Փաստ ինֆո

Արցախի պատվիրակությունը Երևանում այս մի շարք կարևոր հանդիպումներ է ունեցել ՀՀ բարձրագույն իշխանության ներկայացուցիչների հետ։ Այս մասին լրագրողների հետ ճեպազրույցի ընթացքում ասաց Արցախի ԱԳ նախարար Դավիթ Բաբայանը։

Նա մանրամասնեց, որ երեկ հանդիպել են ԱԽ քարտուղարի հետ, այսօր ԱԺ նախագահի հետ, նախատեսված է նաև հանդիպում ՀՀ նախագահի հետ, իսկ վաղը կհանդիպեն ԱԳ նախարարի և վարչապետի հետ։

«Եկել ենք այստեղ՝ անկեղծ քննարկումներ իրականացնելու համար, ոչ միայն արցահայությունը, այլև ողջ հայությունը գտնվում է յուրահատուկ իրավիճակում, այսօր հայտնվել ենք գոյաբանական մարտահրավերների առաջ, շատ կարևոր է, որ ստանանք մի շարք հարցերի պատասխաններ և տեղեկանանք տարբեր գործընթացների մասին։ Ազնիվ ձևով քննարկել ենք նույնիսկ ամենաբարդ հարցերը, մեզ համար կարևոր է, որ Արցախի հարցում ունենանք հստակ դիրքորոշում»,- ասաց Բաբայանը։

Դավիթ Բաբայանն շեշտեց, որ Արցախը դեմ չէ, որ ՀՀ-ն ու Ադրբեջանը հարաբերությունները բարելավեն, սակայն Արցախի և նաև ողջ հայության համար անընդունելի է Արցախը ճանաչել Ադրբեջանի մի մաս.

«Այս հանդիպումների ընթացքում եղան պարզաբանումներ այն մասին, որ որևէ մեկը չի պատրաստվում Արցախը ճանաչել Ադրբեջանի մաս: Ցանկացած փորձ, Արցախը Ադրբեջանի կազմում խցկելու, բերելու է պատերազմի, արյունահեղության, ցեղասպանության կամ Արցախի հայաթափման։ Սա մեսիջ է ողջ աշխարհին, եթե ժողովրդավար հասարակությունը մեզ դիտում է որպես Ադրբեջանի մաս, սա կլինի նաև իրենց վրա դաջված խարան, քանի որ արցախահայության ցեղասպանությունը կլինի նաև նրանց վարած քաղաքականության արդյունք»,-ասաց Արցախի ԱԳ նախարարը:

Աղբյուր` Փաստինֆո