Փաստ ինֆո

«Պարզ չէ, թե ինչպես պետք է հաշվել կորսված մակերեսը։ Կարծում եմ, որ ավելի հեշտ կլինի, երբ արբանյակային լուսանկարներ կլինեն, որովհետեւ պարզ չէ, ինչպես պետք է հաշվել՝ հնարավոր է, որ ադրբեջանցիները եկել են առաջ եւ դիրքեր են դրել, հնարավոր է՝ մխրճվել են մեր դիրքերի մեջ։ ՀԻմա, այդ տարածքը, որը որ իրենց հետեւում է, պետք է դիտարկել իրե՞նց տարածք, թե՞ մեր, քանի որ դիտարկվում է մեր կողմից։ Դա դժվար է գնահատել, բայց միաժամանակ, տարօրինակ է, որ այդ աստիճան տարբեր են թվերը, որքան էլ որ մենք ասենք, որ դժվար է ճշգրիտ հաշվարկը»- «Փաստինֆո»-ի հետ զրույցում այս մասին ասաց Իրազեկ քաղաքացիների միավորման նախագահ Դանիել Իոաննիսյանը՝ անդրադառնալով Հայաստանի տարածքային կորուստների մասին իշխանության տարբեր ներկայացուցիչների հայտարարությունների անհամապատասխանությանը։

Նշենք, որ իշխանական պատգամավոր Արմեն Խաչատրյանը Սանկտ Պետերբուրգում՝ ՀԱՊԿ անդամ պետությունների խորհրդարանների խորհրդակցության ընթացքում հայտարարել էր, թե անցած մեկ տարվա ընթացքում ադրբեջանական զինուժը գրավել է Հայաստանի մոտ 127 քառակուսի կիլոմետր տարածք։ Ավելի վաղ Նիկոլ Փաշինյանը հայտարարել էր, որ Ադրբեջանը 10 քառակուսի կմ է օկուպացրել սեպտեմբերի 13-ի հարձակման հետեւանքովմ իսկ 2021-ին՝ 41։ Իսկ այսօր իշխանական մեկ այլ պատգամավոր՝ ԱԺ պաշտպանության հանձնաժողովի անդամ Գագիկ Մելքոնյանն ասել է, թե Ադրբեջանը Հայաստանի տարածքից օկուպացրել էր 40 քառակուսի կմ տարածք, իսկ սեպտեմբերի 13-ին Ջերմուկի դեպքերի ժամանակ այդ տարածքները ավելացել են եւս մոտ 60 քառակուսի կմ-ով:

Արդյո՞ք այս անհամապատասխանությունը հանրության շրջանում օբյեկտիվ կասկածներ չի կարող առաջացնել պաշտոնական լրատվության նկատմամբ եւ արդյո՞ք այն չի խոսում հասարակության առջեւ իշխանության հաշվետվողականության բացակայության խնդրի մասին՝ Իոաննիսյանն արձագանքեց․«Հակասությունը ակնհայտ է եւ ինձ թվում է, որ պետք է այդ պարոններին հարցնել, թե ինչու են իրենց հրապարակած թվերն այդ աստիճան տարբերվում։

Գուցե ինչ-որ բացատրությու՞ն կա, գուցե նույն երեւույթի հետ գործ ունենք, ինչ 44-օրյա պատերազմի ժամանա՞կ, երբ հայտարարվում էր, որ դիվերսոին խմբերը եկան հասան այստեղ, եկան հասան այնտեղ, բայց վերջում պարզվեց, որ դրանք ոչ թե դիվերսիոն խմբեր էին, այլ ադրբեջանական բանակի մոբիլ խմբեր, որոնք ադրբեջանական բանակը օգտագործում է եւ այդ մոբիլ խմբերը գալիս ու գրավում են։ Իրականում, այն ժամանակ, երբ Արծրուն Հովհաննիսյանն ասում էր, թե դրանք մոբիլ խմբեր են, ինձ մոտ տպավորություն էր, թե ինքն էլ էր հավատում դրան։ Հնարավոր է, որ հիմա էլ ասել են, թե Ջերմուկի ուղղությամբ դիվերսիոն խմբերը այսպես, այնպես, բայց իրականում դրանք եղել են ադրբեջանական մոբիլ խմբեր, որոնք եկել ու գրավել են եւ հետագայում է եղել այդ ընկալումը, որ դրանք դիվերսիոն խմբեր չէին»-ասաց Իոաննիսյանը։

Ըստ նրա, նույնը տեղի ունեցավ օրինակ, Հադրութի շրաջանում, երբ ասվեց, թե դիվորսիոն խմբեր են, բայց հետին թվով իմացանք, որ դրանք մոբիլ խմբեր էին, որոնք ներթափանցում ու տարածքներ էին գրավում։ «Իրենք պետք է բացատրեն այդ տարբերությունը, այս պահին դժվար է ասել, թե որ թիվն է խելքին մոտ։ Առհասարակ, պետք է հրապարակային լինեն, որովհետեւ բոլոր կողմերին այդ տեղեկատվությունը տալիս են՝ ռուսներին տալիս են, ՀԱՊԿ-ին տալիս են, եվրադիտորդներին տալիս են, ամերիկացիներին տալիս են, դե ադրբեջանցիները, բնականաբար, շատ լավ գիտեն, թե ուր են հասել, եւ ինչ են վերահսկում, տպավորություն է, որ միայն Հայաստանի հասարակությանը չի ասվում»։

Դիտարկմանը, թե ապրիլյան պատերազմի ժամանակ, օրինակ, 800 հեկտարի խնդիրը մեծ հնչեղություն ստացավ՝ Իոաննիսյանը նկատեց, որ այն ժամանակ, ի դեպ, հենց Սերժ Սարգսյանն այդ մասին հայտարարեց՝ Ժիրայր Սեֆիլյանից հետո։
«Ամենյան ազնվությամբ, ես չեմ կարող ենթադրել, թե ինչու հիմա դա չի հրապարակվում, ինչ-որ պատճառ կա՞, թե՞ ուղղակի բարդակ է»,-նկատեց Իոաննիսյանը՝ հավելելով, որ ինչ էլ որ լինի, 21-րդ դարում ոչինչ թաքցնել հնարավոր չէ, որովհետեւ, ի վերջո, արբանյակային լուսանկարներ կան։

Իոաննիսյանի խոսքով, հասարակության տեղեկացված լինելուց բացի, այդ հրապարակայնությունը կօգնի նաեւ միջազգային հանրության հետ աշխատանքին։

Աղբյուր` Փաստինֆո