Փաստ ինֆո

Ինձ ճանաչող մարդիկ շատ լավ գիտեն, որ ես չեմ կարող ներգրավված լինել որևէ կոռուպցիոն հանցագործության մեջ՝ հաշվի առնելով իմ անձը։ Որևէ կաշառքի մասին խոսք չկա և չի էլ կարող լինել։ Այս մասին լրագրողների հետ զրույցում ասաց փաստաբան Էրիկ Ալեքսանյանը՝ անդրադառնալով իրեն առաջադրված մեղադրանքին։

«Հասկանում եմ, որ մարդկանց որոշակի շրջանակ սպասում էին կամ ցանկանում էին, որ Էրիկ Ալեքսանյանը որևէ նման գործողությունների ներգրավվածություն ունենա, բայց՝ ապարդյուն »,- նշեց Ալեքսանյանը։

Նախաքննության գաղտնիությունից ելնելով՝ Ալեքսանյանը զերծ մնաց մեղադրանքի վերաբերյալ մանրամասներ հայտնելուց, միայն նշեց, որ օժանդակությունը կապում են իր կողմից իր մասնագիտական գործունեությունը ծավալելը՝ գրավի միջնորդություն ներկայացնելը։

Ալեքսանյանի խոսքով՝ առաջադրված մեղադրանքը հորինված է, արտացոլված որևէ փաստ, նույնիսկ՝ փաստարկ առկա չէ, մերկապարանոց հայտարարություն է։ Նա հիշեցրեց, որ ինքը բազմաթիվ հնչեղ քրեական գործերով պաշտպանություն է իրականացվել, որի ընթացքում օբյեկտիվ հիմքի առկայության դեպքում բազմիցս քննադատությամբ է հանդես եկել։

«Սա ոչ այլ ինչ է, քան՝ իմ մասնագիտական գործունեությանը միջամտություն, լռեցնելու փորձ։ Եթե իրենց միջոցը, եղանակը, գործողության կատարումն ինձ մեղադրանք առաջադրելն ու կալանավորելն է, չարաչար սխալվում են։ Ես կալանավորվելուց չեմ վախենում, քննության ընթացքում կապացուցեմ, որ ես ոչ միայն մեղավոր չեմ, այլև՝ ոչ մի առնչություն չունեմ »,- նշեց Ալեքսանյանը։

Փաստաբանն ընդգծեց, որ քննիչի կողմից ներկայացված որևէ փաստական տվյալ չի վկայում, որ ինքը, միջնորդություն ներկայացնելով, գիտակցել է, իմացել, որ պաշտոնատար անձն այդ միջնորդության վերաբերյալ ենթադրաբար ունեցել է հանցավոր մտադրություն։

Փաստաբան Էրիկ Ալեքսանյանը անդրադարձավ նաև դատավոր Արուսյակ Ալեքսանյանի մեղադրանքին՝ նշելով, որ այն ծայրից ծայր ապօրինի է. «Նշվում է, որ պաշտոնեական լիազորություն է չարաշահել, բայց թե որ լիազորությունն է չարաշահել՝ քննիչը չի կարողանում ասել»։

Մանրամասները տեսանյութում

Աղբյուր` Փաստինֆո