Փաստ ինֆո

ԵՄ դիտորդական առաքելությունը ֆորմալ բնույթ է կրելու: Մեր տարածաշրջանում իրավիճակի կայունացման հիմնական բանալին Ռուսաստանի ձեռքում է: «Փաստինֆո»-ի հետ զրույցում նման տեսակետ է հայտնել քաղաքական վերլուծաբան Արմեն Բաղդասարյանը:

Նրա դիտարկմամբ՝ ԵՄ դիտորդական խումբն ընդամենը փաստահավաք առաքելություն է իրականացնելու, այսինքն՝ դիտորդերը չեն տեղակայվելու շփման գծի երկայնքով, նրանք խորքում են գտնվելու և ընդամենը փաստեր են հավաքագրելու, ուստի նրանց հետ մեծ հույսեր կապել պետք չէ:

Ավելին՝ փորձագետը չի բացառում, որ այն լարվածություն մտցնի մեր տարածաշրջանում.

«Ռուսաստանը դրան խանդով է վերաբերվում, Ադրբեջանն էլ թեժացնում է թեման՝ անընդհատ շեշտելով, որ ԵՄ-ն ՀԱՊԿ անդամ պետության տարածքում դիտորդներ է տեղակայել:

Ռուսաստանը բաց տեքստով անգամ ասել է, որ Արևմուտքի ակտիվությունը կարող է լարվածության նոր ալիք ստեղծել մեր տարածաշրջանում, Իրանին ևս սա մտահոգում է, քանի որ Արևմուտքի հեռանկարային թիրախներից մեկը Իրանն է, թեև հարկ է նշել, որ դիտորդները հայ-իրանական սահմանի երկայնքով չեն տեղաբաշխվելու, քանի որ քաղաքացիական դիտորդների մասին է խոսքը: Դժվար է ասել՝ այդ առաքելության տված օգուտը շատ կլինի, թե՝ վնասները, ամեն դեպքում, սա քայլ է, որը ցույց է տալիս, որ Արևմուտքը փորձում է ակտիվացնել իր ներկայությունը մեր տարածաշրջանում »,-ասաց զրուցակիցը:

Արմեն Բաղդասարյանի խոսքով՝ եթե ԵՄ խումբը միայն դիտորդական առաքելությամբ սահմանափակվի , ապա ոչինչ չի տալու այն, բայց եթե Արևմուքը սկսի գործնական երկխոսություն սկսել Ռուսաստանի և Թուրքիայի հետ, ապա կարող ենք ակնկալիքներ ունենալ.

«ԵՄ դիտորդական առաքելությունը գործնականում որևէ օգուտ չի տալու, քանի որ այս պահի դրությամբ այն միայն քարոզչական բնույթ ունի, բայց հետագայում, եթե զարգացումներ ունենա, կարող ենք ակնկալիքներ ունենալ, օրինակ՝ եվրոպական երկրները սկսեն սանկցիաներ կիրառել Ադրբեջանի նկատմամբ և Հայաստանին ռազմական օգնություն ցույց տալ, սա կլինի արդյունք»,-ասաց զրուցակիցը:

Ուշագրավ է, որ ԵՄ խումբն իր դիտորդական առաքելությունն իրականացնելու է միայն ՀՀ տարածքում, և ոչ՝ Ադրբեջանի:

Արմեն Բաղդասարյանը սա բացատրում է նրանով, որ բոլորի համար հստակ է՝պոտենցիալ ագրեսոր կողմը Ադրբեջանն է, ուստի նրանց պետք չէ, որ մոնիտորինգի ենթարկեն նաև Ադրբեջանի կողմից.
«Այս դեպքում արդեն ակնհայտ կդառնա, որ իրականում Ադրբեջանը մեր տարածք է ներխուժել և ամեն անգամ հենց իրենք են լարվածություն առաջացնում»,-ասաց նա:

Աղբյուր` Փաստինֆո