Փաստ ինֆո

Վրաստանը մշտապես իր ազգային շահերից ելնելով է այս տարածաշրջանում քաղաքականություն իրականացնում և դիրքորոշում հայտնում: Պարզ է, որ Թբիլիսին չէր հայտարարելու, որ Ադրբեջանն ագրեսոր պետություն է, և արդեն երկրորդ անգամն է ագրեսիա իրականացնում Հայաստանի նկատմամբ։ Պետք չէր սպասել, որ օկուպացված տարածքների մասին կարող է խոսել Վրաստանը, քանի որ այսօր ինքը ևս պոտենցիալ խնդիր ունի Ադրբեջանի հետ: «Փաստինֆո»-ի հետ զրույցում նման դիտարկում է արել վրացագետ Ջոն Մելիքյանը:

Նրա խոսքով՝ Վրաստանը փորձում է չեզոք լինել իր հայտարարություններում և զգուշավորություն ցուցաբերել, քանի որ տարածքային խնդիրների կամ սահմանազատման մասին խոսելիս հիշում է, որ ինքը ևս ունի չավարտված դելիմիտացայի և դեմարկացիայի գործընթաց Ադրբեջանի հետ.

«Ադրբեջանը Վրաստանի համար լուրջ գլխացավանք է, քանի որ նրանց սահմանը ևս ամբողջությամբ սահմանազատված չէ, բոլորն ասում են՝ Հայաստանի և Ադրբեջանի սահմանը դելիմիտացված չէ, դրա համար են սահմանային վեճեր առաջանում, նույնը կարող է մի քանի տարուց տեղի ունենալ վրաց-ադրբեջանական սահմանին: Եթե Հայաստանի պարագայում կարելի է դրա մասին խոսել, ապա նույնը կարելի է ասել վրաց-ադրբեջանական սահմանի մասին: Նրանց միջև ևս դելիմիտացիայի գործընթացը ավարտին հասցված չէ, չկա միջպետական պայմանագիր, որը ֆիքսում է հստակ միջպետական սահմանը, ուստի Վրաստանը, տեսնելով թե այսօր ինչ է տեղի ունենում հայ-ադրբեջանական սահմանին, լուրջ մտահոգություններ ունի սրա մասին, բայց այլ հարց է, որ սրա մասին նույնիսկ փորձագիտական շրջանակները չեն խոսում »,-ասում է Ջոն Մելիքյանը:

Զրուցակիցը հիշեցնում է նաև, որ այսօր Վրաստանը տնտեսական և ռազմական համագործակցությունը Ադրբեջանի հետ ավելի բարձր մակարդակի է, քան՝ Հայաստանի հետ:

Նրա խոսքով՝ այս երկու երկրների միջև տնտեսական համագործակցությունը ռազմավարական մակարդակի է, ընդ որում, բավականին լուրջ թվերի մասին է խոսքը, ուստի այս ամենը փակում է հարցը։

«Երբ խոսում են ռազմավարական մակարդակի հարաբերությունների մասին, սա պարզապես բառ չի, սրա տակ թվեր կան, որոնց մասին այսօր Թբիլիսիում Ալիևը խոսում էր, որ մինչև 2027թ Վրաստանի տարածքով 20 մլրդ կուբամետր գազի արտահանում են ապահովելու դեպի Եվրոպա, Բաքու-Թբիլի-Կարսով ցանկություն կա տարեկան 5մլն տոննա բեռ տեղափոխելու: Այս ամենից Վրաստանի բյուջեն բավականին լուրջ եկամուտներ է ստանալու, միջպետական առևտուրը ևս իրենց համար շատ կարևոր է: Վրաստան-Ադրբեջան հարաբերությունները շատ զարգացած են անգամ ռազմական մակարդակում, վերջերս զորավարժություններ տեղի ունեցան, նոր զորավարժություններ ևս սպասվում են »,-նկատել է Ջոն Մելիքյանը:

Աղբյուր` Փաստինֆո