Փաստ ինֆո

Միրզոյան-Լավրով հանդիպումը և դրա դրվագները պետք է դիտարկել ընդհանուր համակցության մեջ, պետք է նախ հասկանանք, թե ինչ էր նախորդում այդ հանդիպմանը՝ Փելոսիի այցը, դրանից հետո մի շարք հանդիպումներ արևմտյան գործիչների հետ, Պրահայում կայացած հանդիպումը, Մակրոնի երեկվա հարցազրույցը, որտեղ նա մեղադրել էր Ռուսաստանին՝ Ադրբեջանի և Հայաստանի միջև բախումներ հրահրելու մեջ: Եթե այս ամենը խորքային վերլուծենք, ապա կարող ենք արձանագրել՝ Հայաստանը փորձում է դուրս գալ ռուսական ազդեցության գոտուց, իսկ այս ամենը չէր կարող լինել, եթե Հայաստանի իշխանությունները արտաքին քաղաքականության վեկտորային փոփոխության ներքին որոշում չունենային: «Փաստինֆո»-ի հետ զրույցում նման դիտարկում է արել քաղաքագետ Արա Պողոսյանը:

Քաղաքագետը կարծում է, որ հայկական կողմի այս դիրքորոշմանը նպաստել են նաև արտաքին որոշ ազդակներ.

«Պատահական չէր Ֆրանսիայի նախագահի վերջին հարցազրույցը, որտեղ նաև հայ-ռուսական հարաբերությունների և Ռուսաստանի ստանձնած պարտավորությունների չկատարման վերաբերյալ ակնարկ կար, այս հայտարարությունները կարծես թիկունք էին Հայաստանի իշխանություններին, որ ավելի համարձակ կարողանային փոխել իրենց քաղաքական խոսույթը »,-ասաց Արա Պողոսյանը:

Զրուցակիցը, միևնույն ժամանակ, ընդգծում է՝ այս պահին Հայաստանը պատրաստ չէ արտաքին քաղաքական վեկտորի փոփոխության, դա մեզ համար կարող է կործանարար հետևանքներ ունենալ:

Նա շեշտում է՝ աշխարհաքաղաքական վեկտորի փոփոխության հետևանքների պատասխանատվությունը ՀՀ իշխանություններինն է, իսկ հետևանքները կրելու են պետությունը և ժողովուրդը.

«Կասկած չունեմ` լինելու են հետևանքներ, նաև կասկած չունեմ, որ մեր պետությունը և ժողովուրդը պատրաստ չեն կրել այդ հետևանքները: Այդ հետևանքները պարտադիր չէ, որ լինեն կոշտ ուժի կիրառմամբ, կարող են լինել գազամատակարարման հետ կապված, ուզենք թե չուզենք, մեր տնտեսությունը, էներգետիկ համակարգը, շաղկապված է ռուսականի հետ, այդ ազդեցությունը և հետադարձ էֆեկտները զգալի են լինելու Հայաստանում, ընդ որում, բավականին երկար ժամանակ»,-նշում է քաղաքագետը:

Նշենք, որ նույն հանդիպման ժամանակ, ի պատասխան Միրզոյանի հայտարարություններին՝ Ռուսաստանի կողմից դաշնակցային պարտականությունները չկատարելու վերաբերյալ, Լավրովն ասաց, որ Հայաստանի դիմումից անմիջապես հետո ՀԱՊԿ-ը առաջարկել է դիտորդական առաքելություն ուղարկել Ադրբեջանի հետ Հայաստանի սահմանային տարածք, սակայն դա տեղի չի ունեցել միայն այն պատճառով, որ ՀԱՊԿ-֊ի նախագահող երկիրը՝ Հայաստանի մինչեւ հիմա «ազատ ժամանակ» չի գտել համապատասխան նիստ կազմակերպելու համար

Արա Պողսյանի արձանագրմամաբ՝ սա նախ քաղաքական և խոսույթային արտահայտություն է ռուսական կողմի «նեղվածության» մասին:

Երկրորդ՝ փորձ է արվում ՀԱՊԿ կառույցի աշխատելու- կամ չաշխատելու հետ կապված ողջ մեղադրանքն ուղղել Հայաստանի ուղղությամբ, ինչն օբյեկտիվ չէ.

«Մենք էլ գիտենք, թե ամեն անգամ ինչ արձագանք էին ստանում ՀՀ սուվերեն տարածքի վրա հարձակումները՝ հենց ՀԱՊԿ գործընկերների կողմից, Լավրովի մեղադրանքներն օբյեկտիվ չէին, քանի որ կառույցը ինքնին խնդիրներ ունի: Կառույցի անդամ երկրների մի մասը շատ ավելի համընկնող շահեր ունի մեր թշնամի երկրի հետ, քան՝ մեր»,-շեշտեց Արա Պողոսյանը:

Աղբյուր` Փաստինֆո