Փաստ ինֆո

«Մենք ցանկացած հանդիպում արժեւորում ենք, առավել եւս, Ռուսաստանի միջնորդությամբ։ Չմոռանանք, որ նոյեմբերի 9-ի հրադադարը եւս կնքվել է Ռուսաստանի միջնորդությամբ։ Մենք կարծում ենք, որ նման հանդիպումները պահանջված են եւ պարբերաբար պետք է տեղի ունենան»,- «Փաստինֆո»-ի հետ զրույցում ասաց Արցախի ԱԳ նախարար Դավիթ Բաբայանը՝ անդրադառնալով Սոչիում հոկտեմբերի 31-ին նախատեսվող եռակողմ հանդիպմանը:

Հիշեցնենք, բրյուսելյան գործընթացին զուգահեռ, վերջին օրերին նաեւ Մոսկվան է ակտիվացել։ Նիկոլ Փաշինյանը այսօր կառավարություն-ԱԺ հարցուպատասխանի ժամանակ հաստատել է իր մասնակցությունը ՌԴ նախագահ Պուտինի հրավերով կայանալիք գագաթնաժողովին, որին ակնկալվում է նաեւ Ադրբեջանի նախագահի մասնակցությունը։ Նա այսօր հայտարարել է, որ Հայաստանի կառավարությունը կգործադրի բոլոր հնարավոր ջանքերը, որ Ադրբեջանի հետ խաղաղության պայմանագիրը ստորագրվի մինչև տարեվերջ: Իսկ մինչ այդ ակնկալում են ավարտել դելիմիտացիան, ինչպես նաեւ կաևորել է, որ միջազգայնորեն տեսանելի երկխոսություն սկսվի Լեռնային Ղարաբաղի և Ադրբեջանի միջև․«Թշնամանքը և ընդհանրապես իրավիճակը պետք է կառավարվի, քանի որ, երբ դա կառավարելի չէ, կարող է բերել միայն վնաս: Մնացածը, ավելի բարձր հայտարարություններ, ցավոք, կամ բարեբախտաբար, չեմ կարող անել», - ԱԺ ամբիոնից հայտարարել էր Փաշինյանը:

Արցախի արտգործնախարարը շեշտեց՝ Ստեփանակերտը դեմ չէ խաղաղության պայմանագրերին, Հայաստան-Ադրբեջան հարաբերությունների բարելավմանը, բայց կան կարեւոր հանգամանքներ, որոնք անպայման պետք է հաշվի առնել։

«Դա այն է, որ այդ պայմանագիրը չի կարող լինել նրա հաշվին, որ Հայաստանը ճանաչի Արցախը որպես Ադրբեջանի մաս։ Սրա մասին մենք նույնիսկ չենք էլ ուզում մտածել, որ որեւէ մեկը, առավել եւս պաշտոնական Երեւանը, Հայաստանի ղեկավարը կարող է նման քայլ անել։ Երկրորդ, մենք երբեք դեմ չենք եղել Ադրբեջանի հետ երկխոսության, ձեւաչափն է կարեւոր, իսկ այդ ձեւաչափը ֆիքսվել է ԵԱՀԿ շրջանակներում, ասել է թե, միջազգային հարթակներում։ Բացի այդ, Արցախի սուբյեկտայնությունը ճանաչվել է ՄԱԿ-ի 4 բանաձեւերում, որտեղ գրված է՝ տեղական եւ հայկական ուժերը, այսինքն, դրանցում անուղղակիորեն ճանաչվում է Արցախի սուբյեկտայնությունը։ Այն, որ ադրբեջանա-ղարաբաղյան հակամարտությունը ունի երեք կողմ, ֆիքսված է Բուդապեշտի գագաթնաժողովում եւ տարբեր տարիներին ընդունված որոշումներում. դրանք են` Ադրբեջանը, Արցախն եւ Հայաստանը։ Եթե այդ ձեւաչափով մենք սկսում ենք պաշտոնական երկխոսություն, իհարկե, մենք կողջունենք»,-ասաց Բաբայանը՝ նկատելով, որ Ադրբեջանը հրապարակավ հայտարարում է, որ պատրաստ չէ նման երկխոսության։

Դիտարկմանը, թե ինչ է մնում պաշտոնական Ստեփանակերտին, եթե պաշտոնական Երեւանն, ի դեմս օրվա իշխանության, բացահայտ հայտարարում է, որ ռեսուրս չունի Արցախի հիմնախնդրով զբաղվելու, Դավիթ Բաբայանն ասաց ․«Երբ խոսում ենք այն մասին, որ ռեսուրս ունենք կամ ոչ, պետք է հարցն այլ տեսանկյունից դիտարկենք՝ իսկ Հայաստանը միայնակ ռեսուրս ունի՞ ինքն իրեն պաշտպանելու ՝ նույն Թուրքիայից, Ադրբեջանից, առավել եւս, նրանց համատեղ գործողություններից, իհարկե՝ ոչ եւ դժվար թե ունենա միայնակ ռեսուրս` տեսանելի ապագայում »,-ասաց Բաբայանը շարունակելով ․«Կայացած երկրները, իմաստուն երկրները իրենց պաշտպանությունը եւ հուսալի ապագան կերտում են եւ՛ սեփական ուժերով, եւ՛, իհարկե, ճիշտ աշխարհաքաղաքականությամբ ու արտաքին քաղաքականությամբ, նույնիսկ, աշխարհի ամենահզոր երկրները կրկին դաշնակից ու եղբայրական երկրներ են փնտրում»,-ասաց Բաբայանը ։

Բաբայանն ընդգծեց՝ կա Ռուսաստան, որի հետ պետք է խորացնել հարաբերությունները, կա Արեւմուտք, որի հետ պետք է զարգացնել հարաբերությունները, որովհետեւ, ԱՄՆ-ը միակ երկիրն է, որը դեռեւս ի վիճակի է զսպել Թուրքիային՝ օգտագործելով քաղաքական լծակներ։ «Ճիշտ աշխարհաքաղաքականությամբ մենք պետք է բալանսավորենք, բոլոր երկրներն այդպես են անում»,-եզրափակեց Բաբայանը ։

Աղբյուր` Փաստինֆո