Փաստ ինֆո

Հայաստանի ԶՈւ ղեկավարությունը պետք է ճշգրիտ հաշվարկ կատարի և ներկայացնի հանրությանը՝ տարածքային ի՞նչ կորուստ է կրել Հայաստանը՝ ադրբեջանական ագրեսիայի հետևանքով: Վերջին բախման ժամանակ Ադրբեջանի հանցագործ գործողությունների, սադրանքների հետևանքով, մերոնք խոսում են մոտավորապես 50 դիրքի կորստի մասին տարբեր հատվածներում: Այս մասին լրագրողների հետ զրույցում այսօր ասել է ՊՆ նախկին նախարար, «Հայաստան» խմբակցության ղեկավար Սեյրան Օհանյանը:

Խոսելով կորուստների պատճառների մասին՝ Օհանյանը շեշտեց՝ ամենամեծ հանցագործը Ադրբեջանն է, բայց նաև հանցագործություն է, երբ երկու տարի շարունակ սեփական երկրի իշխանությունները պետական, ռազմական կառավարման համակարգերում լուրջ որոշումներ չեն ընդունել, չեն կազմակերպել մեր երկրի պաշտպանությունը.

«Խոսում են զենք չմատակարարելու մասին։ Լավ, զենք չի մատակարարվել, բա մեր երկրում բահ, քլունգ չի՞ եղել։ Մեր երկրում զգալի շինարարակական, ինժեներական ներուժ կա, բավականին լուրջ քանակությամբ կազմակերպություններ, որոնց հետ կարելի է պայմանագրեր կնքել, ապահովել նրանց աշխատանքը և երկրի պաշտպանությունը կազմակերպել»,- ասաց ՊՆ նախկին նախարարը:

Ինչ վերբերում է ընդդիմության գործողություններին և անհասկանալի պասիվությանը՝ Սեյրան Օհանյանը հայտարարեց, որ «Դիմադրության» շարժումը շարունակական է լինելու և ապագայում իրենց գործողությունների մեջ նորություններ կլինեն.

«Սեպտեմբերի 13-ին, երբ վիճակն օրհասական էր, մենք եղել ենք ԱԺ-ում և փորձել ենք հայտարարություն անել, և այլն: Բացի դրանից, մենք աշխատանքն ԱԺ-ից դուրս շարունակում ենք, միգուցե, այս պահին դա տեսանելի չէ: Ինքնաքննադատաբար ասեմ, որ ժողովրդի հետ աշխատանքը, համոզման գործընթացը, ընդհանուր առմամբ, ամենադժվար գործընթացն է»,-ասաց Օհանյանը և հավելեց, որ շարժման ղեկավարությունը համապատասխան ծրագրային գործունություն է ծավալում, որը կներկայացվի առաջիկայում: Ըստ նրա՝ թեև նախորդ շարժման ընթացքում որոշակի հաջողության հասել են, սակայն դա բավարար չի համարում:

«Հիմա որոշակի վերլուծություն ենք անում: Ապագայում մեր գործողությունների մեջ կլինեն նորարարություններ»,-ասաց Օհանյանը:

Աղբյուր` Փաստինֆո