Փաստ ինֆո

Արցախի Ազգային ժողովը ժամանակ առ ժամանակ հանդես է գալիս հայտարարություններով, որոնցում հստակ նշվում են Արցախի համար կարմիր գծերը, բայց Հայաստանի օրվա իշխանությունները դրանց, չգիտես ինչու, ականջալուր չեն լինում։ Տեսնելով, թե ինչպես են ՀՀ իշխանությունները շարունակում տրորել բազմիցս հնչեցված կարմիր գծերը, այս անգամ փորձելու ենք Արցախի համար անթույլատրելի համար քայլերը, որոշումները նրանց լսելի դարձնել հանրահավաքով։

Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը՝ անդրադառնալով հոկտեմբերի 30-ին նախատեսված հանրահավաքին, «Հանրահավաքի նպատակն է՝ ցույց տալ, թե ինչ է ուզում Արցախի ժողովուրդը։ Հաշվի առնելով շրջանառվող լուրերը, որոնք, ինչու չէ, նաև որոշակիորեն փաստարկված են, հասկանալի է, որ սեղանի վրա կա փաստաթուղթ, որը Հայաստանի իշխանությունները հնարավոր է՝ ստորագրեն։

Քանի որ այն չի բխում արցախահայության և, առհասարակ, հայության շահերից, շատ կարևոր է, որ յուրաքանչյուր արցախցի հստակ արտահայտի իր դիրքորոշումը և թույլ չտա, որ որևէ իշխանություն իրեն իրավունք չվերապահի իր անունից ստորագրել փաստաթուղթ, որով Արցախը կբռնակցվի Ադրբեջանին»,-շեշտեց Գալստյանը։

Արցախի ԱԺ պատգամավորը համոզված է, որ ստեղծված իրավիճակում չի կարող լինել Արցախում բնակվող մեկ մարդ անգամ, որ անտարբեր գտնվի և իր դիրքորոշումը չարտահայտի։

Գալստյանը վերահաստատեց՝ անկախ նրանից, թե Հայաստանում ով կլինի իշխանության, Արցախի ժողովուրդը թույլ չի տալու, որ Արցախը բռնակցվի Ադրբեջանին։

«Եթե նախատեսվող հանրահավաքն էլ արդյունք չտա, այսինքն՝ ՀՀ իշխանությունները չհրաժարվեն այդ ծրագրից, ապա կհետևեն ուրիշ քայլեր»,-ասաց Արցախի ԱԺ պատգամավորը։

Հանրահավաքի օրը՝ հոկտեմբերի 30-ին նախատեսված ԱԺ արտահերթ նիստին ընդունվելիք հայտարարության տեքստը, Գալստյանի խոսքով, դեռ մշակվում է։

Հիշեցնենք, որ Արցախի խորհրդարանի բոլոր ուժերի նախաձեռնությամբ հոկտեմբերի 30-ին ժամը 15։00-ին տեղի կունենա արտահերթ նիստ և հանրահավաք՝ նվիրված Արցախի Հանրապետության արժանապատիվ ու անվտանգ ապագային։

Աղբյուր` Փաստինֆո