Փաստ ինֆո

Ադրբեջանը, տեղեկատվական դաշտում և սահմանային փոքր միջադեպերով, հող է նախապատրաստում լայնածաված ռազմական գործողությունների համար, բայց դրա համար նախ պետք է ունենա մի շարք ուժային կենտրոնների լռության կոնսենսուսը: Եթե հաշվի առնենք, որ Հայաստան են ժամանել ԵՄ դիտորդական առաքելություն իրականացնող խմբերը, ՌԴ-ն նույնպես պատրաստ է, որ ՀԱՊԿ դիտորդական խմբեր գան՝ հայ-ադրբեջանական սահմանի ողջ երկայնքով տեղակայվելու համար, ապա Ադրբեջանի համար խնդրահարույց է դառնում լայնածաված ռազմական գործողությունները: «Փաստինֆո»-ի հետ զրույցում նման դիտարկում է արել ռազմական փորձագետ Հայկ Նահապետյանը:

Նկատենք, որ վերջին օրերին ադրբեջանական կողմը գրեթե ամեն օր կրակոցներ է արձակում հայկական դիրքերի արևելյան ուղղությամբ : Այսօր էլ ՀՀ ՊՆ-ն հայտարարեց, որ Ադրբեջանի ԶՈՒ-ն նախ միմյանց վրա են կրակում՝ ստեղծելու տպավորություն, որ հայկական կողմն է կրակում, ապա սկսում տարբեր տրամաչափի հրաձգային զինատեսակներից կրակ բացել հայկական դիրքերի ուղղությամբ:
Հայկ Նահապետյանի արձանագրմամբ՝ Ադրբեջանը, դիվանագիտական գործիքակազմը սպառել է և ռազմական սադրանքների է դիմում, որպեսզի հայկական կողմը զիջումների գնա:

Նրա խոսքով՝Ադրբեջանը դիմում է տարածված մեթոդի՝ թվացյալ իրավիճակ է ստեղծում, իբր հայկական կողմն է իրենց ուղղությամբ կրակել, իսկ իրենք ընդամենը պատասխանել են,

«Սա նորություն չէ, ոչ էլ Ադրբեջանի հրամկազմի հայտնագործությունն է:Մեր զինված ուժերը պետք է բավականին զգոն լինեն: Ենթադրում եմ, որ հայկական կողմը, նման սադրանքներից զերծ մնալու համար, հրահանգ ունի չպատասխանել ադրբեջանական կողմի սադրանքներին, եթե դա ուղղված չէ մարտական դիրքերի գրավման ադրբեջանական կողմի ցանկությանը։

Երբ հայկական կողմը չի կրակում, ստիպված իրենք իրենց ուղղությամբ են կրակում, որ հիմնավորեն, իբր հայկական կողմն է կրակել»,-ասաց ռազմական փորձագետը:

Հայկ Նահապետյանը նշում է, որ Ադրբեջանը դիմում է տարածված մեթոդի՝ռազմական գործողություններից առաջ քարոզչական դաշտ է նախապատրաստում և, որպես ագրեսոր կողմ, ինքն իրեն ներկայացնում է որպես զոհ.

«Ես չեմ բացառում, որ որոշ ժամանակ հետո իտենսիվանան ադրբեջանական գործողությունները: Եթե համարենք նաև, որ ԱՊՀ անդամ երկրների ղեկավարների գագաթնաժողովին Նիկոլ Փաշինյանը որոշ ճիշտ շեշտադրումներով հակադարձեց Ալիևին, մասնավորապես, որ ԼՂ-ի հարցով և միջանցքի մասով՝ շեշտելով, որ նոյեմբերի 9-ի հայտարարության մեջ չկա միջանցքի մասին խոսք: Փաշինյանի այդ օրվա դիրքորոշումները բավականին հայանպաստ էին, նա նաև բացահայտեց Ալիևի մանիպուլացիաները, հնարավոր է, այս ամենից հետո Ալիևը որոշել է, որ ինքը հայերի հետ խոսելու մեկ շահեկան գործիք ունի՝ ռազմական գործողությունները »,-ասաց Նահապետյանը:
Փորձագետը նկատում է՝ Ադրբեջանը հայկական կողմին այլևս փորձում է հակադրել ոչ թե իր դիվանագիտական զինանոցը, որտեղ առանձնապես ոչինչ չունի, այլ՝ ռազմական.

«Եթե խոսում է միջանցքի մասին, ապա ՌԴ փոխվարչապետն ասել է՝ արտատարածքային միջանցք չի կարող լինել, Արցախի հետ կապված էլ, երբ ասում է այլևս թեման փակված է, ՌԴ-ն ասում է՝ Ղարաբաղի հարց կա, ուստի Ադրբեջանի հիմա իր միակ «խաղաթուղթն» է ուզում օգտագործել՝ զինված ընդհարումները»,-ասաց նա:

Հիշեցնենք, որ երեկ Ադրբեջանի ԱԳՆ-ն արձագանքել էր Փաշինյանի՝ հայ-ադրբեջանական սահմանին անցակետեր բացելու մասին հայտարարությանը; Ադրբեջանի ԱԳՆ-ն, մասնավորապես, հայտարերլ է, թե «Հայաստանը պետք է հրաժարվի «կեղծ պատրվակներ օգտագործելու քաղաքականությունից և դադարի խուսափել Զանգեզուրի միջանցքի բացման վերաբերյալ 2020 թվականի նոյեմբերի 9-ի եռակողմ հայտարարության շրջանակում ստանձնած պարտավորություններից »:

Հայկ Նահապետյանը շեշտում է՝Հայաստանը Զանգեզուրի միջանցքի մասով որևէ պարտավորություն չունի, եռակողմ գրավոր 3 փաստաթուղթ կա, որոնցից էրև մեկում Զանգեզուրի միջանցք գոյություն չունի

«Ադրբեջանի ԱԳՆ հայտարությունը կեղծիք է: Թուրքիայի ԱԳ նախարարը ևս միջանցքի վերաբերյալ հայտարարություն էր արել, թե հայկական կողմը պարտավոր է դա անել, բայց հայկական կողմը միջանցք տալու պարտավորություն չունի, Ադրբջանը և Թուրքիան հենք են ստեղծում նոր սադրանքների համար »:

Աղբյուր` Փաստինֆո