Փաստ ինֆո

ԲԴԽ-ն հեռացել է խորհրդակցական սենյակ՝ Երևանի ընդհանուր իրավասության դատարանի դատավոր Վահե Միսակյանին կարգապահական պատասխանատվության ենթարկելու միջնորդության վերաբերյալ որոշում կայացնելու։

Հիշեցնենք, որ դատավոր Վահե Միսակյանի վարույթում են գտնվում մի շարք աղմկահարույց գործեր, այդ թվում՝ ՀՀ երրորդ նախագահ Սերժ Սարգսյանի, ԱԺ «Հայաստան» խմբակցության պատգամավոր Արմեն Չարչյանի, ՀՀ նախկին վարչապետ Վազգեն Մանուկյանի վերաբերյալ։ Դատավորի նկատմամբ կարգապահական վարույթը հարուցվել է ՀՀ արդարադատության նախարարության կողմից՝ գործերից մեկով արդարացման դատական ակտը կողմերին ուշ տրամադրելու համար, ինչի հետևանքով, ըստ նախարարության, վաղեմության ժամկետներն անցել են։ ԱՆ-ն միջնորդություն է ներկայացրել ԲԴԽ՝ դատավորին պատասխանատվության ենթարկելու համար։ Ըստ միջնորդության՝ թիվ ԵԴ/1067/01/19 քրեական գործով թույլ է տրվել Քրեական դատավարության օրենսգրքի 375-րդ հոդվածում ամրագրված պահանջների խախտում, որոնք իրենց հերթին հանգեցրել են «Հայաստանի Հանրապետության դատական օրենսգիրք» սահմանադրական օրենքի 69-րդ հոդվածի 1-ին մասի 1-ին կետով եւ 70-րդ հոդվածի 2-րդ մասի 6-րդ կետով սահմանված դատավորի վարքագծի կանոնների խախտման:

«Փաստինֆո»-ի թղթակցի հաղորդմամբ՝ այսօր ԲԴԽ-ում կայացած նիստի ընթացքում, մինչ միջնորդության ըստ էության քննությանն անցնելը, ԲԴԽ նախագահ Կարեն Անդրեասյանը և ԲԴԽ անդամ Երանուհի Թումանյանցը ինքնաբացարկ հայտնեցին, քանի որ դատավորի նկատմամբ վարույթը հարուցվել է Կարեն Անդրեասյանի կողմից, երբ վերջինս ՀՀ արդարադատության նախարարն էր, իսկ միջնորդությունը ԲԴԽ ներկայացվել է Երանուհի Թումանյանցի կողմից, որն այդ ժամանակ փոխնախարար էր և կատարում էր նախարարի պարտականությունները։ Նիստը նախագահեց Խորհրդի անդամներից Ստեփան Միքայելյանը, որը տարիքով ավագն է։

Միջնորդության քննության ընթացքում դատավոր Վահե Միսակյանը, անդրադառնալով դատական ակտն ուշ ուղարկելու պատճառներին և դրան նպաստող հանգամանքներին, բարձրացրեց դատարանների գերծանրաբեռնվածության խնդիրը։ Նա հայտնեց, որ 2021թ հունվարից դեկտեմբեր աիսների ընթացքում ստացել 120 քրեական գործ, մոտ 85 քրեական գործ ունեցել է դրան նախորդող տարվանից, իսկ 2022թ առաջին եռամսյակում ստացել է 21 քրեական գործ, 153-ը փոխանցվել է նախորդ տարվանից, ավարտվել՝ 10-ը։ Ընդ որում, դատավորը հայտնեց, որ 2021թ ստացած գործերից ավարտել է 51 քրեական գործի քննություն, որոնցից մոտ 35 քրեական գործով մեղադրյալները գտնվել են կալանքի տակ և որոշումներ են կայացվել նաև խափանման միջոցի վերաբերյալ։ Բացի բուն քրեական գործերից լրացուցիչ ծանրաբեռնվածություն է ստեղծել նաև այլ գործերի ստանալը և քննելը, մասնավորապես, 2021թ ընթացքում բացի վերոնշյալ գործերից ստացել է մինչդատական վարույթի նկատմամբ դատական վերահսկողության ոլորտին և դատական ակտերի կատարման հետ կապված հարցերին վերաբերող 476 միջնորդությունների, բողոքների, դիմումների վերաբերյալ գործեր և այլն, որոնցից ավարտել է 418-ը՝ մոտ 90 տոկոսը։ Անդրադառնալով առօրյա ծանրաբեռնվածությանը՝ Վահե Միսակյանը մատնանշեց այն հանգամանքը, որ եղել են գործեր, որոնց քննությունն առանձնակի բարդություն է ունեցել, կապված այնպիսի հանգամանքներով, ինչպիսիք են՝ գործի մեծածավալ, բազմահատոր, մասնակիցների մեծ քանակության լինլը։ Ինչ վերաբերում է նշված գործին, ապա Միսակյանը հայտնեց, որ, եթե անգամ պայմանականորեն ընդունենք, որ դատական ակտի դեմ բողոք կներկայացվեր, ապա, միևնույն է, անձին քրեական պատասխանատվության ենթարկելու վաղեմության ժամկետներն անցնելու էին։

Դատավորի դիտարկմամբ՝ իրեն կարգապահական պատասխանատվության ենթարկելու միջնորդությունը ենթակա է մերժման։ Պատասխանելով ՀՀ ԱՆ ներկայացուցչի հարցին, թե արդյոք հրապարակման պահին դատավճիռը պատրաստ էր, Վահե Միսակյանը նշեց, որ այդ օրը դատավճիռը պատրաստ չէր և չէր էլ կարող լինել և դրանով ինքը նորություն չի ասում, որովհետև արդարացման դատական ակտը պատրաստելու համար, որը, մասնավորապես, պարունակում էր ընտանեկան իրավիճակից բխող հարաբերություններ, լրացուցիչ դժվարություն է առաջացրել ժամանակային առումով ակտը պատրաստելու համար։ Միսակյանն արձանագրեց՝ իր բնույթով դա սովորական ակտերից, օրինակ, խափանման միջոցի վերաբերյալ դատական ակտից էականորեն տարբվում է և բավականին երկար ժամանակ է պահանջում, չի կարծում, որ դեպքերի գերակշռող մասում դատական ակտը կարող է հրապարակվել և անմիջապես տրամադրվել կողմերին։
Լսելով կողմերի դիրքորոշումը՝ ԲԴԽ-ն հեռացել է խորհրդակցական սենյակ՝ որոշում կայացնելու, որը կհրապարակվի նոյեմբերի 3-ին, ժամը՝ 15.00-ին։
Մանրամասները տեսանյութում

Հեղինակ՝ Իզաբել Սահակյան

Աղբյուր` Փաստինֆո