Փաստ ինֆո

«Եթե գնահատենք, որ առնվազն վերջին մեկ ամսվա ընթացքում Հայաստանի կողմից Ադրբեջանին տրամադրվող միջանցքի վերաբերյալ խոսակցությունները տարբեր հարթակներում եւ տարբեր երկրների ղեկավարների մոտ օրակարգային են, մասնավորապես, Ադրբեջանի եւ Թուրքիայի նախագահների, արեւմտյան մի շարք վերլուծական կենտրոնների, ապա պետք է արձանագրենք, որ Իրանը շատ կոշտ է արձագանքում այդ ամենին»,-«Փաստինֆո»-ի հետ զրույցում այս մասին ասաց պահեստազորի գնդապետ Հայկ Նահապետյանը՝ անդրադառնալով Իրանի ԱԳ նախարարի Հայաստան կատարելիք այցին եւ այդ այցելության միջազգային ֆոնին։

Նահապետյանի խոսքով, շուրջ մեկ ամսիս առաջ մեկ շաբաթվա ընթացքում ԻԻՀ գերագույն հոգեւոր առաջնորդի, նախագահի, անվտանգության խորհրդի հանձնաժողովի, օրենսդիր մարմնի արտահերթ նիստի, հեղափոխության պահապանների կորպուսի ղեկավարի եւ Իրանի ԶՈՒ ԳՇ պետի հայտարարություններն առ այն , որ իրենք թույլ չեն տա Հայաստանի եւ Իրանի միջեւ որեւէ սահմանի վերաձեւում, ինքնին հուշում է, որ այդ խնդիրը Իրանի համար խիստ կենսական է։ Մասնագետն ընդգծում է՝ եթե սրան ավելացնենք Արաքսի ափին Իրանի կողմից զորավարժությունների անցկացումը, ինքնին հասկանալի է դառնում Հայաստան Իրանի ԱԳ նախարարի այցի բուն նպատակը։

«ԱԳ նախարարը, ամենայն հավանականությամբ, փորձելու է հավաստիացումներ ստանալ, առ այն, որ Հայաստանը հետամուտ է լինելու 2020 թ նոյեմբերի 9-ի եռակողմ հայտարարության կետերի կատարմանը, որտեղ նշված չէ որեւէ միջանցքի մասին, որը տրամադրվելու է Ադրբեջանին՝ Ադրբեջանը Նախիջեւանին կապելու համար։ Դա Իրանի համար է առաջին հեթին կարեւոր եւ այդ միջանցքի իրական շահառուն ոչ այնքան Ադրբեջանն ու Թուրքիան են, որոնք այդ միջանցք կոչվածով ցամաքային կապ են ստանալու, այլ ԱՄՆ-ն, որի թիվ մեկ խնդիրը Իրանը Հայաստանից, իսկ եթե ավելի տարողունակ նայենք, Ռուսաստանից կտրելն է »,-ասում է Հայկ Նահապետյանը ՝ շեշտելով, որ սա ԱՄՆ-ի համար խիստ կարեւոր է։

Հիշեցնենք, որ Հոկտեմբերի 20-ին պաշտոնական այցով Հայաստան կժամանի Իրանի ԱԳ նախարար Հոսեյն Ամիր Աբդոլլահիանը: Նույն օրը ՀՀ ԱԳՆ-ում կկայանա Հայաստանի և Իրանի ԱԳ նախարարների հանդիպումը: Այցի ընթացքում ԻԻՀ ԱԳ նախարարը հանդիպումներ կունենա նաև ՀՀ վարչապետ Նիկոլ Փաշինյանի և ՀՀ ԱԺ նախագահ Ալեն Սիմոնյանի հետ: Հոկտեմբերի 21-ին ՀՀ ԱԳ նախարար Արարատ Միրզոյանը և ԻԻՀ ԱԳ նախարար Հոսեյն Ամիր Աբդոլլահիանը ներկա կլինեն Կապանում ԻԻՀ գլխավոր հյուպատոսության բացման հանդիսավոր արարողությանը:

Նկատենք, որ ԱՄՆ Պետդեպի փոխխոսնակ Վեդանտ Պատելը ճեպազրույցում անդրադարձել է Հարավային Կովկասին՝ հայտարարելով, որ տարածաշրջանի երկրները «ռուս-իրանական դաշինքը» պետք է դիտարկեն որպես «խորքային սպառնալիք»:

Հայկ Նահապետյանի խոսքով, այս հայտարարությունը վկայում է, որ Հայաստանի ռազմավարական գործընկերությունը ՌԴ-ի հետ եւ գործակցությունը Իրանի հետ, մասնավորապես, իրանական անօդաչուների հնարավոր ձեռքբերման վերաբերյալ, մարտահրավեր է ԱՄՆ-ի ծրագրերին, ըստ որոնց՝ ցանկանում են Իրանը կտրել Հայաստանից, որից հետո Իրանը շրջափակված կլինի։

«Այս գործընթացներում Ադրբեջանն ու Թուրքիան ԱՄՆ-ի գործիքներն են՝ եւ ներսից, եւ Իրանի արտաքին սահմաններին սադրանքներ իրականացնելու առումով։ Մյուսը Իսրայելն է, որը ռազմատեխնիկական համագործակցություն ունի Ադրբեջանի հետ։ Ակնհայտ է, որ ՀՀ օրվա իշխանության մանեւրելու աստիճանը փոքրացել է եւ նունիսկ չի բացառվում , որ Փաշինյանը եւ իր քաղաքական թիմը լուրջ խնդիրներ ունենա ուժային մեկ կենտրոնի կողմից։ Եթե, այնուամենայնիվ, նա փորձի Հայաստանի անվտանգային ճարտարապետությունը փոխել, հրաժարվել Հայաստանի ռազմավարական դաշնակցությունից եւ ուղղություն վերցնել դեպի ՆԱՏՕ եւ ԵՄ, որի մասին Հայաստանի պետական հեռուստաալիքի եթերից օրերս հայտարարեց կոնգրեսական Փելոունը, ապա նրա վրա ճնշումներ կլինեն եւ ՌԴ-ի եւ Իրանի կողմից։ Եթե Հայաստանը մնա իր դաշնակցային պարտավորությունների տիրույթում , այն է՝ ռազմավարական համագործակցություն ՌԴ-ի հետ եւ ռազմատեխնիկական համագործակցություն Իրանի հետ, ապա այդ ճնշումները կմեծանան Արեւմուտքի կողմից »․-ասաց Հայկ Նահապետյանը։
Նրա խոսքով, այժմ ուժայի կենտրոնների միջեւ պայքար է գնում։ Արեւմուտքը Հայաստանում ներկայացված է տարբեր ուժերի՝ կուսակցությունների, անհատների, ԶԼՄ-ների, փորձագետների միջոցով, եւ, բնական է, որ այդ գործիքակազմը պետք է փորձի օգտագործել։ Ավելին, փորձագետի դիտարկմամբ, անհրաժեշտության դեպքում Արեւմուտքը՝ ի դեմս ԱՄՆ-ի, չի սեթեւեթի եւ Հայաստանի նկատմամբ կկիրառի պատժամիջոցներ։

Աղբյուր` Փաստինֆո