Փաստ ինֆո

«Փաստինֆո»-ի հաղորդմամբ՝  Նիկոլ Փաշինյանը ԱԺ-ում հաստատեց, որ մասնակցելու է հոկտեմբերի 31-ին Սոչիում կայանալիք եռակողմ հանդիպմանը

«ՌԴ նախագահի կողից կա հրավեր՝ հոկտեմբերի 31-ին Սոչիում անցկացնել եռակողմ հանդիպում, ես հաստատել եմ իմ մասնակցությունը: Անկեղծ ասած, տեղեկություն չունեմ` ադրբեջանական կողմը հաստատել է, թե ոչ»,-ասաց Փաշինյանը:
Թե ինչ ակնկալիքներ ունի հանդիպումից՝ Փաշինյանը նշեց.

«Կարծում եմ՝ ամենակարևոր ակնկալիքները կապված են այս ընթացքում տեղի ունեցած իրադարձությունների գնահատականին և մեկնաբանությանը։ Ավելի հետ կարող եմ գնալ և հասնել մինչև 2020 թ․-ի նոյեմբերի 9-ի եռակողմ հայտարարություն։ Կարծում եմ՝ շատ կուտակված հարցեր կան, որոնց վերաբերյալ որոշակի մտքերի փոխանակում, պարզաբանումներ, հարցադրումներ պետք է հնչեն, և այդ հարցերի օրակարգը ձեզ հայտնի է՝ սկսած ԼՂ-ում կայունության և անվտանգության ապահովման գործով»,-ասաց Փաշինյանը:

Նա հիշեցրեց, որ այս տարվա մարտին ադրբեջանական ԶՈՒ-ն ներխուժել էին ՌԴ խաղաղապահների պատասխանատվության գոտի և նշեց, որ անհասկանալի է ռուս խաղաղապահների կողմից արձագանքի բացակայությունը:

Նիկոլ Փաշինյանի խոսքով՝ չնայած եռակողմ աշխատանքային խմբի ձեռք բերված պայմանավորվածություններին՝ ինչ-որ միջանցքների մասին հայտարարություններ են հնչում՝ ոչ միայն ադրբեջանական կողմից, այլ նաև Ռուսաստանում էլ կան մարդիկ, ովքեր փորձում են այդ նարատիվը զարգացնել՝ ի հեճուկս ՌԴ նախագահի կողմից արված հայտարարությունների , ստորագրված փաստաթղթերի, ինչպես նաև ՌԴ ԱԳՆ-ի և ՌԴ փոխվարչապետի արած հայտարարությունների:

Աղբյուր` Փաստինֆո