Փաստ ինֆո

Ակնհայտ է, որ սա պայմանավորված է բացառապես իմ քաղաքական գործունեությամբ: Մինչ այդ էլ բազմիցս սպառնալիքներ եմ ստացել ֆեյքերից, բայց ուշադրություն չեմ դարձրել: Ինչ վերաբերում է այսօրվա դեպքին, պարզ է, որ քաղաքակ պատվեր է եղել՝ ինձ ֆիզիկապես ոչնչացնելու մտադրությամբ: Այդ մասին քիչ առաջ հիվանդանոցի մուտքի մոտ լրագրողների հետ զրույցում ասաց Էդգար Ղազարյանը:

«Կար են դրել գլխիս շրջանում: Սալջարդեր, վնասվածքներ կան, բայց ստացիոնարի անհրաժեշտություն չկա: Դեպքը տեղի է ունեցել մեր շենքի բակում՝ առավոտյան, երբ վարսավիրանոցից վերադառնում էի տուն: Երկու հոգի դարանակալել էին ու ինձ էին սպասում, ակնհայտորեն հետևել են իմ շարժին: Նրանց նկատել եմ, անգամ բարևել եմ՝ մտածելով, որ շենքի բնակիչներ են, որից հետո անմիջապես հարձակվեցին ու սկսեցին հարվածներ հասցնել՝ հատկապես գլխիս: Երկու հոգի են եղել. մեկը՝ միրուքով, բայց հաստատ Նիկոլ Փաշինյանը չէր: Չհասցրեցի անգամ դիմադրություն ցույց տալ, անմիջապես գցեցին գետնին: Ասացի՝ սպանում եք ինձ, այդ ի՞նչ եք անում, և միայն այն ժամանակ, երբ անշարժացա, թողեցին ու հեռացան»,-ասաց Ղազարյանը:

Ղազարյանի խոսքով՝ ինքը որևէ մեկի հետ խնդիր կամ վիճաբանություն չի ունեցել և բացառվում է, որ այլ պատճառ՝ բացի քաղաքականից, կարող էր լինել:
Նախնական ցուցմունք Ղազարյանն արդեն տվել է քննիչներին և հույս հայտնեց, որ վարույթ կիրականացվի:

Լրագրողի հարցին՝ այս դեպքից հետո կշարունակի՞ արդյոք իր ընդդիմադիր գործունեությունը, Ղազարյանը պատասխանեց՝ այո, դեռ ավելի ակտիվ կլինեմ:

Աղբյուր` Փաստինֆո