Փաստ ինֆո

Սոչիում սպասվող եռակողմ հանդիպման ֆոնին Հայաստանի իշխանությունների կողմից Ռուսաստանի մեդիա եւ քաղաքական դաշտի երկու ներկայացուցիչների մուտքը Հայաստան անցանկալի է ճանաչելը, բնականաբար, Ռուսաստանում չի կարող դիտարկվել որպես բարեկամական։ «Փաստինֆո»-ի հետ զրույցում այս մասին ասաց քաղաքագետ Ալեքսանդր Մարկարովը՝ անդրադառնալով ՌԴ պետդումայի պատգամավոր Կոնստանտին Զատուլինի եւ լրագրոող Մարգարիտա Սիմոնյանի՝ Հայաստան մուտքի արգելքի վերաբերյալ ՀՀ իշխանությունների որոշմանը։

«Սպասվում է եռակողմ հանդիպումը, թեեւ կան կասկածներ՝ կընդունե՞ն արդյոք հրավերը մեր հարեւանները։ Խնդիրը նրանում է, թե այդ հանդիպմանը ինչ բնույթի քնարկում կծավալվի եւ արդյո՞ք դրա արդյունքում կլինի համապատասխան հայտարարություն, բացի այն, որ կողմերը շարունակելու են հետեւել սկզբունքներին, որոնք ամրագրված են նոյեմբերի 9-ի եւ հունվարի 11-ի փաստաթղթերում, որտեղ կարեւորվում է ենթակառուցվածքների ապաշրջափակումը։ Պարզ է , որ նման հանդիպումից առաջ Ռուսաստանի մեդիա եւ քաղաքական դաշտի երկու ներկայացուցիչների մուտքը Հայաստան անցանկալի ճանաչելը, համենայնդեպս, նրանցից մեկը նամակ է ստացել այդ մասին, իսկ մյուսը հայտարարել է, դժվար թե Ռուսաստանում դիտարկվի որպես բարեկամական, մանավանդ, որ Զատուլինը երկար ժամանակ շատ լուրջ ներդրում է ունեցել եւ ունի հայ-ռուսական հարաբերությունների զարգացման գործում»,-ասաց Մարկարովը ։

Քաղաքագետն ընդգծեց, որ Զատուլինը եղել է ՌԴ պետդումայի այն պատգամավորը, որը նախաձեռնել եւ, ըստ էության, կյանքի է կոչել Հայոց Ցեղասպանության ճանաչման փաստաթուղթը։ «Նա երկար ժամանակ հանդես է եկել որպես Արցախի ինքնորոշման իրավունքի ջատագով եւ մեկ անգամ չէ, որ մասնակցել է Արցախում տեղի ունեցող ընտրություններին որպես դիտորդ՝ արձանագրելով դրանց ժողովրդավարական բնույթը։ Այսինքն, այս անձի գործունեությունը՝ ուղղված հայ-ռուսական հարաբերությունների զարգացմանը, հայտնի է։ Կարելի է չհամաձայնել որոշ հայտարարությունների հետ, բայց հաշվի առնելով կարծիքների բազմազանությունը , դա նորմալ է, որովհետեւ մարդը կարող է ներկայացնել այն կարծիքը, որին հավատում է եւ այն, որ Զատուլինը հավատարիմ է մնում ե՛ւ հայ-ռուսական հարաբերությունների զարգացմանը, ե՛ւ հայ ժողովրդի շահերի պաշտպանությանը, միանշանակ է »-շեշտեց քաղաքագետը։

Նշենք, որ Զատուլինից բացի ռուսական RT հեռուստաալիքի ղեկավար, մեդիա մենեջեր Մարգարիտա Սիմոնյանի մուտքը Հայաստանի Հանրապետություն եւս արգելվել է։ Այս մասին նա հայտնել է իր թելեգրամյան ալիքում։

Ավելի վաղ հայտնի էր դարձել, որ Հայաստանը արգելել է ՌԴ Պետդումայի ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը Հայաստանի Հանրապետություն։ Ուշագրավ է, որ Հայաստանը դիվանագիտական խողովակներով բողքի նոտա չի հղել ՌԴ Պետդումայի պատգամավոր Կոնստանտին Զատուլինի ելույթների, գործունեության հետ կապված, և Զատուլինը պաշտոնապես persona non grata չի ճանաչվել: Իրավասու մարմինները, որոնք կարող էին այդ գործընթացն իրականացնել՝ ԱԱԾ-ն և ՀՀ ԱԳՆ-ն լռում են, իսկ Զատուլինին ՀՀ ԱԺ արտաքին կապերի վարչության պետ Տիգան Սեյրանյանի ստորագրությամբ ուղարկված նամակի մեջ նշվում է․«ՀՀ Ազգային ժողովի ղեկավարության անունից հայտնում ենք, որ, ցավոք, Հայաստանի Հանրապետության մասին վերջին շրջանի Ձեր հայտարարությունները վնասում են մեր պետությունների բարեկամական և դաշնակցային հարաբերությունների զարգացմանը։

Սրանով պայմանավորված, ապագայում Ձեր այցը Հայաստանի Հանրապետություն համարվում է անցանկալի»։

Ալեքսանդր Մարկարովն այս առնչությամբ նկատեց՝ բուն ընթացակարգի հետ կապված խնդիրը իրավաբանության դաշտից է։ Աշխարհում կան դեպքեր, երբ գործընթացը ներքին գործերի նախարարությունն է անում, կան դեպքեր, երբ ԱԳՆ-ն կամ հատուկ ծառայությունները։

Աղբյուր` Փաստինֆո