժանապատվությունը գիտե՞ն ինչ է, կամ ունե՞ն այդպիսի բան, ինչպե՞ս կարելի է բանակցություններ շարունակել թշնամու հետ, որը չի պատրաստվում դուրս գալ քո սուվերեն տարածքից, անհնար է պատկերացնել»,-ասում է Արամ Սարգսյանը:

Աղբյուր` Փաստինֆո