Փաստ ինֆո

Երևանի Բրյուսովի անվան պետական համալսարանը կմիանա Հայաստանի ֆիզիկական կուլտուրայի և սպորտի պետական ինստիտուտին ու կդառնա Հայկական պետական մանկավարժական համալսարանի մաս։ Այս մասին լրագրողների հետ զրույցում ասել է Կրթության, գիտության, մշակույթի եւ սպորտի նախարար Վահրամ Դումանյանը։

«Այո, քննարկվում է 3 բուհերի միավորման հարցը, որոշումը կընդունվի,և մենք առաջ կգնանք»,–ասաց Դումանյանը։

Նրա խոսքով` ոչինչ կտրուկ չի փոխվելու, ու պրոցեսն ընդամենը բարձրագույն կրթության որակի բարելավման համար է։ ԿԳՄՍՆ-ն զարմացել է, որ Բրյուսովի անվան համալսարանի ռեկտորն ասել է, թե այս որոշումն իր համար անսպասելի էր։

«Այս առիթով օգոստոսի 9-ին անձամբ հանդիպել եմ երեք բուհերի ռեկտորների հետ, մինչ այդ էլ են հանդիպումներ եղել՝ առանց իմ մասնակցության։ Պրոֆեսորադասախոոսական կազմից որևիցե հաստիք չի կրճատվելու։  Միայն երկու ռեկտորի հաստիք պակաս կլինի։ Երեք շենքերն էլ պահպանվելու են, բոլորն էլ մնալու են այնտեղ, որտեղ կան, ոչ մի տեղափոխություն չի լինելու»,–ասաց նախարարը։

Նրա խոսքով՝ հայտարարվել է, որ կա նման գաղափար, և այն նոր չէ, քննարկվել է տարիներ շարունակ։ Ըստ Դումանյանի` բուհերը կմնան իրենց տեղերում այնքան ժամանակ, քանի դեռ չի իրագործվել ակադեմիական քաղաքի գաղափարը, որից հետո բոլոր բուհերը կունենան ավելի լավ պայմաններ։ Նա հավաստիացրեց, որ ոչ մի գաղտնի գործընթաց չի եղել և չի լինելու, նախարարության միակ նպատակը կրթության որակը երկրում բարձրացնելն է։

Դումանյանի խոսքով` ապագայում, կրթական ռազմավարության համաձայն, երբ Հայաստանում կստեղծվեն մինչև 8 բուհեր, կվերանայվեն մասնագիտությունների ցանկը, որպեսզի 3–4 բուհում չլինի նույն մասնագիտությունից ու ֆակուլտետից։

Աղբյուր` Փաստինֆո