Փաստ ինֆո

Արմեն Գևորգյանը կմեկնի Ստրասբուրգ՝ մասնակցելու ԵԽ Տեղական և Տարածքային իշխանությունների կոնգրեսի լիագումար նիստին։ Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, թույլատրել է «Հայաստան» խմբակցության պատգամավոր Արմեն Գևորգյանին բացակայել երկրից՝ բավարարելով պաշտպանի միջնորդությունները։

«Փաստինֆո»-ի թղթակցի հաղորդմամբ՝ Արմեն Գևորգյանի պաշտպան Լուսինե Սահակյանը երկու միջնորդություն է ներկայացրել՝ խնդրելով հոկտեմբերի 22-29-ը և նոյեմբերի 6-10-ը բացակայել Հայաստանի Հանրապետությունից՝ Ստրասբուրգ մեկնելու համար։

ՀՀ երկրորդ նախագահ Ռոբերտ Քոչարյանի պաշտպանական թիմը միացավ Լուսինե Սահակյանի միջնորդություններին։ Մեղադրող դատախազ Գևորգ Բաղդասարյանը հայտարարությամբ հանդես եկավ՝ նշելով, որ Արմեն Գևորգյանի գործողումների և նրա պատգամավորական գործունեության հարցը շատ է քննարկվել, պաշտպանության և մեղադրանքի կողմի դիրքորոշումները տարբեր են եղել ի սկզբանե, ինչ-որ մի փուլից դատարանը դադարել է լսել մեղադրանքի կողմին, դատարանը հստակ դիրքորոշում ունի՝ թույլատրել լքելու ՀՀ-ն և մասնակցել կոնկրետ միջոցառումներին։

«Պետք է արձանագրենք մի հանգամանք՝ եթե ժամանակագրությունը նայենք, թե Արմեն Գևորգյանը որքան ժամանակը մեկ է ՀՀ տարածքը լքում և որքան ժամանակը մեկ է այդ պատճառով սույն դատական նիստերը շարունակելը անհնարին դառնում, պարզ կլինի, որ մեր մտահոգություններն արտահայտված շատ տեղին են եղել»,- նշեց Բաղդասարյանը՝ հավելելով, որ դատարանը պետք է ապահովի ԱԺ պատգամավորի լիազորությունների իրականացման հնարավորություն ստեղծելու և դատական նիստերի շարունակականությունն ապահովելու շարունակությունը։ Բաղդասարյանն ընդգծեց՝ գործընթացներն ուղղակիորեն խաթարում են դատարանի աշխատանքը․ նիստերն անընդհատ հետաձգվում են։

«Քրեական մեղադրանք ենք քննում սույն դատարանում, բայց, ստացվում է, որ քննում ենք այնպես, ինչպես հարմար է Արմեն Գևորգյանին»,- նշեց Գևորգ Բաղդասարյանը։

Լսելով կողմերին՝ դատարանը բավարարեց պաշտպանի միջնորդությունները։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։

Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո