Փաստ ինֆո

«2018 թվականի հեղափոխության աշխարհաքաղաքական՝ ՆԱՏՕ-թուրքական շահառուները ունեցան 2 նպատակ՝ արցախյան հիմնախնդրի լուծման պրոթուրքական տարբերակ, որի ականատտեսն ենք այս պահին եւ Հայաստանի արտաքին քաղաքական վեկտորի փոփոխություն, որի արդյունքում Հայաստանը կհեռացվի Ռուսաստանից եւ կմտնի թուրք-ՆԱՏՕ-ական ազդեցության գոտի, ինչը այս չորս տարիների ընթացքում այդ շահերի սպասարկող Փաշինյանի կառավարությունն իրականացնում է», - «Փաստինֆո»-ի հետ զրույցում այս մասին ասաց ԱԺ նախկին փոխնախագահ, ՀՀԿ ԳՄ անդամ Էդուարդ Շարմազանովը՝ անդրադառնալով Հայաստանի ու Արցախի շուրջ ընթացող զարգացումներին։

Շարմազանովի խոսքով, Փաշինյանը որեւէ հայտարարություն անում է, ապա ուղիղ դրա հակառակն իրագործում։ Օրինակ՝ 2018 թվականի օգոստոսի 17-ի հանրահավաքի ժամանակ Փաշինյանը հայտարարեց, թե իր օրոք հայ-ռուսական հարաբերությունները լինելու են ամենաբարձր մակարդակում, մինչդեռ այսօր մենք արձանագրում ենք, որ փաստացի, չունենք հայ-ռուսական դաշնակցային հարաբերություններ։ «Այսօր մենք չունենք հայ-ռուսական դաշնակցային հարաբերություն, որովհետեւ սրանք, օգտվելով ուկրաինական ճակատում Ռուսաստանի խրվածությունից, հակառուսականություն են քարոզում եւ իրենց չիրականացրած աշխատանքի պատասխանատվությունը, հերթական կապիտուլյացիայի մեղքը փորձում բարդել Ռուսաստանի վրա», -բացատրում է Շարմազանովն ու հարցնում, արդյո՞ք հայ ժողովուրդը Պուտինին է ընտրել նախագահ։

«Հայ ժողովրդի անվտանգությունը դուք պետք է ապահովեք, կարո՞ղ է Պուտինը, Քոչարյանը կամ Սարգսյանն էին ասում, թե Սեւ լճի 30 տոկոսի համար պատերազմ չեմ սկսելու»,-հիշեցնում է նա ու հավելում․« Փաշինյանը ասաց՝ հաղթանակ, բերեց կապիտուլյացիա, ասաց՝ վենդետա չի լինելու, բերեց վենդետա, ասաց՝ խաղաղություն, բերեց պատերազմ, ասաց՝ երջանկություն, բերեց մահ»։
Ձախողված իշխանության քաղաքականությունը, ԱԺ նախկին փոխխոսնակի կարծիքով, Հայաստանը ներքաշելու է նոր պատերազմի մեջ ու դրանով փորձ է արվելու արդարացնել նոր զիջումները եւ դա գցել ՌԴ-ի գրպանը։

Անդրադառնալով ԱԽՔ Արմեն Գրիգորյանի ՝ ՀԱՊԿ-ի գործողություններին սպասելու վերաբերյալ հայտարարությանը, Էդուարդ Շարմազանովը նկատեց․ «Ո՞վ է ՀԱՊԿ-ում նախագահողը, այդ ինչպե՞ս եղավ, որ Ղազախստան զորք ուղարկելու համար Նիկոլը մեխանիզմներ գործարկեց, այդ նույն ԱԽՔ-ն էր հայտարարում, թե Նիկոլը կարողացավ մեխանիզմները գործարկել։ Այդ հզոր Նիկոլը Ղազախստանի մասին ավելի շա՞տ է մտածում, կարողանում է մեխանիզմներ օգտագործել, Հայաստանի համար չի՞ կարողանում»։

Շարմազանովն ակնհայտ է համարում, որ ՌԴ-Արեւմուտք գլոբալ հակամարտության մեջ ՀՀ դե ֆակտո իշխանությունը Արեւմուտքի կողմն է բռնել ։ «Գուցե Ռուսաստանը ամենաիդեալական դաշնակիցը չէ, բայց նա ահավոր թշնամի է։ Ռուսաստանի հետ թշնամանալը Հայաստանին նոր աղետներ է բերելու։ Հարյուր տարի առաջ նույն իրավիճակն էր ու թուրքը եկավ հասավ մինչեւ Երեւան»,-արձանագրեց Շարմազանովը։

Անդրադառնալով մի կողմից Պրահայի գործընթացին, մյուս կողմից Աստանայի հանդիպումներին Շարմազանովը Փաշինյանին համեմատեց կնոջ հետ, ով միաժամանակ ԶԱԳՍ-ի դռան մոտ ժամադրվել է երկու տարբեր տղամարդկանց հետ։ «Այդպես չի լինում, չի՛ կարելի պետությունը գցել ռուս-արեւմտյան հակամարտոթյան մեջ։ Հայաստանը Ուկրաինա կարող է դառնալ»,-ասաց Շարմազանովը։

Հարցին, արդյո՞ք Ռուսաստանում չեն գիտակցում, որ տվյալ դեպում , սա ոչ թե Հայստանի այլ գործող իշխանության քաղաքականությունն է, նախկին ԱԺ փոխնագահը նախ հղում արեց արտահերթ ընտրությունների արդյունքներին, որից, ՌԴ-ում տեղյակ են, ապա նկատեց՝ եթե մենք մեր պետական շահի մասին չենք մտածում,որեւէ երկիր, լինի ՌԴ-ն, ԱՄՆ-ը, թե Ֆրանսիան, չեն մտածելու ու ակնհայտ է, որ վերջին երկու երկրները ոչ թե Հայաստանի շահի, այլ Հայաստանը Ռուսաստանից պոկելու մասին են մտահոգ։

«Ստեղծված իրավիճակում, կենդանի մնալու միակ շանսը Ռուսաստանի հետ դաշինքի ամրապնդումն է, այլ ճանապարհ չկա։ եթե ռուսական բանակը դուրս եկավ Հայաստանից, նրան փոխարինելու է թուրքականը։ եթե մարդիկ մտածում են, որ ամերիկյան ու ֆրանսիական զորքն է գալու, ուրեմն, նրանք Էրդողանին չեն ճանաչում, չեն ճանաչում այսօրվա աշխարհաքաղաքականությունն ու Թուրքիայի դերը տարածաշրջանում»,-եզրափակեց Շարմազանովը։

Աղբյուր` Փաստինֆո