Փաստ ինֆո

«Այդ հայտարարությունը շարունակական պոպուլիզմի դրսեւորումն է, որից ավելին այս իշխանությունը չի էլ կարող անել։ Իշխանությունը զավթածները հասկանում են, որ երկրում բավականաչափ ստվար զանգված կա, որը այդ էժան, պրիմիտիվ հայտարարություններից հուզվում է ՝ դրա անունը դնենք դպրոց, ասֆալտ, թե այլ բան։ Բոլոր պարագաներում, իհարկե, դպրոցը լավ է, ասֆալտը՝ վատ չէ, բայց Հայաստանի առջեւ այսօր ծառացած բոլոր խնդիրների շարքում կա գերակա խնդիրը՝ անվտանգության խնդիրը»,- «Փաստինֆո»-ի հետ զրույցում ասաց տնտեսագետ, պրոֆեսոր Վարդան Բոստանջյանը՝ անդրադառնալով Նիկոլ Փաշինյանի այսօր արած հայտարարությանը այն մասին, թե պետական պարտքով դպրոցներ են կառուցվում։

Բոստանջյանը ընդգծեց՝ անկախ աշխարհի ուժեղների, իբրեւ թե հորդորներից, թշնամին դուրս չի գալիս մեր սուվերեն տարածքներից։ Պրոֆեսորն ասում է՝ սա է այսօր երկրի առջեւ ծառացած գլխավոր խնդիրը, իսկ ինչ վերաբերում է արտաքին պարտքի ավելացմանը, Բոստանջյանը շեշտում է՝ գումարները, որոնք տրվում են Հայաստանին Արեւմուտքի համար աննշան է, ուստի նրանք ՀՀ իշխանությանն ասում են՝ վերցրեք, որքան ցանկանում եք։

«Միայն Գերմանիան էներգետիկայի ոլորտում քաղաքացիներին կոմպենսացնելու համար 200 միլիարդ եվրո է նետել շրջանառություն ու եթե Հայաստանին մի 100 միլիոն, 200 միլիոն անգամ մեկ միլիարդ տալիս են, դա նրանց համար мизер է։ Արեւմուտքին չի հետաքրքրում, թե հետագայում ինչպես են այդ գումարները վերադարձվելու, ով է գալու, ինչպես է լուծելու խնդիրները, իսկ գործող ղեկավարությունը անում է բացառապես այն, որ կիսագրագետ կամ անգրագետ զանգվածի համար ուրախալի լինի»,-ասում է Բոստանջյանը:

Նիկոլ Փաշինյանը այսօր կառավարության նիստին հայտարարել է, թե մինչև 2026 թվականի սեպտեմբերի 1-ը կառավարությունը նախատեսում է կառուցել և շահագործման հանձնել 337 դպրոց և 521 մանկապարտեզ։ «Իհարկե, մենք շատ շնորհակալ ենք Ասիական զարգացման բանկին և մեր մյուս ֆինանսական գործընկերներին, բայց իրենց միջոցներով կառուցվող դպրոցներն էլ է կառավարության մասնաբաժնով կառուցվում։ Այն, որ ասում են՝ վայ, պետական պարտքն ավելացավ, սա պետական պարտքի ավելացման մի շատ լավ ու դասական օրինակ է, երբ պետական պարտքով կառուցում ենք դպրոցներ: Այդ մասը կառավարությունը նույնպես վճարում է, սպասարկում է պարտքը: Այսինքն, պարտք ենք վերցնում, հետո վերադարձնում ենք»,-ասել է նա:

«Մեզ նման երկրի համար այսօր ամենակարեւորը անվտանգության խնդիրն է, եղածը պաշտպանելու խնդիրն է, դու դա չես պաշտպանում, դպրոցը կառուցում ես, որ այնտեղ հաճախողները վաղը հեռանա՞ն երկրից։ Այս ամենի մասին շատ բազմաշերտ կարելի է խոսել, բայց եթե կարճ ասենք, իրավիճակը հետեւյալն է՝ այսօր բոլոր կարեւոր, խիստ կարեւոր խնդիրները օտարացված են։ Ընդհուպ, մենք հասել ենք մի վիճակի, երբ Հայաստանի Հանրապետությանը այս 30 տարիների ընթացքում միշտ պաշտպանող մարդու, Զատուլինի մուտքը արգելում են, որին ոչ մի արտաքին կաշառք չկարողացավ գրավել։ Սա նշանակում է, որ կատարվում է հանձնարարություն, եւ վերջ»,-շարունակեց Բոստանջյանը։

Խոսելով իբրեւ թե տնտեսական ակտիվության մասին, ինչի մասին շարունակ բարձրագոչ հայտարարություններ է անում էկոնոմիկայի նախարար Քերոբյանը, Բոստանջյանն ասաց, որ հանգամանքների բերումով այսօր Հայաստան են այցելու օտարերկրացիներ, որոնց մի մասն իրենց ֆինանսները ուղղակի փախցնում է սանկցիաներից, իսկ Հայաստանի կառավարությունը դա վերագրում է իրեն։

«Փոքր երկրի համար դա մեծ գումար է, որը, իբր, բերել է տնտեսական աշխուժացման, բայց իրականում դրանից պետք է զգուշանալ, որովհետեւ ուրախանում են, երբ տնտեսական աշխուժությունն ինքնուրույն են ստեղծում», եզրափակեց Բոստանջյանը։

Հավելենք, որ 2022 թվականի տարվա վերջի դրությամբ պետական պարտքը կկազմի 4 տրլն 490 մլրդ դրամ։ Մեկ տարվա ընթացքում աճը կկազմի 60 մլրդ դրամ կամ 1.3%: Այս թվերն արտացոլված են 2023 թվականի պետական բյուջեում: Արդեն 2023 թվականին կանխատեսվում է, որ պետական պարտքը կավելանա ևս 389 մլրդ դրամով կամ 8.7%-ով: Նկատենք, որ իշխանության գալուց հետո Փաշինյանը հայտարարում էր, թե վարելու են պարտքի նվազեցման քաղաքականություն։

Աղբյուր` Փաստինֆո