Փաստ ինֆո

«Փաստ է, որ Ուկրաինան իսկապես աջակցում է Ադրբեջանին, փաստ է, որ ոչ միայն Ուկրաինայի, այլեւ մյուս պետությունների դիրքորոշումը Արցախի դեմ Ադրբեջանի ագրեսիային, զգալիորեն նպաստեց Ռուսաստանի ագրեսիային Ուկրաինայի դեմ եւ ես, կարծում եմ, որ նաեւ Ուկրաինայում այսօր արդեն կան ավելի լուրջ քաղաքական գնահատականներ, որ առհասարակ, ագրեսիվ գործողությունները՝ լինի ռուսական, թե ադրբեջանական, ընդունելի չեն կարող լինել։ Ուկրաինայում եւս կա զգացողություն, որ Թուրքիան ու Ադրբեջանը ոչ թե աջակցում են Ուկրաինային, այլ փորձում են այսօր ուկրինական հակամարտությունում իրենց շահերը առաջ տանել »,- «Փաստինֆո»-ի հետ զրույցում ասաց «Հայ կառուցողական կուսակցության» ղեկավար Անդրիաս Ղուկասյանը՝ անդրադառնալով ուկրաինա-ադրբեջանական հարաբերություններին։

Նշենք, որ ըստ տելեգրամյան ալիքների տեղեկությունների, իսկ Լվովում վերանորոգման կանգնած ադրբեջանական ՄԻԳ 29 կործանիչները ուկրաինական կողմը ՌԴ-ի դեմ է կիրառել ։ Իսկ Հայաստանում կան որոշ ուժեր, որոնք իրենց զորակցությունն են հայտնում Ուկրաինային՝ Ռուսաստանի նախաձեռնած ռազմական գործողություններում, ասել է թե՝ մեր թշնամու՝ Ադրբեջանի դաշնակցին։

Անդրիաս Ղուկասյանի խոսքով, Ադրբեջանը ՌԴ-ի հետ ունի դաշնակցային համաձայնագիր, ինչպես եւ Հայաստանը ունի։ «Բայց, անձամբ ես համարում եմ, որ թե Ադրբեջանը, թե Թուրքիան, ավելի շատ Ռուսաստանի գործընկերներն են, քան Ուկրաինայինը»,-ասում է Ղուկասյանը։

Դիտարկմանը, թե Ուկրաինան 44-օրյա պատերազմի ընթացքում ոչ միայն բացահայտ աջակցում էր Ադրբեջանին, այլեւ պատերազմից հետո շնորհավորեց նրան, տվյալ պարագայում, արդյո՞ք չի նշանակում, որ հայաստանյան քաղաքական շրջանակները, որոնք այս կոնֆլիկտում Ուկրաինային են սատարում, իրականում սատարում են մեր թշնամու բարեկամին, Անդրիաս Ղուկասյանն ասաց․«Այստեղ կարեւոր է տարանջատել՝ Ուկրաինան այսօր հանդիսանում է ագրեսիայի զոհ։ ՌԴ գործողությունները աննախադեպ են։ 2-րդ աշխարհամարտից հետո ոչ մի պետություն իրեն այդպիսի լտիություն թույլ չի տվել միջազգային նորմերի հանդեպ, նույնիսկ Ադրբեջանը փորձել է ինչ-որ ձեւով իր գործողությունները փաթեթավորել ինչ-որ միջազգային պայմանների շրջանակում ։

Կա, իհարկե, այսօր Ռուսաստանի գործողությունների նկատմամբ անհանդուրժողականություն, բայց ես համաձայն եմ, որ Ուկրաինայի վերաբերյալ Հայաստանի Հանրապետությունը պետք է ունենա դիրքորոշում։ Ռուսաստանի ագրեսիան, իհարկե, դատապարտելի է, բայց Ուկրաինան իր հերթին Հայաստանի բարեկամ պետությունների շարքին չի կարող դասվել, որովհետեւ ինքը՝ իր հերթին աջակից է ադրբեջանական եւ թուրքական ագրեսիային ԼՂ-ում »,-կարծում է Անդրիաս Ղուկասյանը։

Նա եւս մեկ անգամ նշեց, որ այսօր ուկրաինական քաղաքական շրջանակներում դիրքորոշումների փոփոխություններ են առկա, բայց փաստ է, որ թե առաջին Արցախյան պատերազմում, թե 44-օրյա պատերազմում ուկրաինական նացիոնալիստական ուժերը իրենց դիրքավորել են Ադրբեջանի կողքին։

«Դա իրողություն է, որը անհնար է չտեսնել »,-եզրափակեց Անդրիաս Ղուկասյանը։

Աղբյուր` Փաստինֆո