Փաստ ինֆո

Քաղտեխնոլոգ Կարեն Քոչարյանը չի բացառում, որ քաղաքական վենդետաներով իշխանությունը փորձում է հասարակության ուշադրությունը շեղել օրակարգային խնդիրներից։

«Ես այս իշխանությունից ամեն ինչ սպասում եմ՝ ցանկացած բան, որը ոչ մարդկային է, ամեն ինչ սպասում եմ»,- «Փաստինֆո»-ի հետ զրույցում այս մասին ասաց քաղտեխնոլոգ Կարեն Քոչարյանը՝ անդրադառնալով հասարակական-քաղաքական գործիչ Էդգար Ղազարյանի նկատմամբ իր տան շքամուտքում բռնություն գործադրելու փաստին, որը Էդգար Ղազարյանը քաղաքական պատվեր է համարում։

«Ես չեմ կասկածում, որ դա ինչ-որ մի օր շուռ չի գալու իր դեմ, որովհետեւ դեռ չի եղել իշխանություն, որը անվերջ է եղել»,-նշում է քաղտեխնոլոգը՝ ի պատասխան հարցի, թե արդյո՞ք իշխանությունը բռնության միջոցով փորձ չի անում էլ ավելի սրել առանց այն էլ լարված հասարակական մթնոլորտը։

Կարեն Քոչարյանի դիտարկմամբ՝ Նիկոլ Փաշինյանը հիմա բարդ վիճակում է գտնվում, նա չգիտի, թե աշխարհաքաղաքական որ վեկտրին տված խոստումը կատարի, որովհետեւ դրանք արդեն իրար հակասում են, ուստի, կարող է դիմել ցանկացած քայլի։

Վերջին օրերի մյուս աղմկահարույց իրադարձությունը փաստաբան Էրիկ Ալեքսանյանի եւ դատավոր Արուսյակ Ալեքսանյանի դեմ հարուցված քրեական գործն էր, որի առնչությամբ քաղտեխնոլոգը կարծիք հայտնեց․«Եթե հաշվի առնենք, որ մի կողմը փաստաբան է , որը հիմնականում եղել է քաղաքական բանտարկյալների փաստաբանը, մյուս կողմից, հենց այդ նույն քաղաքական բանտարկյալներին սանկցիա տված դատավորն է, մի տեսակ կոգնիտիվ դիսոնանս է առաջանում, որովհետեւ, ես կարծում եմ, որ յուրաքանչյուր իշխանության համար, պարզապես, նման դատավորը գտածո է , բայց այստեղ մեկ այլ խնդիր կա՝ արդյո՞ք իշխանությունը տեղյակ է, թե ինչ է արել ԱԱԾ-ն, արդյո՞ք իշխանությունն ԱԱԾ-ին հարյուր տոկոսով ղեկավարում է, արդյո՞ք տիրապետում է իրավիճակին։ Այս դեպքից հետո ես խիստ կասկածում եմ, որովհետեւ, կրկնեմ՝ մեր այսօր իշխանություններին եւ առհասարակ, իշխանություններին նման դատավորները պետք են»։

Ինչ վերաբերում է Նիկոլ Փաշինյանի կնոջ՝ Աննա Հակոբյանի ակտիվացմանը, որը հատկապես վերջին շրջանում տարաբնույթ գրառումների միջոցով պատերազմում պարտության պատասխանատվությունը փորձում է դնել հայ հասարակության ու , մասնավորապես, հայ մայրերի ու սգակիր մայրերի ուսերին, որոնք իրեն չաջակցեցին, այսպես կոչված, խաղաղության օրակարգն առաջ մղելու հարցում, Կարեն Քոչարյաննն ասաց՝ վերջինիս առհասարակ չի մեկնաբանում, բայց անգամ Աննա Հակոբյանին չի ցանկանա , որ նա սգավոր դառնա, այն էլ՝ այդպիսի սգավոր։

Աղբյուր` Փաստինֆո