Փաստ ինֆո

Դատախազը պահանջում է իրավապաշտպան Սաշիկ Սուլթանյանի նկատմամբ որպես խափանման միջոց ընտրել կալանավորումը և նրա նկատմամբ հետախուզում հայտարարել։ Նման միջնորդությամբ դատախազը հանդես եկավ այսօր՝ դատարանում։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, այսօր կայացել է Սաշիկ Սուլթանյանի գործով դատական նիստը, սակայն, երկրորդ դատական նիստն անընդմեջ Սաշիկ Սուլթանյանը չի ներկայացել՝ լինելով ծանուցված։ Պաշտպանության կողմին Սաշիկ Սուլթանյանի բացակայության վերաբերյալ որևէ տեղեկություն հայտնի չէ, ավելին, պաշտպանին չի հաջողվել կապ հաստատել Սուլթանյանի հետ, նրա գտնվելու վայրը հայտնի չէ։ Ի դեպ, շուրջ մեկ ամիս առաջ «Փաստինֆո»-ին հայտնի էր դարձել, որ իրավապաշտպան Սաշիկ Սուլթանյանը մեկնել է Եվրոպա՝ խնդրելով քաղաքական ապաստան տրամադրել իրեն, ինչը փաստացի հաստատվեց՝ հերթական անգամ նրա բացակայությամբ։

Մեղադրող դատախազը նշեց, որ ինչպես նախորդ, այդպես էլ՝ այս դատական նիստի ընթացքում որևէ տեղեկություն չկա, թե ինչու Սուլթանյանը չի ներկայացել դատական նիստին, ավելին, փաստական տվյալներ են ստացվել, որ վերջինս մեկնել է արտերկիր՝ խախտելով խափանման միջոցի պայմանը։ Դատախազը միջնորդություն ներկայացրեց՝ պահանջելով Սուլթանյանի նկատմամբ ընտրված խափանման միջոց չհեռանալու մասին ստորագրությունը փոխել և նրա նկատմամբ որպես խափանման միջոց ընտրել կալանավորումը ՝ հայտարարելով հետախուզում։ Դատախազն ընդգծեց, որ Սուլթանյանը, գտնվելով ազատության մեջ, թաքնվում է վարույթն իրականացնող մարմնից, խոչընդոտում է գործի քննությանը և խուսափում է քրեական պատասխանատվության ենթարկվելուց, հետևաբար, նրա նկատմամբ կալանավորումն ընտրելու բոլոր իրավաչափ հիմքերն առկա են։ Հատկանշական է, որ պաշտպանության կողմը , ըստ էության, չառարկեց միջնորդության դեմ ՝ նշելով, որ տեղեկություն չունի իր պաշտպանյալի՝ չներկայանալու պատճառների մասին, ավելին, որևէ կապ չի եղել։
Դատարանը հեռացել է խորհրդակցական սենյակ՝ որոշում կայացնելու։

Հիշեցնենք՝ Ս․ Սուլթանյանին մեղադրանք է առաջադրվել ՀՀ քրեական օրենսգրքի 226-րդ հոդվածի 2-րդ մասի 1-ին կետով՝ ազգային, ռասայական կամ կրոնական թշնամանք հարուցելու հատկանիշներով։ Ըստ մեղադրանքի՝ Սուլթանյանը 2020 թվականի մայիսին Իրաքի Հանրապետությունում գործող yezidinews.com կայքին տված հարցազրույցում իրականությանը չհամապատասխանող տեղեկություններ է հայտնել այն մասին, որ Հայաստանի տարածքում եզդիների իրավունքները պաշտպանված չեն, հայերը ծաղրում են եզդիներին և խտրական վերաբերմունք դրսևորում նրանց նկատմամբ, եզդիները Հայաստանում հնարավորություն չունեն սովորելու իրենց մայրենի լեզուն, հայերը խլում են եզդիների ունեցվածքը, բիզնեսները, տներն ու հողերը, եզդիների վիճակը գնալով վատացնում են, ասում են, որ եզդին Հայաստանում հող ունենալու իրավունք չունի։

Հեղինակ՝ Իզաբել Սահակյան

Աղբյուր` Փաստինֆո