Փաստ ինֆո

Երևանի ընդհանուր իրավասության դատարանի դատավոր (լիազորությունները կասեցված են) Արուսյակ Ալեքսանյանի 22-ամյա կին օգնականին՝ Թ. Հ.-ին, կալանավորելու որոշումը կայացրել է դատավոր Դավիթ Արղամանյանը։ Պաշտպան Գարիկ Գալիկյանը «Փաստինֆո»-ի հետ զրույցում բարոյական չհամարեց նման դատական ակտի կայացումը։

«Դատավորի օգնականը անկախ ամեն ինչից այն ֆիգուրը չի, որ ինչ-որ օժանդակություն կատարի ու բացի այդ էլ՝ տանեն կալանավորեն։ Թիրախավորելով դատական համակարգը՝ մեր ներքին օղակի աշխատողներին, կոնկրետ նսեմացնում են և՛ դատական համակարգը, և՛ առավել ևս դատավորներին»,- նշեց Գալիկյանը։

Դիտարկմանը, որ կալանավորվել է 22 տարեկան աղջիկ, արդյո՞ք փորձ չի արվում ճնշելու, կոտրելու՝ ցուցմունք կորզելու համար՝ պաշտպանը զերծ մնաց մեկնաբանությունից, միայն նշեց, որ, եթե կալանավորման միջնորդությունը չներկայացներ ԱԱԾ քննչական դեպարտամենտը, նման որոշում չէր կայացվի։

«Երբ դատավորը կալանքի հիմքերն անտեսելով, վերացական մեկնաբանություն կատարելով, ամեն ինչ մի կողմ դնելով՝ պետք է նայի, թե ով է միջնորդություն ներկայացնողը, դրանով առաջնորդվի՝ կալանավորել, թե՝ ոչ, դրանով ամեն ինչ ասված է։ Վերջնականապես սպանեցինք մեր արդարադատությունը։ Եթե մի փոքր նշույլ կար, որ կարող է արդարադատությունը վերակենդանանա, առողջանա, գոնե ծայրահեղ ծանր վիճակից ծանր վիճակի հասնի, այսօր արդեն արդարադատությանը թթվածին ներարկող լարերը վերջնականապես կտրվեց, դատավոր Արղամանյանը կտրեց»,- նշեց պաշտպանը։

Հիշեցնենք, որ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությունն առնչվող գործին։

Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ ԱԱԾ-ն դատավորին մեղադրում է ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։

Արուսյակ Ալեքսանյանը և Էրիկ Ալեքսանյանն իրենց ներկայացված մեղադրանքը չեն ընդունում։ Թե դատավորը, թե փաստաբանը ներկայումս կալանավորված են։
Հեղինակ՝ Իզաբել Սահակյան

Աղբյուր` Փաստինֆո