Փաստ ինֆո

Արցախի նախագահի գլխավորած պատվիրակության՝ ՀՀ-ում ունեցած հանդիպումների արդյունքներին ծանոթանալուց հետո ևս մեկ անգամ համոզվեցինք, որ ՀՀ իշխանություններն ամեն ինչ անում են, որ Արցախից ձերբազատվեն և դրա համար փորձում են օրակարգ բերել այն մտայնությունը, թե, իբր, Արցախն ու Հայաստանն առանձին-առանձին հնարավորություն ունեն փրկվելու: Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը:

«ՀՀ իշխանությունները խոստացել էին, որ ամեն ինչ անելու են, որ, այսպես կոչված, խաղաղության պայմանագրում, Արցախի մասին հիշատակվի, այսինքն՝ ֆիքսվի, որ այն չի վերաբերելու ու չի տարածվելու Արցախի վրա: Հիմա փաստացի հրաժարվում են դրանից և արցախյան պատվիրակությանը հստակ ասել են, որ եթե անգամ նման կետ չլինի պայմանագրում, միևնույն է՝ գնալու են այդ պայմանագրին»,-ասաց Գալստյանը:

Արցախի քաղաքական ուժերի հստակ դիրքորոշումը՝ Արցախի հարցում ՀՀ ներկա իշխանությունների մտադրության վերաբերյալ, Գալստյանի համոզմամբ, չի ուշանալու: Եվ դրանից հետո արդեն պարզ կդառնա՝ քաղաքական դաշտը միասնական ճակատո՞վ է պայքարի դուրս գալու Փաշինյանի որդեգրած հակահայ քաղաքականության դեմ, թե՞ ամեն մեկն իր պատկերացրած ձևով:

«Արցախի պաշտոնյաների համար կարևորագույն խնդիրը ներկա դրությամբ ՀՀ իշխանություններին հասկացնելն է, որ Արցախից հրաժարվելով, ըստ էության, գնում են թուրք-արդբեջանական տանդեմի առաջ քաշած օրակարգով, որտեղ հաջողության հասնելու որևէ հնարավորություն չկա: Կարծում եմ, որ Արցախի իշխանությունները հասկացել են Արցախի հարցը տարանջատելու Հայաստանի իշխանությունների մտադրությունը ու իրենք ևս դա դատապարտում են, բայց, միանշանակ, նրանց դիրքորոշումը և հետագա անելիքները պետք է հրապարակային ներկայացվեն հանրությանը: Հուսով եմ՝ առաջիկա օրերին դա կարվի»,-նշեց Գալստյանը:

Արցախի ԱԺ պատգամավորը համոզված է, որ պարտված իշխանություններին պարտադրում են ստորագրելու կապիտուլյացիոն փաստաթուղթը, մինչդեռ վերջիններս չեն գիտակցում կամ չեն ուզում ընդունել, որ դա անդառնալի հետևանքներ է ունենալու Հայաստան-Արցախի համար: Արցախյան վերջին պատվիրակությանը ևս, Գալստյանի գնահատմամբ, չի հաջողվել ՀՀ ներկա իշխանություններին հասկացնել, թե Արցախից հրաժարվելու դեպքում ինչ է տեղի ունենալու:

Հիշեցնենք, որ մի քանի օրով Երևան էր ժամանել Արցախի նախագահ Արայիկ Հարությունյանի գլխավորած պատվիրակությունը՝ ՀՀ իշխանությունների հետ քննարկելու Արցախի շուրջ ստեղծված վիճակն ու Պրահայի հանդիպումների արդյունքները: Արցախյան պատվիրակությանն ընդունել են ՀՀ նախագահը, վարչապետը, ԱԺ նախագահը, ԱԳ նախարարը, ԱԽ քարտուղարը:

Արցախ վերադառնալուց հետո Արայիկ Հարությունյանը հանդիպումների շարք է նախաձեռնել տարբեր շրջանակների հետ, որի նպատակը երևանյան հանդիպումների արդյունքները ներկայացնելն ու անելիքները հստակեցնելն է:

Աղբյուր` Փաստինֆո