Փաստ ինֆո

2021թ օգոստոսին մարտական հենակետում երեք զինծառայողի սպանության դրդելու մեջ մեղադրվող դիրքի ավագ Ս. Գ.-ն չի ընդունում ոչ մեղադրանքը, ոչ էլ այն փաստական հանգամանքները, որոնք դրված են մեղադրանքի հիմքում։ Այս մասին «Փաստինֆո»-ն տեղեկանում է պաշտպան Լիպարիտ Սիմոնյանից։

Հիշեցնենք, որ 2021թ օգոստոսի 19-ին մարտական հենակետերից մեկում հայտնաբերվել էր երեք զինծառայողի դի՝ կյանքի հետ անհամատեղելի մարմնական վնասվածքներով։

Հարուցված քրեական գործով նախ ձերբակալվել, ապա կալանավորվել է զինծառայողների համածառայակիցը։ Օգոստոսի 23-ին պաշտոնապես հայտնի դարձավ, որ զինծառայողների սպանության գործով ձերբակալվել է նաև դիրքի ավագը՝ զինծառայողներին կյանքից զրկելուն դրդելու և ծառայակցի նկատմամբ սեքսուալ բնույթի բռնի գործողություններ կատարելու կասկածանքով, այժմ՝ դիրքի ավագին մեղսագրվում է միայն զինծառայողներին կյանքից զրկելուն դրդելը։ Մեղադրյալներն արդեն մեկ տարի է՝ կալանքի տակ են։

Քրեական գործն ի սկզբանե ուղարկվել էր Սյունիքի մարզի ընդհանուր իրավասության դատարան և մակագրվել դատավոր Մուշեղ Արամյանին, սակայն գործի ընդդատությունը փոխվել է՝ նկատի ունենալով, որ կողմերը հիմնականում Երևան քաղաքից են։ Այժմ գործը դատավոր Ռոբերտ Պապոյանի վարույթում է։ Երևան տեղափոխվելուց հետո նշանակվել է մեկ նիստ, որը հետաձգվել է, հաջորդ դատական նիստը նշանակվել է հոկտեմբերի 26-ին։ Գործը դեռևս նախնական լսումների փուլում է։

Դիրքի ավագի պաշտպան Լիպարիտ Սիմոնյանը մեզ հետ զրույցում հայտնեց, որ իր պաշտպանյալը չի ընդունում առաջադրված մեղադրանքը, Ս. Գ.-ն մշտապես հերքել է իր առնչությունը դեպքին, իսկ մյուս մեղադրյալը՝ Ա. Հ.-ն, որը ցուցմունք է տվել իր դեմ, նախաքննության ավարտական փուլում հրաժարվել է ցուցմունքից, որը, ըստ պաշտպանի. Ս. Գ.-ի դեմ միակ ապացույցն էր։

«Տվյալ անձը նախաքննության ընթացքում տվել է մի քանի ցուցմունք, որոնք էապես մեկը մյուսին հակասում են, վերջում նաև՝ հրաժարվեց։ Իր խոստովանական ցուցմունքը նաև ի վնաս Ս. Գ.-ի կամ նրա դեմ ցուցմունքը այլ ապացույցներով, այլ փաստական տվյալներով չի հիմնավորվում։ Հիմա առավել ևս, որ նա հրաժարվում է ցուցմունքից՝ նաև պատճառաբանելով, թե ինչու է հրաժարվում ու նշում իրականությունը, այլ ապացույց չի մնում»,-նշեց պաշտպանը՝ հավելելով, որ կարծում էին, որ նախաքննության մարմինը ճիշտ գնահատական կտա հավաքված ապացույցներին և կկարճի վարույթը Ս. Գ.-ի մասով։ Պաշտպանության կողմը նման միջնորդություն ներկայացրել է, սակայն ՀՀ քրեական դատավարության նոր օրենսգիրքը հնարավորություն է տալիս վարույթն իրականացնող մարմնին՝ միջնորդությունների վերաբերյալ որոշում չկայացնելու։

Հիշեցնենք, որ ավելի վաղ զինծառայողների սպանության մեջ մեղադրվող Ա. Հ.-ի պաշտպան Գարիկ Գալիկյանը մեզ հետ զրույցում նշել էր, որ Ա. Հ.-ի մեղադրանքի հիմքում դրված է բացառապես ինքնախոստովանական ցուցմունքը, որից Ա. Հ.-ն հրաժարվել է և նշել, որ դեպքի հետ կապ չունի։

«Թե ինչու է ի սկզբանե մի քանի անգամ ինքնախոստովանական ցուցմունք տվել՝ որոշակի պատճառներ է մատնանշել, որը քննության առարկա չի դարձվել։ Ամբողջ գործում բացառապես իր ինքնախոստովանական ցուցմունքն է, ուրիշ ոչինչ»,- ասել էր Գալիկյանը, իսկ ճշգրտող հարցին՝ ստիպե՞լ են ինքնախոստովանական ցուցմունք տալ՝ պաշտպանը նշել էր. «Ոչ թե ստիպել են, այլ՝ ասել են, որ իր համար լավ կլինի այդպես»։

Հեղինակ՝ Իզաբել Սահակյան

Աղբյուր` Փաստինֆո